ဆိုက်ဘာတိုက်ခိုက်မှုအတွက် ရုရှားစစ်ထောက်လှမ်းရေး ၇ ဦးကို အမေရိကန် တရားစွဲ

အောက်တိုဘာ ၅၊ ၂၀၁၈
M-Media

– တားမြစ်ဆေးဆိုင်ရာ အေဂျင်စီတွေနဲ့ အခြားအဖွဲ့အစည်းတွေရဲ့ ကွန်ပျူတာစနစ်တွေထဲကို ထိုးဖောက်ဝင်ရောက်ခဲ့တယ်ဆိုတဲ့ စွဲချက်တွေနဲ့ အမေရိကန်က ရုရှား စစ်ထောက်လှမ်းရေး ၇ ဦးကို မနေ့က တရားစွဲဆိုလိုက်ပါတယ်။

အမေရိကန် အမျိုးသားလုံခြုံရေးဆိုင်ရာ လက်ထောက်ရှေ့နေချုပ် ဂျွန် ဒီမာက ရုရှားဟက်ကာတွေ တိုက်ခိုက်မှုလုပ်ခဲ့တဲ့ အဖွဲ့အစည်းတွေထဲမှာ နယ်သာလန်နိုင်ငံ သည်ဟေ့ဂ်မြို့အခြေစိုက် ဓာတုလက်နက် တိုက်ဖျက်ရေးအဖွဲ့ Prohibition of Chemical Weapons (OPCW)၊ ကမ္ဘာ့ဘောလုံးအဖွဲ့ချုပ် ဖီဖာ၊ အမေရိကန်အခြေစိုက် နိုင်ငံတကာ တားမြစ်ဆေး တိုက်ဖျက်ရေး အေဂျင်စီတွေ၊ အမေရိကန် နျူကလီးယားကုမ္ပဏီ Westinghouse တို့ ပါဝင်တယ်လို့ ပြောကြားခဲ့ပါတယ်။

ဆိုက်ဘာတိုက်ခိုက်မှုဟာ ရုရှားအစိုးရ ကျောထောက်နောက်ခံပြုထားတဲ့ အားကစားသမားတွေ တားမြစ်ဆေးသုံးစွဲမှုအစီအစဉ်ကို ဖော်ထုတ်တဲ့ တာဝန်ရှိသူတွေကို သိရှိနိုင်ဖို့၊ တားမြစ်ဆေး တိုက်ဖျက်ရေးအဖွဲ့တွေကို နာမည်ဖျက်ဖို့ ရည်ရွယ်တယ်လို့ဆိုကာ အမေရိကန် တရားရေးဌာနက တရားစွဲခဲ့တာ ဖြစ်ပါတယ်။

တရားစွဲဆိုမှုတွေထဲမှာ ငွေကြေးခ၀ါချမှု၊ Bitcoin လို ဒစ်ဂျစ်တယ်ငွေကြေးတွေ အသုံးပြုမှု၊ လိမ်လည်မှု၊ တစ်ခြားသူတွေရဲ့ စာရွက်စာတမ်းတွေ ခိုးယူမှုလည်း ပါဝင်ပါတယ်။

ဂျွန်ဒီမာက ရန်ညှိုးထားပြီး၊ နာမည်ဖျက်ဖို့ရည်ရွယ်တဲ့ ဆိုက်ဘာတိုက်ခိုက်မှု၊ လွှမ်းမိုးဖို့ ကြိုးစားမှုတွေကို အမေရိကန်နဲ့ မဟာမိတ်နိုင်ငံတွေက ထိထိရောက်ရောက် တားဆီးအရေးယူသွားမယ်ဆိုတာကို ရုရှားနဲ့ အခြားနိုင်ငံတွေက နားလည်ထားကြဖို့ လိုတယ်လို့ ပြောကြားခဲ့ပါတယ်။

တစ်ခြားနိုင်ငံတွေလည်း ဖော်ထုတ်

နယ်သာလန်နိုင်ငံက သူတို့ဟာ ဧပြီလအတွင်းမှာ OPCW ကို ရုရှားထောက်လှမ်းရေးအေးဂျင့်တွေက ဟက်ဖို့ ကြိုးစားမှုကို တားဆီးနိုင်ခဲ့တယ်လို့ မနေ့က ထုတ်ပြန်ခဲ့ပါတယ်။

အားကစား၊ သယ်ယူပို့ဆောင်ရေးနဲ့ ၂၀၁၆ ခုနှစ် အမေရိကန်သမ္မတ ရွေးကောက်ပွဲတွေမှာ ရှုပ်ထွေးမှုတွေ ဖြစ်ပွားအောင်လုပ်ကာ အနောက်နိုင်ငံတွေရဲ့ ဒီမိုကရေစီ ပျက်ဆီးအောင်ရည်ရွယ်တဲ့ ဆိုက်ဘာတိုက်ခိုက်မှုတွေလုပ်ဖို့ ရုရှားရဲ့ GRU စစ်ဖက်အေဂျင်စီတစ်ခုက ညွှန်ကြားခဲ့တယ်လို့ ယူကေက အခုရက်ပိုင်းအတွင်း စွပ်စွဲထားပါတယ်။

သည်ဟေ့ဂ်မှာပြုလုပ်တဲ့ သတင်းစာရှင်းလင်းပွဲမှာ ဒက်ခ်ျ ကာကွယ်ရေးဝန်ကြီး အန့် ဘစ်ဂ်ျလေဗယ်က အနောက်နိုင်ငံတွေရဲ့ ဒီမိုကရေစီ ပျက်စီးအောင် ရည်ရွယ်တဲ့ ဆိုက်ဘာတိုက်ခိုက်မှုတွေကို ရပ်တန့်ဖို့ ရုရှားကို ဆော်သြခဲ့ပါတယ်။

Ref: Aljazeera