ဆေးဘက်ဆိုင်ရာ နိုဘယ်ဆုကို ဂျပန်နှင့် အမေရိကန်မှ သိပ္ပံပညာရှင် ၂ ဦး ရရှိ

အောက်တိုဘာ ၁၊ ၂၀၁၈
M-Media

ဟွန်ဂျို (၀ဲ) နှင့် အယ်လီဆန် (ယာ)

– ၂၀၁၈ ခုနှစ်အတွက် ဆေးဘက်ဆိုင်ရာ နိုဘယ်ဆုကို ကိုယ်ခံအားနဲ့ပတ်သက်တဲ့ သုတေသနတွေ လုပ်ဆောင်ခဲ့တဲ့ သိပ္ပံပညာရှင်နှစ်ဦးက ပူးတွဲ ရရှိသွားပါတယ်။

အမေရိကန် သိပ္ပံပညာရှင် ဂျိမ်းစ် အယ်လီဆန်နဲ့ ဂျပန်သိပ္ပံပညာရှင် တာဆူကို ဟွန်ဂျိုတို့ဖြစ်ပြီး သူတို့နှစ်ဦးဟာ သာမန် ကင်ဆာကုသနည်းတွေနဲ့မတူတဲ့ ကိုယ်ခံအားအခြေပြု နည်းလမ်းကို လေ့လာဖော်ထုတ်ခဲ့တာ ဖြစ်ပါတယ်။

“သူတို့နှစ်ဦးရဲ့ အရေးပါတဲ့ ရှာဖွေတွေ့ရှိမှုက ကင်ဆာတိုက်ဖျက်ရေးနယ်ပယ်မှာ မှတ်တိုင်တစ်ခုပါပဲ” လို့ နိုဘယ်ဆု ရွေးချယ်ရေးအဖွဲ့က ပြောကြားခဲ့ပါတယ်။

အသက် ၇၀ အရွယ် ရှိပြီဖြစ်တဲ့ အယ်လီဆန်က ဒီလိုရွေးချယ်ခံရမှုကို ဂုဏ်ယူတယ်လို့ ပြောကြားခဲ့ပါတယ်။

“ကျွန်တော့်ရဲ့ သုတေသနပြုမှုဟာ ဒီလောက်အထိ ဖြစ်လာလိမ့်မယ်လို့ ဘယ်တုန်းကမှ မထင်ထားခဲ့ပါဘူး။ (သူဖော်ထုတ်ခဲ့တဲ့) immune checkpoint blockade နည်းလမ်းနဲ့ ကုသလို့ ပျောက်ကင်းသွားတဲ့ ကင်ဆာလူနာတွေကို တွေ့ဆုံရတဲ့အခါ ကျွန်တော် တကယ့်ကို ကြည်နူးပီတိဖြစ်မိပါတယ်။ သူတို့ဟာ သိပ္ပံအခြေခံစွမ်းအားရဲ့ သက်သေအဖြစ် ရှင်သန်နေကြတာ ဖြစ်ပါတယ်”

ဟွန်ဂျိုက အသက် ၇၆ နှစ်အရွယ် ရှိပြီဖြစ်ပြီး သုတေသနလုပ်ငန်းကို ဆက်လက်လုပ်ဆောင်သွားမယ်လို့ ပြောကြားခဲ့ပါတယ်။

“ကိုယ်ခံအားအခြေပြု ကုသနည်းနဲ့ ကင်ဆာရောဂါသည်တွေကို အရင်ကထက်ပိုပြီး ကယ်တင်နိုင်ဖို့အတွက် သုတေသနကို ဆက်လုပ်သွားမှာပါ” လို့ အလုပ်လုပ်ကိုင်ရာ ကျိုတိုတက္ကသိုလ်မှာ ဟွန်ဂျိုက သတင်းထောက်တွေကို ပြောကြားခဲ့ပါတယ်။

နိုဘယ်ဆုရွေးချယ်ရေးအဖွဲ့က သုတေသနပညာရှင်တွေဟာ ကင်ဆာရောဂါကို တိုက်ဖျက်ရာမှာ ကိုယ်ခံစွမ်းအားကို အသုံးချရေးအတွက် နှစ်ပေါင်း ၁၀၀ ကျော်လောက် ကြိုးစားခဲ့ပြီး အယ်လီဆန်နဲ့ ဟွန်ဂျိုတို့လက်ထက်ကျမှ အောင်မြင်ခဲ့တာ ဖြစ်တယ်လို့ ထည့်သွင်းပြောဆိုခဲ့ပါတယ်။

Ref: PressTV