အမေရိကန်က ထိုင်ဝမ်ကို လက်နက်ရောင်းမှု တရုတ်က ပြင်းပြင်းထန်ထန် ကန့်ကွက်

စက်တင်ဘာ ၂၅၊ ၂၀၁၈
M-Media

– ထိုင်ဝမ်နိုင်ငံကို ကန်ဒေါ်လာ သန်း ၃၃၀ တန်ဖိုးရှိတဲ့ စစ်လက်နက်ပစ္စည်းတွေ ရောင်းချဖို့အတွက် အမေရိကန်အစိုးရက မနေ့မှာ အတည်ပြုလိုက်ပြီး ဒီကိစ္စအတွက် တရုတ်က အပြင်းအထန် ကန့်ကွက်လိုက်ပါတယ်။

ထိုင်ဝမ်ဟာ ကိုယ်ပိုင်အုပ်ချုပ်ရေးရှိတဲ့ ဒေသတစ်ခုဖြစ်ပေမယ့် တရုတ်က သူ့ရဲ့ပိုင်နက်အဖြစ် မှတ်ယူထားတာ ဖြစ်ပါတယ်။

အမေရိကန်အစိုးရရဲ့ မနေ့က ကြေငြာချက်မှာ ထိုင်ဝမ်အနေနဲ့ F-16 တိုက်လေယာဉ်နဲ့ C-130 ကုန်တင်လေယာဉ်တွေအပါအ၀င် စစ်သုံးလေယာဉ်တော်တော်များများအတွက် အဆင့်မီ အပိုပစ္စည်းတွေ ရရှိမယ်လို့ ဖော်ပြထားပါတယ်။

တရုတ်က ဒီသဘောတူညီချက်ကို ပယ်ဖျက်ဖို့အတွက် ဒီကနေ့မှာ တောင်းဆိုလိုက်ပြီး မလိုက်နာဘူးဆိုရင် အမေရိကန်နဲ့ဆက်ဆံရေးကို ဆိုးဆိုးဝါးဝါး ထိခိုက်စေလိမ့်မယ်လို့ သတိပေးခဲ့သလို၊ ဒီလို လက်နက်တွေ ရောင်းချမှုဟာ တရုတ်ရဲ့ပြည်တွင်းရေးကို ၀င်ရောက်စွက်ဖက်တာဖြစ်ပြီး၊ နိုင်ငံရဲ့ အချုပ်အခြာအာဏာနဲ့ လုံခြုံရေးအကျိုးစီးပွားကို ထိုခိုက်စေတယ်လို့ ပြောကြားခဲ့ပါတယ်။

အစိုးရရဲ့ သဘောတူညီမှုကို အမေရိကန်လွှတ်တော်က ရက်ပေါင်း ၃၀ အတွင်း ပယ်ဖျက်နိုင်ပေမယ့် လက်ရှိမှာ ဒီလိုဖြစ်လာဖို့ မရှိတော့ပါဘူး။

အမေရိကန်ဟာ ထိုမ်ဝမ်ရဲ့ တရားဝင်မဟုတ်တဲ့ မဟာမိတ်နိုင်ငံတစ်ခုဖြစ်ပြီး လက်နက်တွေကို အဓိက ထောက်ပံ့နေပါတယ်။

၁၉၄၉ ခုနှစ်မှာ ထိုင်ဝမ်ဟာ တရုတ်ပြည်မကြီးကနေ ခွဲထွက်သွားခဲ့ပြီး တရုတ်က သူတို့ပိုင်နက်အဖြစ် ကြေငြာထားကာ၊ ပြည်မနဲ့ ပြန်ပေါင်းဖို့အတွက် စစ်တိုက်မယ်လို့လည်း ခြိမ်းခြောက်ထားပါတယ်။

Ref: Aljazeera