တရုတ်ထံမှ ဒရုန်းများနှင့် ဒရုန်းနည်းပညာကို ပါကစ္စတန်က ၀ယ်ယူ

အောက်တိုဘာ ၉၊ ၂၀၁၈
M-Media

ပါကစ္စတန်က ၀ယ်ယူခဲ့သည့် Wing Loong II အမျိုးအစား ဒရုန်း

– ပါကစ္စတန်ဟာ တရုတ်နိုင်ငံကနေ ဘက်စုံသုံး မောင်းသူမဲ့ ဒရုန်းလေယာဉ် ၄၈ စင်း ၀ယ်ယူခဲ့ပြီး ဒါဟာ တရုတ်လေကြောင်း လုပ်ငန်းတွေအတွက်
အကြီးမားဆုံး အရောင်းအ၀ယ်ဖြစ်တယ်လို့ ကွန်မြူနစ်ပါတီ အာဘော်သတင်းစာ Global Times က ဖော်ပြခဲ့ပါတယ်။

ပါကစ္စတန်လေတပ်ရဲ့ Sherdils Aerobatic အဖွဲ့က ဒရုန်းတွေ ၀ယ်ယူမှုကို Facebook စာမျက်နှာမှာ အတည်ပြုခဲ့ပြီး တန်ဖိုး ဘယ်လောက်ရှိတယ်ဆိုတာကို မဖော်ပြထားပါဘူး။ ဒါပေမယ့်တရုတ်နိုင်ငံပိုင် လေကြောင်းလုပ်ငန်းအနေနဲ့ ဈေးကို တော်တော်လေး လျှော့ချပေးခဲ့တယ်လို့ ယုံကြည်ရပါတယ်။

ဒရုန်းဆိုင်ရာ နည်းပညာတွေ လွှဲပြောင်းပေးရေး နားလည်မှုစာချွန်လွှာတစ်ရပ်ကို လက်မှတ်ထိုးပြီး ရင် နောက်ပိုင်းမှာ ပါကစ္စတန်လေကြောင်းပစ္စည်း ထုတ်လုပ်ရေးလုပ်ငန်း Pakistan Aeronautical Complex နဲ့ တရုတ်ဒရုန်းကုမ္ပဏီတို့ ပူးပေါင်းကာ ပါကစ္စတန်နိုင်ငံမှာ ဒရုန်းတွေ ထုတ်လုပ်သွားဖို့ရှိတယ်လို့ Sherdils Aerobatic က ထည့်သွင်းရေးသားခဲ့ပါတယ်။

ပါကစ္စတန်က ၀ယ်ယူခဲ့တဲ့ ဒရုန်းတွေဟာ ၂၀၁၇ ခုနှစ်က ထုတ်ုလပ်ခဲ့တဲ့ Wing Loong II အမျိုးသားအဖြစ်ပြီး ထောက်လှမ်းရေး၊ တိုက်ခိုက်ရေး စသဖြင့် ဘက်စုံသုံးနိုင်ပါတယ်။ တရုတ်နိုင်ငံပိုင် လေကြောင်းလုပ်ငန်းဟာ ပညာရှင်တွေကို ပါကစ္စတန်လွှတ်ပြီး ထုတ်လုပ်ရေးလုပ်ငန်းတွေ စမ်းသပ်ဖော်ဆောင်ဖို့လည်း ရှိနေပါတယ်။

ပါကစ္စတန်က Wing Loong II ဒရုန်း ၄၈ စီး ၀ယ်ယူခဲ့တာ မှန်မယ်ဆိုရင် ဒါဟာ လက်ရှိအချိန်အထိ တရုတ်နိုင်ငံက အကြီးမားဆုံး ဒရုန်းရောင်းချမှုဖြစ်တယ်လို့ တရုတ်စစ်ရေးကိစ္စတွေကို စောင့်ကြည့်နေတဲ့ Song Zhongping က ပြောကြားခဲ့ပါတယ်။

တရုတ်လွတ်မြောက်ရေးတပ်ဖွဲ့ဟာ ဒရုန်းတပ်ခွဲကို ဖွဲ့စည်းလိုက်တယ်လို့ ၂၀၁၇ ခုနှစ် နိုဝင်ဘာလမှာ တရုတ်မီဒီယာတွေက ဖော်ပြခဲ့ပါတယ်။

တရုတ်နိုင်ငံက ထုတ်လုပ်တဲ့ ဒရုန်းတွေကို အီရတ်နဲ့ ဆော်ဒီအာရေဗျအပါအ၀င် အခြားနိုင်ငံတွေကလည်း ၀ယ်ယူဖို့ ကမ်းလှမ်းမှုတွေ ရှိနေပါတယ်။

Ref: Asia Times