ယီမင်တွင် ငတ်မွတ်မှုကြောင့် သေဆုံးသူ ကလေးအရေအတွက် ၈ သောင်းကျော်နိုင်

နိုဝင်ဘာ ၂၁၊ ၂၀၁၈
M-Media

– ပြည်တွင်းစစ်ဖြစ်နေတဲ့ ယီမင်မှာ ပြီးခဲ့တဲ့ ၃ နှစ်အတွင်း ငတ်မွတ်ခေါင်းပါးမှုကြောင့် သေဆုံးသူ ကလေးငယ် အရေအတွက်ဟာ ၈၅၀၀၀ လောက် ရှိနိုင်တယ်လို့ Save the Children အဖွဲ့က ဒီကနေ့မှာ ထုတ်ပြန်ခဲ့ပါတယ်။

ကုလက စုဆောင်းရရှိထားတဲ့ အချက်အလက်တွေကို ဆန်းစစ်ကာ အခုလို ထုတ်ပြန်ခဲ့တာဖြစ်ပြီး ၂၀၁၅ ခုနှစ် ဧပြီလကနေ ၂၀၁၈ ခုနှစ် အောက်တိုဘာလအထိ အစားအစာ ရှားပါးမှုကြောင့် သေဆုံးသူ ကလေးအရေအတွက်ဟာ ၈၄၇၀၁ ဦး ရှိတယ်လို့ ဆိုပါတယ်။

“စစ်ပွဲတွေကြားမှာ အလွန်အမင်း ငတ်မွတ်ခေါင်းပါးမှုကြောင့် ကလေးပေါင်း ၈၅၀၀၀ လောက် သေဆုံးနိုင်တယ်ဆိုတဲ့ အခြေအနေမျိုးက တုန်လှုပ်စရာပါ။ ကလေးတွေဟာ ဆိုးဆိုးဝါးဝါး ခံစားခဲ့ရပြီး သူတို့ရဲ့ ကိုယ်တွင်းအင်္ဂါတွေ အလုပ်လုပ်မှု နှေးကွေးလာရာကနေ နောက်ဆုံးမှာ ရပ်တန့်ပြီး သေဆုံးသွားကြတာ ဖြစ်ပါတယ်။ ကလေးတွေသေဆုံးတာကို မိဘတွေက ဒီအတိုင်း ထိုင်ကြည့်နေရတယ်။ သူတို့ ဘာမှမလုပ်နိုင်ကြဘူး” လို့ ယီမင် Save the Children က ဒါရိုကတာ တမာရ် ကီရိုလို့စ်က ပြောကြားခဲ့ပါတယ်။

၂၀၁၅ ခုနှစ် မတ်လက ဆော်ဒီနဲ့ ယူအေအီးတပ်တွေ ၀င်ရောကတိုက်ခိုက်ပြီးနောက်ပိုင်း အရေးပါတဲ့ ဟိုဒိုက်ဒါဆိပ်ကမ်းကနေ အစားအသောက်တွေ တင်ပို့မှုကို ကန့်သတ်ခဲ့တဲ့အတွက် တစ်လကို အစားအစာတန်ချိန် ၅၅၀၀၀ လောက် လျော့ကျသွားပြီး ဒါဟာ ကလေး ၂.၂ သန်းအပါအ၀င် လူပေါင်း ၄.၄ သန်းလောက်ကို ကျွေးမွေးနိုင်တဲ့ ပမာဏ ဖြစ်ပါတယ်။

ကမ္ဘာ့စားနပ်ရိက္ခာအဖွဲ့ World Food Programme က ယီမင်းပြည်တွင်းစစ်ကြောင့် ပြည်သူ ၁၄ သန်းလောက်ဟာ ငတ်မွတ်ခေါင်းပါးမှုဒဏ်ကို ရင်ဆိုင်နေရတယ်လို့ ပြောကြားခဲ့ပါတယ်။

Ref: Aljazeera