သေဒဏ်မှ တရားသေ လွတ်လာခဲ့သည့် အာဆီယာဘီဘီကို ပါကစ္စတန်က ထောင်မှလွှတ်

နိုဝင်ဘာ ၈၊ ၂၀၁၈
M-Media

– တမန်တော်မိုဟာမက်ကို စော်ကားတယ်ဆိုတဲ့စွဲချက်နဲ့ သေဒဏ်ကျခံနေရာကနေ တရားသေလွတ်မြောက်လာတဲ့ ခရစ်ယာန်အမျိုးသမီး အာဆီယာဘီဘီကို ပါကစ္စတန်အစိုးရက မနေ့မှာ ထောင်ကနေ လွှတ်ပေးလိုက်ပြီး၊ လုံခြုံရာနေရာတစ်ခုကို ပို့ဆောင်ပေးခဲ့တယ်လို့ သိရပါတယ်။

“သူလွတ်လာပါပြီ။ သူမလေယာဉ်ပေါ်မှာလို့ ကျွန်တော်သိရတယ်။ ဘယ်မှာ ဆင်းသက်မလဲဆိုတာကို ဘယ်သူမှ မသိပါဘူး” လို့ ရှေ့နေ ဆိုက်ဖွလ်မာလွတ်က ပြောကြားခဲ့ပါတယ်။

ပါကစ္စတန်အစိုးရရဲ့ အကြီးတန်းတာဝန်ရှိသူနှစ်ဦးက အသက် ၅၃ နှစ်အရွယ် အာဆီယာကို လုံခြုံရေးအရ ထိန်းသိမ်းထားရာ နေရာကနေ မြို့တော်အစ္စလာမ်မာဘတ်က နေရာတစ်ခုကို ပြောင်းရွှေ့ပေးခဲ့တယ်လို့ AP သတင်းဌာနကို ပြောကြားခဲ့ပါတယ်။ နိုင်ငံအလယ်ပိုင်း မူလ်တန်မြို့က အာဆီယာဘီဘီကို ချုပ်နှောင်ထားရာ အကျဉ်းထောင် တာဝန်ရှိသူတစ်ဦးက လွှတ်မိန့်ကို မနေ့က ရရှိခဲ့တယ်လို့ အတည်ပြုခဲ့ပါတယ်။

အာဆီယာဟာ ၂၀၀၉ ခုနှစ်က မွတ်စလင်အမျိုးသမီးနှစ်နဲ့ ရေခွက်ကိစ္စ စကာများရာကနေ တမန်တော်မိုဟာမက်ကို စော်ကားတယ်လို့ စွပ်စွဲခံရကာ သာသနာညှိုးနွမ်းစေမှုနဲ့ တရားစွဲဆိုခံခဲ့ရပြီး သေဒဏ်ချမှတ်ခံခဲ့ရပါတယ်။

ဒါပေမယ့် ပါကစ္စတန်တရားရုံးချုပ်က အမှုကို ပြန်လည်သုံသပ်ရာမှာ အာဆီယာဘီဘီဟာ တရားမျှတစွာ အမှုရင်ဆိုင်ခွင့်မရခဲ့ဘဲ၊ အမှန်တရားကို တရားရုံးက ဖော်ထုတ်နိုင်ခြင်းမရှိဘူးလို့ ဆုံးဖြတ်ကာ ပြီးခဲ့တဲ့တစ်ပတ်မှာ တရားသေ လွှတ်ပေးခဲ့ပါတယ်။

လက်ယာသမားတွေက ဒါကို မကျေနပ်တဲ့အတွက် နိုင်ငံတစ်ဝှမ်း အကြီးအကျယ် ဆန္ဒပြမှုတွေ ပြုလုပ်ခဲ့ပါတယ်။

အာဆီယာဘီဘီရဲ့ ရှေ့နေ ဆိုက်ဖွလ်မာလွတ်ဟာ လုံခြုံရေးအခြေအနေ စိုးရိမ်ရတာကြောင့် နယ်သာလန်ကို ထွက်ပြေး ခိုလှုံခဲ့ပြီး အာဆီယာဘီဘီရဲ့ ခင်ပွန်း အာရှစ်မာဆီဟ်က ဗြိတိန်နဲ့ အမေရိကန်တို့ကိုဆက်သွယ်ကာ သူတို့မိသားစုကို ခိုလှုံခွင့်ပေးဖို့ တောင်းဆိုထားပါတယ်။

Ref: Aljazeera