ဘာသာရေးကိုခုတုံးလုပ်၍ ဆူပူဆန္ဒပြသူ ၁၅၀ ကျော်ကို ပါကစ္စတန် ဖမ်းဆီး

နိုဝင်ဘာ ၄၊ ၂၀၁၈
M-Media

အာဆီယာဘီဘီ၏ ဓာတ်ပုံဖြင့် ဆန္ဒပြမှု

– အစ္စလာမ်ဘာသာကို စော်ကားတယ်ဆိုပြီး သေဒဏ်ပေးခံထားရတဲ့ ခရစ်ယာန်အမျိုးသမီး အာဆီယာ ဘီဘီကို တရားရုံးချုပ်က တရားသေလွှတ်ပေးမှုနဲ့ပတ်သက်ပြီး မကျေနပ်တာကြောင့် ဆန္ဒပြသူတွေထဲက ၁၅၀ ကျော်ကို ဖမ်းဆီးထားတယ်လို့ ပါကစ္စတန်ရဲတပ်ဖွဲ့က ထုတ်ပြန်ပါတယ်။

အာဆီယာဟာ ၂၀၀၉ ခုနှစ်က မွတ်စလင်အမျိုးသမီး ၂ ဦးနဲ့ သောက်ရေခွက်ကိစ္စ စကားများရာကနေ နောက်ပိုင်းမှာ တမန်တော်မိုဟာမက်ကို စော်ကားပြောဆိုတယ်ဆိုပြီး သာသနာညှိုးနွမ်းစေမှုနဲ့ တရားစွဲဆို ခံရတာ ဖြစ်ပါတယ်။ ၂၀၁၀ ခုနှစ် နိုဝင်ဘာလမှာ တော့ အာဆီယာကို တရားရုံးက သေဒဏ်ပေးခဲ့ပါတယ်။

ဒီကိစ္စကို ပါကစ္စတန်တရားရုံးချုပ်က ပြန်လည်စစ်ဆေးရာမှာ အာဆီယာဟာ မျှမျှတတ တရားရင်ဆိုင်ခွင့် မရခဲ့ပဲ၊ အမှန်တရားကိုလည်း မဖော်ထုတ်နိုင်ဘူး ဆုံးဖြတ်ဖြတ်ကာ အာဆီယာကို ဗုဒ္ဓဟူးနေ့မှာ လွှတ်ပေးခဲ့ပါတယ်။

ဒါပေမယ် လက်ယာနိုင်ငံရေးပါတီတစ်ခု ဦးဆောင်ကာ နိုင်ငံတစ်ဝှမ်း ဆန္ဒပြမှုတွေ ပြုလုပ်ခဲ့ပြီး လမ်းတွေပိတ်ဆို့တာ ကား၊ အဆောက်အဦး မီးရှို့တာတွေ လုပ်ဆောင်ခဲ့ပါတယ်။

ပါကစ္စတန်ရဲဌာနက အကြီးတန်းတာဝန်ရှိသူ နယဘ်ဟိုင်ဒါကာ ဒီလိုတိုက်ခိုက်မှုတွေမှာ ပါဝင်တဲ့သူတွေကို ဗီဒီယိုမှတ်တမ်းတွေကိုကြည့်ကာ လိုက်လံ ရှာဖွေနေတယ်လို့ ပြောကြားခဲ့ပါတယ်။

ပါကစ္စတန်အစိုးရဟာ အာဆီယာဘီဘီကို နိုင်ငံအတွင်းကနေ ထွက်ခွာခွင့်မပေးဘူးလို့ ဆန္ဒပြခေါင်းဆောင်တွေကို ကတိပေးကာ ဆန္ဒပြမှုကို ရပ်တန့်အောင် ကြိုးစားခဲ့ပါတယ်။

Ref: Arab News