မွတ်စလင်ကမ္ဘာမှ ပြဿနာများ ဖြေရှင်းရန် ကူညီလိုသည်ဟု ပါကစ္စတန်ဝန်ကြီးချုပ်ပြော

စက်တင်ဘာ ၂၀၊ ၂၀၁၈
M-Media

ပါကစ္စတန်ဝန်ကြီးချုပ် အင်မရန်းခန်း

– မွတ်စလင်တွေအကြား သဘောထားကွဲလွဲမှုဟာ အစ္စလာမ့်အသိုင်းအ၀ိုင်းကို အားနည်းစေပြီး ဒီလိုတင်းမာမှုတွေကို ဖြေရှင်းရေး ကူညီဖို့ ဆန္ဒရှိတယ်လို့ ပါကစ္စတန်ဝန်ကြီးချုပ် အင်မရန်းခန်းက Arabiya TV နဲ့ အင်တာဗျူးမှာ ပြောကြားလိုက်ပါတယ်။

အင်မရန်းခန်းဟာ သူ့ရဲ့ ပထမဆုံး နိုင်ငံရပ်ခြားခရီးစဉ်အဖြစ် ဆော်ဒီအာရေဗျနိုင်ငံကို ရောက်ရှိစဉ် မနေ့က အင်တာဗျူး ဖြေကြားခဲ့တာ ဖြစ်ပါတယ်။

ခန်းက မွတ်စကမ္ဘာမှာ ဖြစ်ပွားနေတဲ့ တင်းမာမှုတွေကို အဆုံးသတ်ရေးနဲ့ နိုင်ငံအချင်းချင်း နားလည်းမှုတည်ဆောက်ရေးတို့အတွက် ပါကစ္စတန်က ကူညီဖို့ ဆန္ဒရှိနေတယ်လို့ Arabiya TV ကို ပြောကြားခဲ့ပါတယ်။

ပါကစ္စတန်ဟာ တာလီဘန်လို အကြမ်းဖက်သမားတွေကို ထိထိရောက်ရောက် နှိမ်နှင်းမှုမရှိဘူးလို့ အမေရိကန်က ပြီးခဲ့တဲ့လတွေမှာ စွပ်စွဲခဲ့ပါတယ်။

ဝန်ကြီးချုပ် ခန်းကတော့ အာဖဂန်နဲ့ အခြားတိုင်းပြည်တွေက ပြဿနာတွေကို ပါကစ္စတန်က သိသိသာသာ ခံစားနေရပြီး အစ္စလာမ်ကမ္ဘာမှာ ရန်လိုမှုတွေ မရှိသင့်တော့ကြောင်း၊ အရှေ့အလယ်ပိုင်းပြဿနာမှာ ညှိနှိုင်းသူအဖြစ် ပါကစ္စတန်က ဆောင်ရွက်လိုပြီး၊ ယီမင်ကပြဿနာကိုလည်း အဆုံးသတ်သွားအောင် ကူညီချင်ကြောင်း၊ အကြမ်းဖက်ဝါဒနဲ့ ပတ်သက်ပြီး မိမိတို့လောက် ဘယ်သူကမှ ထိရောက်တဲ့ အကြံဉာဏ်မျိုး မပေးနိုင်ကြောင်း ထည့်သွင်းပြောဆိုခဲ့ပါတယ်။

ဆော်ဒီက ပါကစ္စတန်ကို ကူညီခဲ့မှုတွေအတွက် အင်မရန်းခန်းက ကျေးဇူးတင်ခဲ့ပြီး၊ ဆော်ဒီခေါင်းဆောင်ပိုင်းရဲ့ ခြစားမှုတိုက်ဖျက်ရေးဆောင်ရွက်မှုကိုလည်း ချီးကျူးခဲ့ပါတယ်။ ဒါ့အပြင် နှစ်နိုင်ငံ ပြည်သူချင်း ဆက်သွယ်ဆောင်ရွက်မှုကို ခိုင်မာအောင် ဆောင်ရွက်သွားမယ်လို့လည်း ဆိုပါတယ်။

ပြီးခဲ့တဲ့လ ရွေးကောက်ပွဲမှာ အာဏာရခဲ့တဲ့ ၀န်ကြီးချုပ် အင်မရန်းခန်းဟာ တိုင်းပြည်အတွင်း ခြစားမှုကို တိုက်ဖျက်သွားမှာဖြစ်ပြီး စီးပွားရေး ပိုမိုကောင်းမွန်လာအောင် ဆောင်ရွက်မယ်လို့ ပြောကြားထားပါတယ်။

ဆော်ဒီကနေတစ်ဆင့် အင်မရန်းခန်းဟာ မနေ့နှောင်းပိုင်းမှာ အာရပ်စော်ဘွားများပြည်ထောင်စု (ယူအေအီး) နိုင်ငံကို သွားရောက်ခဲ့ပါတယ်

Ref : Pakistan Today