S-300 ဒုံးခွင်းစနစ်ကို ရုရှားက ၂ ပတ်အတွင်း ဆီးရီးယားသို့ ပို့မည်

စက်တင်ဘာ ၂၄၊ ၂၀၁၈
M-Media

– ဆီးရီးယားကိုပို့ဆောင်ဖို့ ဆိုင်းငံ့ထားတဲ့ S-300 လေကြောင်းရန် ကာကွယ်ရေးစနစ်ကို ၂ ပတ်အတွင်း ပေးပို့သွားမယ်လို့ ရုရှားက ကြေငြာလိုက်ပြီး၊ ဆီးရီးယားမှာ ရုရှားစစ်လေယာဉ်တစ်စင်း ပစ်ချခံရပြီးတဲ့နောက် ဒီလိုကြေငြာချက် ပေါ်ထွက်လာတာ ဖြစ်ပါတယ်။

ယခုတစ်ပတ် အစောပိုင်းက ဆီးရီးယားမှာ အစ္စရေးတိုက်လေယာဉ်လေးစင်း ကျူးကျော်တိုက်ခိုက်မှုအတွင်း ပျံသန်းနေတဲ့ ရုရှားစစ်လေယာဉ် Il 20 ကို အကာအကွယ်ယူခဲ့တာကြောင့် ဆီးရီးယားအစိုးရတပ်က အစ္စရေးလေယာဉ်တွေကို ဒုံးကျည်နဲ့ပစ်ရာမှာ Il-20 ကို ထိမှန်ခဲ့ပါတယ်။

အစ္စရေးရဲ့ ဒီလုပ်ရပ်ကို နည်းလမ်းပေါင်းစုံနဲ့ တုန့်ပြန်သွားဖို့ သမ္မတပူတင်က အမိန့်ပေးထားတယ်လို့ ရုရှားကာကွယ်ရေးဝန်ကြီးဌာနက ဒီကနေ့ထုတ်ပြန်တဲ့ ကြေငြာချက်မှာ ဖော်ပြထားပါတယ်။

ရုရှားရဲ့ အဆင့်မြင့် ဒုံးခွင်းစနစ်ဖြစ်တဲ့ S-300 ကို ဆီးရီးယားဟာ လွန်ခဲ့တဲ့နှစ်အနည်းငယ်ကတည်းက ၀ယ်ယူထားခဲ့ပေမယ့် အစ္စရေးရဲ့ မေတ္တာရပ်ခံချက်ကြောင့် ၂၀၁၃ ခုနှစ်မှာ ဒီစနစ်ပေးပို့ရေး ရုရှားက ရပ်ဆိုင်းခဲ့ပါတယ်။

“အသုံးပြုနည်း လေ့ကျင့်ပေးထားတဲ့ ဆီးရီးယားတပ်ဖွဲ့ဝင်တွေနဲ့အတူ S-300 စနစ် ပေးပိုဖို့ အဆင်သင့်ဖြစ်နေတဲ့အချိန် ၂၀၁၃ ခုနှစ်မှာ အစ္စရေးရဲ့ မေတ္တာရပ်ခံမှုကြောင့် ကျွန်တော်တို့ဟာ ဆိုင်းငံ့ခဲ့ပါတယ်။ ဒါပေမယ့် အခုတော့ အခြေအနေက ပြောင်းလဲသွားပါပြီ။ ဒါဟာ ကျွန်တော်တို့အမှား မဟုတ်ပါဘူး” လို့ ကာကွယ်ရေးဝန်ကြီးဌာနရဲ့ ကြေငြာချက်မှာ ဖော်ပြထားပါတယ်။

ဆီးရီးယားမှာ လက်ရှိသုံးစွဲနေတဲ့ လေကြောင်းရန်ကာကွယ်ရေးစနစ်တွေဟာ ဟောင်းနွမ်းနေပြီဖြစ်ပြီး အစ္စရေးရဲ့ မကြာခဏ ကျူးကျော်တိုက်ခိုက်မှုတွေကို ဟန့်တားနိုင်စွမ်း မရှိပါဘူး။ S-300 စနစ်ဟာ ခေတ်အမီဆုံး ဒုံးခွင်းစနစ်တွေထဲက တစ်ခုဖြစ်ပြီး ကီလိုမီတာ ၂၅၀ အကွာမှာရှိတဲ့ ပစ်မှတ်တွေကို ဖျက်ဆီးပစ်နိုင်ပါတယ်။

ရုရှားစစ်တပ်ဟာ ဆီးရီးယားလေကြောင်းရန်ကာကွယ်ရေးတပ်ဖွဲ့ကို ပိုမိုကောင်းမွန်တဲ့ ထိန်းချုပ်စနစ်တွေ ထောက်ပံ့ဖို့လည်း ရှိနေပါတယ်။

Ref: RT