ဆီးရီးယားမှ အမေရိကန်တပ်ဖွဲ့အားလုံး မကြာမီ ဆုတ်ခွာမည်

ဒီဇင်ဘာ ၂၀၊ ၂၀၁၈
M-Media

– ဆီးရီးယားမှာရှိတဲ့ မိမိတို့တပ်ဖွဲ့တွေ ဆုတ်ခွာတော့မယ်လို့ အိမ်ဖြူတော်က မနေ့မှာ ကြေငြာလိုက်ပြီး IS ကို ချေမှုန်းနိုင်ခဲ့ပြီလို့ ထရမ့်က ပြောကြားပြီးတဲ့နောက် ဒီသတင်း ပေါ်ထွက်လာတာ ဖြစ်ပါတယ်။

အိမ်ဖြူတော် ပြန်ကြာရေးတာဝန်ခံ ဆာရာ ဆန်းဒါးစ်က ဆီးရီးယားမှာ IS ကို ချေမှုန်းနိုင်တာဟာ ကမ္ဘာတစ်ဝှမ်းချေမှုန်းရေးကို အဆုံးသတ်တာ မဟုတ်ကြောင်း ပြောကြားခဲ့ပါတယ်။

“ချေမှုန်းရေး အဆင့်တစ်ခုကို ကူးပြောင်းနေတဲ့အချိန်မှာ အမေရိကန်တပ်ဖွဲ့တွေကို စတင် ဆုတ်ခွာမှာ ဖြစ်ပါတယ်။ အမေရိကန်ရဲ့ အကျိုးစီးပွားကို ကာကွယ်ဖို့ လိုအပ်တဲ့ ဘယ်အချိန်မဆို အမေရိကန်နဲ့ မဟာမိတ်တွေဟာ ပြန်လည်ပူးပေါင်းဖို့ အသင့်ရှိနေပြီး အစွန်းရောက် အစ္စလာမ့်မစ်အကြမ်းဖက်တွေရဲ့ နယ်မြေစိုးမိုးမှု၊ ပံ့ပိုးမှု၊ ငွေကြေးထောက်ပံ့မှု၊ ကျွန်မတို့ရဲ့ နယ်မြေတွေကို ထိုးဖောက်ဝင်ရောက်မှု ဘယ်လိုနည်းလမ်းမျိုးကိုမဆို ဆန့်ကျင်ရေး အတူတကွ ဆောင်ရွက်သွားမှာ ဖြစ်ပါတယ်”

ဆီးရီးယားမှာ အမေရိကန်တပ်ဖွဲ့ဝင် ၂ ထောင်လောက်ရှိပြီး အများစုဟာ ဆီးရီးယား ဒီမိုကရက်တစ်တပ်ဖွဲ့ SDF လို့ခေါ်တဲ့ ကာ့ဒ်-အာရပ် မဟာမိတ်တပ်ဖွဲ့နဲ့ ထဲထဲဝင်ဝင် လုပ်ဆောင်နေတဲ့ အထူးတပ်ဖွဲ့ဝင်တွေ ဖြစ်ပါတယ်။

အမေရိကန်သမ္မတ ဒေါ်နယ်ထရမ့်ဟာ အဲဒီတပ်ဖွဲ့တွေကို အိမ်ပြန်ခေါ်ဖို့ ဆန္ဒရှိကြောင်း အရင်က ပြောကြားခဲ့ဖူးပြီး ဆန်းဒါးစ် သတင်းမထုတ်ပြန်ခင် မနေ့က မိမိတို့အနေနဲ့ ဆီးရီးယားမှာ IS ကို ချေမှုန်းနိုင်ခဲ့ပြီလို့ Twitter စာမျက်နှာမှာ ရေးသားခဲ့ပါတယ်။

ဆီးရီးယားက အမေရိကန်တပ်ဖွဲ့တွေအားလုံး အိမ်ပြန်မယ့် အချိန်ကာလကို ရှင်းရှင်းလင်းလင်း မသိရသေးဘဲ အမည်မဖော်လိုတဲ့ အမေရိကန်တာဝန်ရှိသူတစ်ဦးက အမေရိကန်အစိုးရ၀န်ထမ်းတွေအားလုံးကို ၂၄ နာရီအတွင်း ဆီးရီးယားကနေ ခေါ်ယူသွားမယ်လို့ ရိုက်တာသတင်းဌာနကို ပြောကြားခဲ့ပါတယ်။

စစ်သားတွေကိုတော့ IS ကို နောက်ဆုံးစစ်ဆင်ရေးပြီးဆုံးမှ ပြန်ခေါ်မှာဖြစ်ပြီး ရက်ပေါင်း ၆၀ ကနေ ၁၀၀ လောက်အထိ ကြာနိုင်တယ်လို့ ပြောကြားခဲ့ပါတယ်။

Ref: Aljazeera