အင်ဒိုနီးရှား ဆူနာမီ သေဆုံးသူ ၄၀၀ နီးပါးရှိလာ

စက်တင်ဘာ ၂၉၊ ၂၀၁၈
M-Media

ဆူနာမီပြီးနောက် တွေ့ရသည့် အင်ဒိုပြည်သူများ

– အင်ဒိုနီးရှားနိုင်ငံ ဆူလာဝေစီကျွန်းမှာ မနေ့က ဖြစ်ပွားခဲ့တဲ့ ဆူနာမီရေလှိုင်းတွေ ရိုက်ခတ်မှုကြောင့် သေဆုံးသူအရေအတွက်ဟာ ၃၈၄ ဦး ရှိလာခဲ့ပြီး၊ ဒဏ်ရာရသူတွေလည်း အများအပြားရှိတယ်လို့ အာဏာပိုင်တွေက ပြောပါတယ်။

ဆူနာမီဒဏ် အခံစားရဆုံးဒေသက လူပေါင်း ၃ သိန်းခွဲလောက် နေထိုင်တဲ့ ပါလူမြို့ဖြစ်ပါတယ်။ သေဆုံးဒဏ်ရာရသူတွေ များပြားလွန်းတာကြောင့် ဆေးရုံတွေမှာလည်း နေရာတွေမလောက်မငှ ဖြစ်နေပါတယ်။

ပြင်းအား ၇.၅ မဂ္ဂနီကျုရှိတဲ့ ငလျင်တစ်ခု လှုပ်ခတ်ခဲ့ပြီးတဲ့နောက် ၅ ပေလောက်မြင့်တဲ့ ဆူနာမီလှိုင်းလုံးကြီးတွေဟာ ပါလူမြို့ကို ရိုက်ခတ်ခဲ့တာ ဖြစ်ပါတယ်။

သမ္မတ ဂျိုကိုဝီဒိုဒိုက ဆူနာမီဒဏ် ခံစားခဲ့ရတဲ့ ဒေသတွေမှာ ရှာဖွေကယ်ဆယ်ရေးတွေလုပ်ဖို့အတွက် စစ်တပ်ကို အမိန့်ပေးထားပါတယ်။

ဆူနာမီရေလှိုင်းတွေကြောင့် ပါလူမြို့က နေအိမ်တွေ၊ အဆောက်အဦးတွေ ပြိုကျပျက်ဆီးခဲ့ပြီး မြို့ရဲ့ အထင်ကရ တံတားကြီးတစ်ခုလည်း ကျိုးကျခဲ့ပါတယ်။

Ref: CNA