ကမ္ဘာ့အကြီးဆုံး ရေအောက်စားသောက်ဆိုင် လာမည့်နှစ်တွင် ဖွင့်လှစ်မည်

အောက်တိုဘာ ၃၊ ၂၀၁၈
M-Media

Under စားသောက်ဆိုင်၏ အနီးကပ်မြင်ကွင်း

– နော်ဝေနိုင်ငံတောင်ဘက်အစွန်းဆုံး North Sea ပင်လယ်အောက်မှာ ဆောက်လုပ်နေတဲ့ ကမ္ဘာ့အကြီးဆုံး ရေအောက် စားသောက်ဆိုင်ဟာ မကြာခင်မှာ ပြီးစီးတော့မှာဖြစ်ပြီး လာမယ့်နှစ်ဆန်းပိုင်းမှာ ဖွင့်လှစ်နိုင်မယ်လို့ သိရပါတယ်။

အဲဒီစားသောက်ဆိုင်ကို Under လို့ အမည်ပေးထားပြီး နော်ဝေက ထိပ်တန်း အဆောက်အဦး ဒီဇိုင်းအဖွဲ့ Snøhetta က ဒီဇိုင်းဆွဲပေးခဲ့တာ ဖြစ်ပါတယ်။ Snøhetta ဟာ အီဂျစ်နိုင်ငံ အလက်ဇန်းဒရီးယားမြို့က Bibliotheca၊ အော်စလိုမြို့ Opera House၊ အမေရိကန်ပြည်ထောင်စု နယူးယောက်မြို့က National September 11 Memorial Pavilion တို့လို နာမည်ကျော် အဆောက်အဦးတွေကို ဒီဇိုင်းထုတ်ပေးခဲ့တဲ့ အဖွဲ့လည်း ဖြစ်ပါတယ်။

ပေ ၁၁၀ လောက်ရှည်တဲ့ Under အဆောက်အဦးကို ကုန်းပေါ်မှာဆောက်လုပ်ကာ အခုနှစ် ဇူလိုင်လအတွင်းက ရေထဲ ချခဲ့တာဖြစ်ပြီး လက်ရှိမှာ အတွင်းပိုင်း အပြင်အဆင်တွေကို လက်စသတ်နေပါတယ်။ အဆောက်အဦးရဲ့ ထက်ဝက်ကျော်ကျော်ကို ရေထဲမှာ မြှုပ်ထားတာဖြစ်ကာ ဧည့်သည်တွေအနေနဲ့ ကမ်းကနေ မှန်တံတားနဲ့ စားသောက်ဆိုင်ထဲကို ၀င်နိုင်မှာ ဖြစ်ပါတယ်။

စားသောက်ဆိုင်ဟာ ၃ ဆင့်ရှိပြီး ဧည့်သည်ပေါင်း ၁၀၀ လောက်ကို တစ်ပြိုင်နက်တည်း ဧည့်ခံနိုင်မှာ ဖြစ်သလို ၁၁ မီတာကျယ်ဝန်းတဲ့ မှန်ကာပြတင်းပေါက်ကနေ ရေအောက် ပတ်ဝန်းကျင်ကို ကြည့်ရှုခံစားနိုင်မှာ ဖြစ်ပါတယ်။

အဆောက်အဦးကို လှိုင်ဒဏ်လေဒဏ်တွေ ခံနိုင်အောင် စမ်းသပ်ထားပါတယ်။ ၂၀၁၉ ခုနှစ် ဧပြီလမှာ ဧည့်သည်တွေ ကြိုတင်ဘိုကင် လုပ်လို့ရမှာ ဖြစ်ပါတယ်။

“ရာသီဥတုဆိုးဝါးတဲ့အချိန် လာရောက်လည်ပတ်ရင် စိတ်လှုပ်ရှားစရာအကောင်းဆုံး အတွေ့အကြုံကို ခံစားရမယ်လို့ ကျွန်တော် ထင်ပါတယ်။ စားသောက်ဆိုင်ထဲမှာ အန္တရာယ်ကင်းကင်းနဲ့ အေးအေးဆေးထိုင်ပြီး လှိုင်းလုံးကြီးတွေ၊ မိုးရွာသွန်းမှုတွေကြောင့် ပင်လယ်ကြမ်းပြင် ၀ရုန်းသုန်းကားဖြစ်တဲ့ သိပ်ကိုထူးခြားတဲ့ မြင်ကွင်းကို ကြည့်ရတာ တော်တော်လေး ကျေနပ်စရာ ကောင်းမှာပါ” လို့ Snøhetta က အကြီးတဲ့ ဗိသုကာပညာရှင် ရူနီ ဂရက်စ်ဒဲလ်က ပြောပါတယ်။

Ref: CNN