ဆော်ဒီဂျာနယ်လစ်ကို သတ်သူများ “ကိစ္စပြီးပြီလို့ ခင်ဗျားဘော့စ်ကို ပြောလိုက်” ဟု သတင်းပို့ခဲ့

နိုဝင်ဘာ ၁၃၊ ၂၀၁၈
M-Media

ဆော်ဒီအိမ်ရှေ့မင်းသား မိုဟာမက် ဘင် ဆလ်မန်

– အစ္စတန်ဘူလ်က ဆော်ဒီကောင်စစ်ဝန်ရုံးမှာ ဂျာနယ်လစ်ဂျမားလ်ကာရှိုဂျီကို သတ်ဖြတ်ခဲ့ပြီးတဲ့နောက် ကြေးစားအဖွဲ့ကတစ်ယောက်ဟာ အထက်ကလူတစ်ဦးကို အလုပ်ပြီးကြောင်းသတင်းပို့ခဲ့တယ်လို့ New York Times သတင်းစာက ဖော်ပြလိုက်ပြီး အဲဒီအထက်လူဟာ ဆော်ဒီအိမ်ရှေ့မင်းသား မိုဟာမက် ဘင် ဆလ်မန် ဖြစ်မယ်လို့ အမေရိကန်ထောက်လှမ်းရေးတွေက သုံးသပ်ကြပါတယ်။

တူရကီထောက်လှမ်းရေးက ရရှိထားတဲ့ ကာရှိုဂျီအသတ်ခံရမှု အသတ်မှတ်တမ်းကို နားထောင်ခဲ့ရသူတွေထဲက လူ ၃ ဦးရဲ့ ပြောကြားမှုကို ကိုးကားပြီး နယူးယောက်တိုင်းမ်စ်သတင်းစာက ဖော်ပြခဲ့တာပါ။

ကာရှိုဂျီကိုသတ်ဖြတ်ဖို့အတွက် ဆော်ဒီကနေ အစ္စတန်ဘူလ်ကို ရောက်လာတဲ့ လူ ၁၅ ယောက်ထဲက မဟာရ် အဘ်ဒူလ်အဇစ် မူထရဘ်က သတ်ဖြတ်မှုပြီးတဲ့နောက် သူ့ရဲ့အထက်အရာရှိကို ဖုန်းဆက်ပြီး “ကိစ္စပြီးပြီလို့ ခင်ဗျားဘော့စ်ကိုပြောလိုက်” လို့ ပြောကြားခဲ့တာ ဖြစ်ပါတယ်။

အမေရိကန်တာဝန်ရှိသူတွေက မူထရဘ်ဟာ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်ရဲ့ အတွင်းစည်းထဲက အကြံပေးတစ်ယောက်ကို ဖုန်းခေါ်တာဖြစ်တယ်လို့ ယူဆနေကြောင်း တူရကီထောက်လှမ်းအာဏာပိုင်တွေက ပြောပေမယ့်၊ ဘင် ဆလ်မန်ကို တိုက်ရိုက် ရည်ညွှန်းတာမျိုးတော့ မဟုတ်ဘူးလို့ ဆိုပါတယ်။

ကာရှိုဂျီဟာ အိမ်ရှေ့မင်းသား မိုဟာမက် ဘင် ဆလ်မန်နဲ့ ဆော်ဒီအစိုးရကို ဝေဖန်လေ့ရှိသူဖြစ်ပြီး အောက်တိုဘာ ၂ ရက်နေ့က အစ္စတန်ဘူလ်က ဆော်ဒီကောင်စစ်ဝန်ရုံးထဲ ၀င်သွားပြီးတဲ့နောက် ပျောက်ဆုံးသွားတာ ဖြစ်ပါတယ်။ ဆော်ဒီက ကာရှိုဂျီ ပျောက်ဆုံးမှုကို ပထမပိုင်းမှာ ငြင်းခဲ့ပေမယ့် နောက်ပိုင်းမှာ ၀န်ခံခဲ့ပြီး ၀န်ထမ်းတွေ ထိုးကြိတ်ရင်း သေဆုံးခဲ့တာ ဖြစ်တယ်လို့ ဆိုပါတယ်။

တူရကီအာဏာပိုင်တွေက ကာရှိုဂျီဟာ ရုံးထဲဝင်ဝင်ချင်း လည်ပင်းညှစ် အသတ်ခံလိုက်ရတာဖြစ်တယ်လို့ ပြောထားပါတယ်။ တူရကီသမ္မတ အာဒိုဂန်က အခင်းဖြစ်ပွားမှုကို မှတ်တမ်းတင်ထားတဲ့ တိပ်ခွေတွေကို ဆော်ဒီနဲ့ အမေရိကန်အပါအ၀င် နိုင်ငံ ၅ နိုင်ငံလောက်ကို ပေးထားတယ်လို့ ဆိုပါတယ်။

ဆော်ဒီအာဏာပိုင်တွေက ကာရှိုဂျီအသတ်ခံရမှုမှာ မိုဟာမက် ဘင် ဆလ်မန် ပါဝင်ခြင်းမရှိဘူးလို့ ပြောဆိုထားပါတယ်။

Ref: Aljazeera