လေထဲမှ သောက်ရေထုတ်နိုင်သည့်စက်ကို အမေရိကန်အဖွဲ့တစ်ခု တီထွင်

အောက်တိုဘာ ၂၆၊ ၂၀၁၈
M-Media

Skywater စက်

– အမေရိကန်ပြည်ထောင်စု ကယ်လီဖိုးနီးယားပြည်နယ် အခြေစိုက် အဖွဲ့တစ်ခုဟာ လေထုထဲကနေ တစ်နေ့ကို ဂါလန် ၃၀၀ လောက် သောက်ရေထုတ်လုပ်နိုင်တဲ့စက်တစ်ခုကို တီထွင်ခဲ့ပြီး၊ နိုင်ငံတကာရဲ့ အသိအမှတ်ပြုမှုကိုလည်း ရရှိခဲ့ပါတယ်။

Skywater လို့ အမည်ပေးထားတဲ့ အဲဒီ သောက်ရေသန့်စက်ဟာ လေထုထဲကနေ ရေငွေ့တွေကို ယူကာ သိပ်သည်းစေပြီး သောက်ရေသန့်အဖြစ် ပြောင်းပေးတာ ဖြစ်ပါတယ်။ အိမ်သုံး၊ လယ်ယာသုံးနဲ့ အရေးပေါ် ကယ်ဆယ်ရေးသုံးဆိုပြီး မော်ဒယ် ၃ ခု ခွဲထားကာ နေစွမ်းအင်၊ ဒါမှမဟုတ် ဓာတ်ဆီ၊ ဒီဇယ်တွေနဲ့ စွမ်းအင်ပေးကာ သုံးစွဲနိုင်ပါတယ်။

ဒီစက်ကို တီထွင်ခဲ့တဲ့ Skysource/Skywater Alliance အဖွဲ့ဟာ စနေနေ့က ဆုကြေး ကန်ဒေါ်လာ တစ်သန်းခွဲ ချီးမြှင့်တဲ့ Water Abundance XPRIZE ဆုကို ရရှိခဲ့ပါတယ်။ ကမ္ဘာပေါ်မှာ ကြုံတွေ့နေရတဲ့ ရေပြဿနာကို ဖြေရှင်းနိုင်တဲ့ နည်းလမ်းတွေ ဖော်ထုတ်သူကို ဆုချီးမြှင့်လေ့ရှိတဲ့ ကယ်လီဖိုးနီးယားအခြေစိုက် XPRIZE အဖွဲ့က ဒီဆုကို ချီးမြှင့်တာ ဖြစ်ပါတယ်။

Water Abundance XPRIZE ဆုရဖို့အတွက် ၂ နှစ်တာ ယှဉ်ပြိုင်ရပြီး နည်းပညာအသစ်တွေနဲ့ ရေပြဿနာကိုဖြေရှင်းရေး နည်းလမ်းတွေ တီထွင်ဖန်တီးကြရတာ ဖြစ်ပါတယ်။

ကမ္ဘာကြီးမှာ ရေရှားပါးလာတဲ့အချိန် သူတို့ရဲ့စက်နဲ့ လူတွေကို ကူညီပေးနိုင်တဲ့အတွက် ကျေနပ်ပီတိဖြစ်ရတယ်လို့ Skysource/Skywater Alliance အဖွဲ့ရဲ့ တာဝန်ရှိသူ ဒေးဗစ်ဟာ့ဇ်က ပြောကြားခဲ့ပါတယ်။

“ကျွန်တော် ရေကိစ္စမှာ တော်တော်လေးကို စိတ်ဝင်စားသွားတာ။ လူသားတွေအတွက် သန့်ရှင်းတဲ့ သောက်သုံးရေ အရေးကြီးပုံကိုလည်း ကျွန်တော် နားလည်သွားတယ်။ ကယ်လီဖိုးနီးယားမှာ နေရတဲ့အတွက်ကြောင့် ရေပြဿနာကို ရင်ဆိုင်ရမယ့်အခြေအနေက နီးသထက် နီးလာပါတယ်”

ဟာ့ဇ်က သူတို့တီထွင်တဲ့စက်က ထုတ်နိုင်တဲ့ ရေပမာဏထက်ကိုပိုပြီး လေထုထဲမှာ ရေငွေ့တွေ ရှိနေတယ်လို့လည်း ပြောကြားခဲ့ပါတယ်။

Ref: CNN