ဂါနာတက္ကသိုလ်မှ ဂန္ဒီရုပ်တု ဖြိုချခံရ၊ ဂန္ဒီမှာ လူမျိုးရေးစော်ကားသူဟု စွပ်စွဲ

ဒီဇင်ဘာ ၁၅၊ ၂၀၁၈
M-Media

– ဂါနာနိုင်ငံက ဂုဏ်သိက္ခာအကြီးဆုံး တက္ကသိုလ်တစ်ခုဖြစ်တဲ့ ‘ဂါနာတက္ကသိုလ်’ မှာ စိုက်ထူထားတဲ့ အိန္ဒိယလွတ်လပ်ရေးခေါင်းဆောင် မဟတ္တမဂန္ဒီရဲ့ ရုပ်ထုကို  ကျောင်းသားတွေနဲ့ ဆရာတွေက ဖြိုချလိုက်ပြီး လူမည်းတွေကို စော်ကားတဲ့ ခေါင်းဆောင်မျိုးကို ဂုဏ်ပြုဖို့ မထိုက်တန်ဘူးလို့ ပြောကြားခဲ့ကြပါတယ်။

အဲဒီရုပ်တုကို လွန်ခဲ့တဲ့ ၂ နှစ် အိန္ဒိယသမ္မတ ပရာနဘ် မူခါဂျီက ဖွင့်လှစ်ပေးခဲ့တာဖြစ်ပြီး ၂ နိုင်ငံ ဆက်ဆံရေးရဲ့ ပြယုဂ်တစ်ခုလည်း ဖြစ်ပါတယ်။

ဒါပေမယ့် တက္ကသိုလ် ပါမောက္ခတွေက ဂန္ဒီဟာ တစ်ချိန်တုန်းက လူမည်းတွေကို နှိမ့်ချခေါ်ဝေါ်တဲ့ ‘kaffir’ ဆိုတဲ့အသုံးအနှုန်းကို သုံးနှုန်းခဲ့ဖူးပြီး၊ အိန္ဒိယသားတွေဟာ အာဖရိကသားတွေထက် ပိုမိုမြင့်မြတ်တယ်လို့ ပုံဖော်ခဲ့ဖူးတဲ့အတွက် ဒီရုပ်တုကို ဖယ်ရှားပေးဖို့ ဂါနာအစိုးရကို စာရေးသား တောင်းဆိုခဲ့ပါတယ်။

မဟတ္တမဂန္ဒီဟာ တောင်အာဖရိကမှာ နေထိုင်ခဲ့ဖူးပြီး အိန္ဒိယက လွတ်လပ်ရေးလှုပ်ရှားသူတွေထံ ပေးပို့တဲ့စာမှာ လူမည်းတွေကို စော်ကားနှိမ့်ချတဲ့ အသုံးအနှုန်းတွေ ရေးသားခဲ့တာ ဖြစ်ပါတယ်။

“ဥရောပသားတွေက ကျုပ်တို့ကို နှိမ်ဖို့ ကြိုစားတာကို ကျုပ်တို့က စဉ်ဆက်မပြတ် တွန်းလှန်ခဲ့ကြတာ။ အမဲလိုက်တဲ့အလုပ်သာ လုပ်တတ်ပြီး၊ မိန်းမယူဖို့ဆိုတဲ့ ရည်ရွယ်ချက်နဲ့ ကျွဲနွားတွေစု၊ အ၀တ်မ၀တ်ဘဲ အပျင်းထူရင်းသာ ဘ၀ကို ကုန်ဆုံးတတ်ကြတဲ့ ငမည်းတွေ (Kaffir) ကို နှိမ်သလိုမျိုး ကျုပ်တို့ကို ဒီကောင်တွေ နှိမ်ချင်တာ” လို့ ဂန္ဒီရဲ့ စာတစ်စောင်မှာ ရေးသားထားပါတယ်။

ဂါနာတက္ကသိုလ်က ဂန္ဒီရုပ်ထုကို အင်္ဂါနေ့ညပိုင်းမှာ ကျောင်းသားတွေနဲ့ တက္ကသိုလ်ဝန်ထမ်းတွေက ဖြိုချခဲ့တာ ဖြစ်ပါတယ်။

“ကိုယ့်လူမျိုးကို ကိုယ်က ပြန်နှိမ့်ချတဲ့အလုပ်မျိုး လုပ်မယ်၊ ကိုယ့်လူမျိုးရဲ့ သူရဲကောင်းတွေကို ဂုဏ်မပြုဘဲ ကျွန်တော်တို့ကို မလေးစားတဲ့ တစ်ခြားခေါင်းဆောင်တွေကို ဂုဏ်ပြုမယ်ဆိုရင် ဒါဟာ ပြဿနာပါ။ ကျွန်တော်တို့ရဲ့ ခေါင်းဆောင်တွေကို ကျွန်တော်တို့ ကိုယ်တိုင်က မလေးစားဘူးဆိုရင် ကမ္ဘာကလည်း ဘယ်လေးစားပါ့မလဲ။ အခုလိုဖြိုချလိုက်ခြင်းဟာ လူမည်းတွေရဲ့ ဂုဏ်သိက္ခာ၊ လေးစားမှုကို အဖတ်ဆယ်လိုက်တာ ဖြစ်ပါတယ်။ ဒီလှုပ်ရှားမှုဟာ ပြီးဆုံးသွားပါပြီ” လို့ အာဖရိကရေးရာ လေ့လာမှုဌာနက တာဝန်ရှိသူ အိုဘာဒီလီ ကမ်ဘွန်က ပြောကြားခဲ့ပါတယ်။

တက္ကသိုလ်တာဝန်ရှိသူတွေက ဒီကိစ္စအတွက် မှတ်ချက်မပေးခဲ့တဲ့ ဂါနာနိုင်ငံခြားရေး ၀န်ကြီးဌာကနကလည်း ဒါဟာ တက္ကသိုလ်ရဲ့ ဆုံးဖြတ်ချက်သာဖြစ်တယ်လို့ ပြောကြားခဲ့ပါတယ်။

မာလာဝီနိုင်ငံ မြို့တော် ဘလန်တိုင်ရီမှာ ဂန္ဒီရုပ်တု ထားရှိဖို့ စီစဉ်နေပြီး မာလာဝီပြည်သူတွေက ဂန္ဒီဟာ လူမည်းတွေအပေါ် လူမျိုးရေး စော်ကားပြောဆိုမှုတွေ ရှိတယ်လို့ဆိုကာ ဒီအစီအစဉ်ကို ကန့်ကွက်နေကြပါတယ်။

Ref: Aljazera