ကြာသာပတေးနေ့မနက် နိုင်ငံတကာသတင်းများ

စက်တင်ဘာ ၂၀၊ ၂၀၁၈
M-Media

ကိုရီးယားနှစ်နိုင်ငံ စည်းလုံးညီညွတ်ကြောင်း ခေါင်းဆောင်များပြသ
===========
နာမည်ကြီး ဒုံးကျည်စမ်းသပ်ရာနေရာကို နိုင်ငံတကာ စောင့်ကြည့်သူတွေရှေ့မှောက်မှာ ဖြိုချဖျက်ဆီးသွားဖို့ တောင်းဆိုမှုကို လက်ခံကြောင်း မြောက်ကိုရီးယားခေါင်းဆောင် ကင်ဂျုံအွန်က တိုင်းပြည်ကိုရောက်နေတဲ့ တောင်ကိုရီးယားသမ္မတ မွန်ဂျယ်အင်ကို ပြောကြားလိုက်ပါတယ်။ ခေါင်းဆောင်နှစ်ဦးဟာ ဒီကနေ့မှာ ကိုရီးယားနိုင်ငံဆိုတဲ့ အယူအဆ သန္ဓေတည်ရာတောင်ကုန်းကို သွားရောက်ခဲ့ပြီး စည်းလုံးညီညွတ်မှုကို ပြသခဲ့ပါတယ်။ အမေရိကန်ကသာ မှန်မှန်ကန်ကန် ဆောင်ရွက်မယ်ဆိုရင် နျူစမ်းသပ်ရာနေရာကိုလည်း ဖျက်ဆီးသွားမယ်လို့ မြောက်ကိုရီးယားက ပြောကြားခဲ့ပါတယ်။

မလေးဝန်ကြီးချုပ်ဟောင်း ငွေကြေးခ၀ါချမှု စွဲချက် ၂၁ ချက်ဖြင့် တရားစွဲခံရမည်
===============
ကိုယ်ပိုင်အကောင့်ထဲကို ကန်ဒေါ်ဘာ ၆၈၁ သန်း ၀င်ရောက်မှုနဲ့ပတ်သက်ပြီး ၀န်ကြီးချုပ်ဟောင်း နာဂျစ်ရာဇတ်ဟာ ငွေကြေးခ၀ါချမှုစွဲချက် ၂၁ ခုနဲ့ တရားစွဲဆိုခံရမယ်လို့ မလေးရှားရဲတပ်ဖွဲ့ ဒီကနေ့မှာ ပြောကြားလိုက်ပါတယ်။ မနေ့က ဖမ်းဆီးလိုက်တဲ့ နာဂျစ်ကို ဒီကနေ့မနက်မှာ ရဲတပ်ဖွဲ့ရဲ့ စီးပွားရေး ရာဇ၀တ်မှုဆိုင်ရာ စုံစမ်းစစ်ဆေးရေး ဌာနကို ခေါ်ဆောင်သွားခဲ့ပြီး စစ်ချက်ယူမှာ ဖြစ်ပါတယ်။ အရင် ရာဇ၀တ်မှုဆိုင်ရာ စွဲချက် ၇ ခုနဲ့ တရားစွဲဆိုခံထားရတဲ့ နာဂျစ်ရဲ့အမှုကို ဒီကနေ့နှောင်းပိုင်းမှာ စတင်ကြားနာမှာ ဖြစ်ပါတယ်။

ပါကစ္စတန်ဝန်ကြီးချုပ်ဟောင်း ထောင်ဒဏ်ဆိုင်းငံ့ခံရပြီး ထောင်မှ လွတ်မြောက်လာ
==================
လန်ဒန်က ဇိမ်ခံတိုက်ခန်း ၀ယ်ယူမှုနဲ့ပတ်သက်ပြီး ၀န်ကြီးချုပ်ဟောင်း နာဝဇ်ရှရစ်ဖ်နဲ့ သမီးဖြစ်သူတို့အပေါ် ထောင်ဒဏ်တွေ ချမှတ်ထားမှုကို ပါကစ္စတန်တရားရုံးချုပ်က မနေ့မှာ ရပ်ဆိုင်းလိုက်ပြီး သူတို့နှစ်ဦးကိုလည်း အကျဉ်းထောင်ကနေ လွှတ်ပေးလိုက်ပါတယ်။ နာဝဇ်ရှရစ်ဖ်က ထောင်ဒဏ် ၁၀ နှစ်၊ သမီးဖြစ်သူ မရ်ယမ်က ၇ နှစ် အသီးသီး ချမှတ်ခံထားရတာပါ။ ထောင်ဒဏ်ကို ရပ်ဆိုင်းလိုက်ပေမယ့် သူတို့အပေါ်စွဲထားတဲ့ ခြစားမှုစွဲချက်တွေ၊ အာဏာအလွဲသုံးစားမှု စွဲချက်တွေကိုတော့ ဆက်လက်ရင်ဆိုင်ရအုံးမှာ ဖြစ်ပါတယ်။ ရှရစ်ဖ်က အခုလိုတရားစွဲဆိုမှုတွေကို ငြင်းဆိုပြီး နိုင်ငံရေးလုပ်ကြံမှုတစ်ခုဖြစ်တယ်လို့ ပြောကြားထားပါတယ်။

ဖိလစ်ပိုင်တွင်မြေပြိုမှုကြောင့် လူ ၃ ဦးသေဆုံး
=================
ဖိလစ်ပိုင်နိုင်ငံအလယ်ပိုင်းမှာ ဒီနေ့မနက်အစောပိုင်းက မိုးသည်းထန်စွာရွာသွန်းပြီး မြေပြိုမှုကြောင့် နေအိမ် ၁၀ လုံးလောက်ပြိုကျပြီး အနည်းဆုံး ၃ ဦး သေဆုံးခဲ့ပါတယ်။ ဖိလစ်ပိုင်ဟာ ပြီးခဲ့တဲ့ရက်ပိုင်းအတွင်းကပဲ အခုနှစ်အတွင်း အဆိုးဝါးဆုံး တိုင်ဖုန်းမုန်တိုင်းဒဏ်ကို ခံစားခဲ့ရကာ လူအများအပြား သေဆုံးခဲ့ပါတယ်။ ဒီကနေ့မနက် မြေပြိုမှုအတွင်း ပိတ်မိနေသူတစ်ချို့လည်း ရှိတာကြောင့် သေဆုံးသူအရေအတွက် မြင့်တက်လာနိုင်ပါတယ်။ လက်ရှိမှာ ရှာဖွေကယ်ဆယ်ရေးတွေကို လုပ်ဆောင်နေပါတယ်။

Ref: CNA, Aljazeera