ကဘူးလ်မြို့ တမန်တော်နေ့အခမ်းအနားတွင် အသေခံဗုံးခွဲမှုဖြစ်၊ ၅၀ ကျော် သေဆုံး

နိုဝင်ဘာ ၂၀၊ ၂၀၁၈
M-Media

– အာဖဂန်နစ္စတန်နိုင်ငံ ကဘူးလ်မြို့မှာ ဒီကနေ့ကျင်းပတဲ့ တမန်တော်နေ့အခမ်းအနားအတွင်း အသေခံဗုံးခွဲမှုတစ်ခု ဖြစ်ပွားခဲ့တာကြောင့် လူ ၅၀ ကျော်သေဆုံးပြီး ၈၀ ကျော်လောက် ဒဏ်ရာရခဲ့တယ်လို့ အာဏာပိုင်တွေက သတင်းထုတ်ပြန်ပါတယ်။

နိုင်ငံရေးနဲ့ ဘာသာရေးအခမ်းအနားတွေ ပုံမှန်ပြုလုပ်လေ့ရှိတဲ့ Uranus Wedding Palace အဆောက်အဦးမှာ တမန်တော်နေ့ အခမ်းအနားကို ကျင်းပခဲ့တာဖြစ်ပြီး နိုင်ငံတစ်ဝှမ်းက ထိပ်တန်း အစ္စလာမ်ဘာသာရေးခေါင်းဆောင်တွေ တော်တော်များများ တက်ရောက်ခဲ့ကြတာပါ။

အသေခံဗုံးခွဲသမားဟာ အခမ်းအနားအလယ်လောက်မှာ ဗုံးခွဲခဲ့တာဖြစ်တယ်လို့ ခန်းမရဲ့မန်နေဂျာက ပြောကြားခဲ့ပါတယ်။

အာဖဂနစ္စတန်မှာ ပြီးခဲ့တဲ့ သီတင်းပတ်တွေအတွင်း IS အကြမ်းဖက်အဖွဲ့နဲ့ တာလီဘန်အဖွဲ့တို့က တိုက်ခိုက်မှုတွေကို ပိုမို တိုးမြှင့် လုပ်ဆောင်လာခဲ့ပါတယ်။

ဒါပေမယ့် ဒီကနေ့တိုက်ခိုက်မှုဟာ ဘယ်သူ့လက်ချက်လဲဆိုတာ မသိရသေးပါဘူး။

ဇွန်လက ကဘူးလ်မြို့ Polytechnic တက္ကသိုလ်နားမှာ အစ္စလာမ်ဘာသာရေးခေါင်းဆောင်တွေ အခမ်းအနားတစ်ခု ပြုလုပ်နေစဉ်အတွင်း အသေခံဗုံးခွဲမှု ဖြစ်ပွားခဲ့တာကြောင့် အနည်းဆုံး ၇ ဦး သေဆုံးခဲ့ပါတယ်။

Ref: Aljazeera