မန်ယူအသင်းကို ၀ယ်ယူရန် ဆော်ဒီအိမ်ရှေ့မင်းသား စိတ်ဝင်စားနေ

အောက်တိုဘာ ၁၆၊ ၂၀၁၈
M-Media

ဆော်ဒီအိမ်ရှေ့မင်းသား မိုဟာမက် ဘင် ဆလ်မန်

– နိုင်ငံရဲ့ စီးပွားရေးကို ပိုမိုမျှတအောင် ဆောင်ရွက်မှု တစ်စိတ်တစ်ပိုင်းအဖြစ် အင်္ဂလန်ပရီးမီးယားလိဂ် ထိပ်သီးကလပ် မန်ချက်စတာ ယူနိုက်တက်အသင်းကို ၀ယ်ယူဖို့ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က စိတ်ဝင်စားနေတယ်လို့ ဗြိတိန်မီဒီယာတစ်ခုက မနေ့မှာ ဖော်ပြခဲ့ပါတယ်။

ဥရောပ ဘောလုံးနယ်ပယ်မှာ ရင်းနှီးမြှုပ်နှံမှုတွေလုပ်ထားတဲ့ ကာတာနဲ့ ယူအေအီးက စီးပွားရေးသမားတွေလိုပဲ ဆော်ဒီ တော်ဝင် မိသားစုကလည်း ရင်းနှီးမြှုပ်နှံမှုတွေ ဆောင်ရွက်ချင်နေတာပါ။

ကာတာက လုပ်ငန်းရှင်တွေဟာ ပြင်သစ်လီဂူး ထိပ်သီးကလပ် ပီအက်စ်ဂျီကို ၂၀၁၂ ခုနှစ်မှာ ၀ယ်ယူခဲ့ပြီး ဒေါ်လာဘီလီယံချီ သုံးစွဲကာ အောင်မြင်မှုရအောင် လုပ်ဆောင်နိုင်ခဲ့ပါတယ်။ ကာတာဟာ ၂၀၂၂ ခုနှစ် ကမ္ဘာ့ဖလားကိုလည်း လက်ခံကျင်းပဖို့ ရှိနေပါတယ်။

ယူအေအီးဘီလီယံနာ ရှိခ် မန်ဆူရ် ဘင် ဇေယဒ်ဟာ ၂၀၀၈ ခုနှစ်မှာ မန်ချက်စတာစီးတီးအသင်းကို ပေါင် သန်း ၂၁၀ နဲ့ ၀ယ်ယူခဲ့ပြီး ၂၀၁၈ ခုနှစ်မှာ အသင်းရဲ့တန်ဖိုးဟာ ပေါင် ၂ ဘီလီယံ ရှိလာခဲ့ပါတယ်။

မန်ချက်စတာယူနိုက်တက်အသင်းကို လက်ရှိမှာ အမေရိကန်သူဌေး ဂလေဇာ မိသားစုက ပိုင်ဆိုင်တာဖြစ်ပြီး ဘင် ဆလ်မန်အနေနဲ့ ၀ယ်ယူမယ်ဆိုရင် ပေါင် ၄ ဘီလီယံ လောက် ပေးရဖို့ ရှိနေပါတယ်။

မန်ယူဟာ ဆော်ဒီနဲ့ ရေရှည်ဆက်ဆံရေးတစ်ခု တည်ဆောက်ထားပြီး နိုင်ငံရဲ့ ဘောလုံးကဏ္ဍ တိုးတက်ရေး ကူညီဖို့အတွက် ပြီးခဲ့တဲ့နှစ်မှာ ဆော်ဒီအားကစားအာဏာပိုင်အဖွဲ့နဲ့ နားလည်မှုစာချွန်လွှာတစ်ခုကို လက်မှတ်ရေးထိုးခဲ့ပါတယ်။

အသင်းရဲ့ ပူးတွဲဥက္ကဌ အဗ်ရမ် ဂလေဇာဟာ လာမယ့်သီတင်းပတ် ဆော်ဒီမှာပြုလုပ်မယ့် Davos in the Desert အစည်းအဝေးကို တက်ရောက်ဖို့ရှိနေပြီး အိမ်ရှေ့မင်းသား မိုဟာမက် ဘင် ဆလ်မန်နဲ့ တွေ့ဆုံဖို့ရှိနေတယ်လို့လည်း သတင်းထွက်နေပါတယ်။ ဒါပေမယ့် တရားဝင် ထုတ်ပြန်မှုတော့ မရှိသေးပါဘူး။

Ref : Press TV