ရခိုင်ကိစ္စ ပိုမို ပွင့်လင်းမြင်သာစွာ ဆောင်ရွက်မည်ဟု ဒေါ်အောင်ဆန်းစုကြည်ပြော

အောက်တိုဘာ ၈၊ ၂၀၁၈
M-Media

– ရခိုင်ပြည်နယ်က ပြဿနာကို အစိုးရရဲ့ ကိုင်တွယ်မှုမှာ ပိုမို ပွင့်လင်းမြင်သာမှုရှိအောင် လုပ်ဆောင်သွားမယ်လို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားလိုက်ပြီး နိုင်ငံခြားရင်းနှီးမြှုပ်နှံမှုတွေကို ဆွဲဆောင်သွားမယ်လို့လည်း ဆိုပါတယ်။

ဂျပန်နဲ့ အရှေ့တောင်အာရှ ခေါင်းဆောင်တွေ ပြုလုပ်မယ့် ထိပ်သီးအစည်းအဝေးကို တက်ရောက်ဖို့အတွက် ဂျပန်နိုင်ငံကို ရောက်ရှိနေတဲ့ ဒေါ်အောင်ဆန်းစုကြည်က ဒီကနေ့ ဂျပန်စီးပွားရေးလုပ်ငန်းရှင်တွေနဲ့ တွေ့ဆုံပွဲမှာ အခုလို ပြောကြားခဲ့တာ ဖြစ်ပါတယ်။

“အထူးသဖြင့် ရခိုင်ကိစ္စနဲ့ပတ်သက်ပြီး စိန်ခေါ်မှုတွေရှိနေတာ၊ ငြိမ်းချမ်းရေးကြိုးစားမှုမှာ ရုန်းကန်နေရတာတွေကို ကျွန်မ ၀န်ခံပါတယ်။ ကျွန်မတို့ရဲ့မိတ်ဆွေတွေကို ဒီအချက်တွေ ဖုံးမထားပါဘူး”

နိုင်ငံခြားရင်းနှီးမြှုပ်မှုတွေကို စွဲဆောင်ဖို့အတွက် တိုင်ပြည် ငြိမ်းချမ်းဖို့ တည်ငြိမ်ဖို့ လိုအပ်တယ်ဆိုတာကို နားလည်တယ်လို့လည်း ဒေါ်အောင်ဆန်းစုကြည်က ထည့်သွင်း ပြောဆိုခဲ့ပါတယ်။

“ရင်းနှီးမြှုပ်နှံမှုတွေ ပိုလိုချင်တယ်၊ စီးပွားရေး အခွင့်အလမ်း ပိုရချင်တယ်ဆိုရင် ငြိမ်းချမ်းရေး၊ ရင်ကြားစေ့ရေး၊ သဟာဇတဖြစ်ရေး၊ တည်ငြိမ်အေးချမ်းရေး၊ တရားဥပဒေ စိုးမိုးရေး၊ လူ့အခွင့်အရေး – ဒါတွေအားလုံးကို ထည့်သွင်းစဉ်းစားရမယ်ဆိုတာ ကျွန်မတို့ နားလည်ပါတယ်။ ကျွန်မတို့ မိတ်ဆွေတွေကို ပွင့်လင်းမြင်သာစွာ ဆက်ဆံချင်ပါတယ်။ ရှင်တို့မှာ စိုးရိမ်မှုတွေရှိမယ်၊ ကြောင့်ကြမှုတွေရှိမယ်ဆိုရင် ကျွန်မတို့နဲ့ ပွင့်ပွင့်လင်းလင်း ဆွေးနွေးလို့ ရပါတယ်”

နိုင်ငံတော်အတိုင်ပင်ခံပုဂ္ဂိုလ်ဟာ မနက်ဖြန်မှာ ဂျပန်ဝန်ကြီးချုပ် ရှင်ဇိုအာဘေးနဲ့ ဆွေးနွေးဖို့ ရှိနေပါတယ်။

Ref: AFP