သီရိလင်္ကာနိုင်ငံ၏ နိုင်ငံရေးမငြိမ်သက်မှု ပိုဆိုးလာပြီး သွေးထွက်သံယိုဖြစ်မည်ဟု သတိပေးမှုများ ရှိနေ

အောက်တိုဘာ ၂၉၊ ၂၀၁၈
M-Media

– သမ္မတ မိုင်သရီပါလာ ဆရီဆီနာက ၀န်ကြီးချုပ် ရာနီးလ် ၀စ်ကရီမီဆင်ဟီကို ထုတ်ပယ်ခဲ့ပြီးတဲ့နောက် သီရိလင်္ကာနိုင်ငံမှာ ဖြစ်ပွားနေတဲ့ နိုင်ငံရေးတင်းမာမှုတွေဟာ အရှိန်မြင့်လာခဲ့ပြီး သွေးထွက်သံယိုမှုတွေ ဖြစ်ပွားမယ်ဆိုတဲ့ သတိပေးမှုတွေ ရှိလာခဲ့ပါတယ်။

ရာနီးလ်ဟာ စီးပွားရေး စီမံခန့်ခွဲမှု ညံ့ဖျင်းကာ သူ့ကို လုပ်ကြံဖို့လည်း ကြိုးစားခဲ့တယ်လို့ဆိုကာ ဆရီဆီနာဟာ သောကြာနေ့မှာ ထုတ်ပယ်ခဲ့တာပါ။ အဲဒီနောက် သမ္မတဟောင်း မာဟင်ဒါ ရာဂျာပက်စကာကို ၀န်ကြီးချုပ်အဖြစ် ခန့်အပ်ခဲ့ပြီး ဒါဟာ အခြေခံဥပဒေကို ကျော်လွန်ရာ ရောက်နေတာကြောင့် ဆရီဆီနာတစ်ယောက် ဝေဖန်မှုတွေ ခံနေရပါတယ်။

ရာနီလ်ကိုထောက်ခံတဲ့ လွှတ်တော်အမတ်တွေက ဆရီဆီနာဟာ အာဏာသိမ်းလိုက်တာဖြစ်ပြီး ပြည်သူတွေအနေနဲ့ ဆန္ဒပြကြဖို့ ဒီကနေ့မှာ တိုက်တွန်းခဲ့ပါတယ်။

လွှတ်တော်ဥက္ကဌ ကာရူ ဂျာယာဆူရီယာက လူတွေ လမ်းပေါ်ထွက်လာရင် သွေးထွက်သံယို ဖြစ်လိမ့်မယ်လို့ သတိပေးခဲ့ပြီး ဒီပြဿနာကို လွှတ်တော်ကနေ ဖြေရှင်းဖို့ သမ္မတကို တိုက်တွန်းခဲ့ပါတယ်။

“လမ်းပေါ်ထွက်ရင် သွေးချောင်းစီးမှာပဲဗျ” လို့ လွှတ်တော်ဥက္ကဌက ပြောကြားခဲ့ပါတယ်။

သမ္မတကိုထောက်ခံတဲ့သူတွေရဲ့ မနေ့က ဆန္ဒပြမှုအတွင်း ရေနံဝန်ကြီးရဲ့ သက်တော်စောင့်က သေနတ်ထုတ်ပစ်တဲ့အတွက် ၁ ဦးသေဆုံးခဲ့ပါတယ်။ နိုင်ငံခြားတိုင်းပြည်တွေကလည်း သီရိလင်္ကာနိုင်ငံကို မသွားရောက်ဖို့အတွက် သတိပေးချက်တွေ ထုတ်ပြန်ထားပါတယ်။

ဆရီဆီနာဟာ ၀န်ကြီးတစ်ချို့ကိုလည်း ဖမ်းဆီးထိန်းသိမ်းထားပြီး ဒီအတွက် ပြည်သူတွေက မကျေမနပ် ဖြစ်နေကြပါတယ်။

Ref: Aljazeera