တစ်ဖက်ကစော်ကားလျှင် တုန့်ပြန်တတ်သည်မှာ ဓမ္မတာဟု ခါဘစ်ကို ပူတင် နှစ်သိမ့်

အောက်တိုဘာ ၁၁၊ ၂၀၁၈
M-Media

ပူတင်နှင့် ခါဘစ်တို့သားအဖ တွေ့ဆုံစဉ်

– မိမိကိုစော်ကားလာရင် လက်တုန့်ပြန်တတ်သည်မှာ ဓမ္မတာပင်ဖြစ်ပြီး တစ်ခြားလူများလည်း ၎င်းကဲ့သို့ပင် လက်တုန့်ပြန်ကြလိမ့်မယ်လို့ ရုရှားသမ္မတ ပူတင်က MMA တိုက်ခိုက်ရေးသမား ခါဘစ် နူမာဂိုမီဒေါ့ဗ်ကို အားပေးနှစ်သိမ့်ခဲ့ပါတယ်။

ရုရှားနိုင်ငံသား ခါဘစ်ဟာ စနေနေ့က လက်စ်ဗီးဂက်စ်မှာ ကျင်းပခဲ့တဲ့ လိုက်ဝိတ်တန်း ချန်ပီယံကာကွယ်ပွဲမှာ အိုင်ယာလန်နိုင်ငံသား ကိုနာ မက်ဂရီဂေါ်ကို
၎ ချီမြောက်မှာ ချုပ်ကွက်နဲ့ အနိုင်ရခဲ့ပြီး ရှုံးပွဲမရှိစံချိန်နဲ့ ချန်ပီယံဘွဲ့ကို ဆက်ထိန်းနိုင်ခဲ့ပါတယ်။ ပွဲအပြီးမှာ ခါဘစ်ဟာ ကြိုးဝိုင်းကိုကျော်ကာ ဂရီဂေါ်ရဲ့ အသင်းသားတွေကို သွားရောက် ထိုးကြိတ်ခဲ့တဲ့အတွက် ဝေဖန်မှုတွေလည်း ခံခဲ့ရပါတယ်။

မက်ဂရီဂေါ်အနေနဲ့ သူ့ရဲ့နိုင်ငံ၊ ဘာသာနဲ့ မိဘတို့ကို စော်ကားမှုတွေ ပြုလုပ်ခဲ့တဲ့အတွက် ပေါက်ကွဲခဲ့တာဖြစ်ကြောင်း၊ ဒီအတွက် ပရိသတ်တွေနဲ့ ပြိုင်ပွဲစီစဉ်သူတွေကို တောင်းပန်ကြောင်း ပွဲအပြီးမှာ ခါဘစ်က ပြောကြားခဲ့ပါတယ်။

ရုရှားသမ္မတ ပူတင်က ဘယ်သူမဆို အစော်ကားခံလာရရင် ဒီလို တုန့်ပြန်ကြမှာဖြစ်တယ်လို့ မနေ့က ခါဘစ်တို့သားအဖနဲ့ တွေ့ဆုံမှုအတွင်း ပြောကြားခဲ့ပါတယ်။

“အပြင်လူက ငါတို့ကို တိုက်ခိုက်လာရင် – မင်းမှမဟုတ်ဘူး ငါတို့လည်း အဲဒီလို ကြိုးဝိုင်းကိုကျော်ပြီး အဲဒီလူကို ပညာပေးပစ်မှာ။ ဒါပေမယ့် အဲဒီလိုအဆင့်မျိုး မရောက်တာက ပိုကောင်းတာပေါ့ကွာ”

ပူတင်က ခါဘစ်ရဲ့အောင်မြင်မှုအတွက် ဂုဏ်ယူကြောင်းလည်း ပြောကြားခဲ့ပါတယ်။

တနင်္လာနေ့က မွေးရပ်မြေ ဒါဂျက်စတန်ကို ပြန်လာရာမှာ ပြည်သူတွေက ခါဘစ်ကို သောင်းသောင်းဖျဖျ ကြိုဆိုခဲ့ကြပါတယ်။

Ref: RT