ပါလက်စတိုင်းပိုင်နက်အတွင်းရှိ အစ္စရေး၏ ကျူးကျော်အိမ်ယာများကို Airbnb က ၎င်းတို့စာရင်းမှ ပယ်ဖျက်မည်

နိုဝင်ဘာ ၂၀၊ ၂၀၁၈
M-Media

– ပါလက်စတိုင်းပိုင်နက်အတွင်းမှာရှိတဲ့ အစ္စရေးကျူးကျော်အိမ်ယာတွေကနေ တင်ထားတဲ့ အိမ်ငှားစာရင်းတွေကို ပယ်ဖျက်သွားတော့မယ်လို့ နိုင်ငံတကာမှာ နာမည်ကြီးတဲ့ အခန်းငှား၊ အိမ်ငှား ၀န်ဆောင်မှုဝဘ်ဆိုက် Airbnb က မနေ့မှာ ပြောကြားလိုက်ပါတယ်။

ဒါ့ကြောင့် ပါလက်စတိုင်းပိုင်နက်မှာရှိတဲ့ အစ္စရေးရဲ့ တရားမ၀င် ကျူးကျော်အိမ်ယာတွေက အိမ်ငှားစာရင်း ၂၀၀ လောက် Airbnb မှာ ပျောက်ကွယ်သွားမှာ ဖြစ်ပါတယ်။

“(ပါလက်စတိုင်းပိုင်) အနောက်ဖက်ကမ်းမှာရှိတဲ့ အစ္စရေးရဲ့အိမ်ယာတွေက စာရင်းတွေကို ဖယ်ရှားပစ်ရမယ်လို့ ကျွန်တော်တို့ သုံးသပ်ခဲ့ပါတယ်။ အဲဒီနေရာဟာ အစ္စရေးနဲ့ ပါလက်စတိုင်းတွေအကြား ပြဿနာရဲ့ အဓိကနေရာ ဖြစ်ပါတယ်” လို့ Airbnb ၀ဘ်ဆိုက်က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

Airbnb အနေနဲ့ ဒီလိုလုပ်ဆောင်ဖို့အတွက် နိုင်ငံတကာ လူ့အခွင့်အရေးအဖွဲ့တွေ၊ ပါလက်စတိုင်းပြည်သူတွေက နှစ်အတော်ကြာ တောင်းဆိုခဲ့တာပါ။ ပါလက်စတိုင်းပိုင်နက်တွေက ကျူးကျော်အိမ်ယာတွေကို အစ္စရေးအိမ်ယာလို့ ဖော်ပြခဲ့တဲ့အတွက် Airbnb ဟာ ၂၀၁၆ ခုနှစ်မှာ ဝေဖန်မှုတွေကို ခံခဲ့ရပါတယ်။

အခုတော့ ဒီစာရင်းတွေကို လာမယ့်ရက်အနည်းငယ်အတွင်းမှာ ပယ်ဖျက်သွားမှာဖြစ်ပါတယ်။

ကုမ္ပဏီက ပါလက်စတိုင်းပိုင်နက်တွေက အစ္စရေးရဲ့ တရားမ၀င် ကျူးကျော်အိမ်ယာတွေအပေါ် ကမ္ဘာကြီးရဲ့ သဘောထားကို အခြေခံပြီး ဒီလို ဆုံးဖြတ်လိုက်ရတာဖြစ်တယ်လို့ ပြောကြားခဲ့ပါတယ်။

“လူတွေ အစုလိုက်အပြုံလိုက် ထွက်ပြေးရတဲ့နေရာမျိုးကနေ ကုမ္ပဏီတွေက အကျိုးအမြတ်အရှာသင့်ဘူးလို့ ကမ္ဘာ့အသိုင်းအ၀ိုင်းက ပြောနေကြပါတယ်”

Human Rights Watch အဖွဲ့ရဲ့ အစ္စရေးနဲ့ ပါလက်စတိုင်းဆိုင်ရာ ဒါရိုက်တာ အိုမာရ် ရှာကစ်ဒ်က Airbnb ရဲ့ ဒီလုပ်ရပ်ကို ကြိုဆိုခဲ့ပါတယ်။

“Booking.com လို ကုမ္ပဏီမျိုးတွေကလည်းက ဒီလိုမျိုး လိုက်လုပ်သင့်ပါတယ်” လို့ Twitter စာမျက်နှာမှာ သူက ရေးသားခဲ့ပါတယ်။

ပါလက်စတိုင်းပိုင်နက်တွေဖြစ်တဲ့ အနောက်ဖက်ကမ်းနဲ့ ဂါဇာကမ်းမြှောင်တို့မှာ အစ္စရေးက ဆောက်လုပ်ထားတဲ့ အခြေချအိမ်တွေဟာ နိုင်ငံတကာဥပဒေအရ တရားမ၀င်ပါဘူး။ အဲဒီအိမ်ယာတွေမှာနေထိုင်တဲ့ အစ္စရေးအရေအတွက်ဟာ အခုဆိုရင် ၆ သိန်းလောက်အထိ ရှိလာပြီ ဖြစ်ပါတယ်။

Ref: Aljazeera