ဘင်္ဂလားဒေ့ရ်ှရွေးကောက်ပွဲတွင် ရုန်းရင်းဆန်ခတ်ဖြစ်မှုကြောင့် အနည်းဆုံး ၁၀ ဦး သေဆုံး

ဒီဇင်ဘာ ၃၀၊ ၂၀၁၈
M-Media

ဘင်္ဂလားဒေ့ရ်ှတွင် မဲပေးမှုမြင်ကွင်း

– ဒီကနေ့ ဘင်္ဂလားဒေ့ရ်ှမှာပြုလုပ်တဲ့ ရွေးကောက်ပွဲမှာ အာဏာရပါတီကို ထောက်ခံသူတွေနဲ့ ဆန့်ကျင်သူတွေအကြား တိုက်ခိုက်မှုတွေဖြစ်တာကြောင့် အနည်းဆုံး လူ ၁၀ ဦး သေဆုံးခဲ့ပါတယ်။

လွှတ်တော်အမတ်နေရာ ၂၉၉ နေရာအတွက် အာဏာရ Awami League (AL) ပါတီနဲ့ အတိုက်အခံ Nationalist Party (BNP) ပါတီက ကိုယ်စားလှယ်ပေါင်း ၁၈၄၁ ဦး ၀င်ရောက်ယှဉ်ပြိုင်တာဖြစ်ပြီး လူပေါင်း ၁၀၄ သန်းလောက်က မဲပေးကြမှာ ဖြစ်ပါတယ်။

မဲဆွယ်ရေးစတင်ကတည်းက အာဏာရပါတီကို ထောက်ခံသူတွေနဲ့ ဆန့်ကျင်သူတွေအကြား တိုက်ခိုက်မှုတွေ ဖြစ်ပွားခဲ့ပြီး၊ ၀န်ကြီးချုပ် ရှိခ်ဟာဆီနာဦးဆောင်တဲ့ အစိုးရကလည်း အတိုက်အခံတွေနဲ့ ထောက်ခံသူတွေကို ဖမ်းဆီးမှုတွေ၊ ဖိနှိပ်မှုတွေ ရှိတယ်လို့ သတင်းတွေ ထွက်ခဲ့ပါတယ်။

ရွေးကောက်ပွဲအတွက် စစ်သားတွေအပါအ၀င် နိုင်ငံတစ်ဝှမ်း လုံခြုံရေးတပ်ဖွဲ့ဝင်ပေါင်း ၆ သိန်းလောက် ချထားပြီး၊ မတည်မငြိမ်ဖြစ်လာမှာကို တားဆီးဖို့အတွက် အင်တာနက်လိုင်းတွေကိုလည်း အစိုးရက ပိတ်ထားပါတယ်။

ဒါပေမယ့် တစ်ချို့နေရာတွေမှာ AL ကို ထောက်ခံသူတွေနဲ့ ဆန့်ကျင်သူတွေအကြား တိုက်ခိုက်မှုတွေ ဖြစ်ပွားတာကြောင့် သေဆုံးသူအရေအတွက်ဟာ ၁၀ ဦး ရှိတယ်လို့ နိုင်ငံရဲ့ ထိပ်တန်း ဘင်္ဂါလီနေ့စဉ်သတင်းစာ Prothom Alo က ဖော်ပြပါတယ်။ ဘင်္ဂလားဒေ့ရ်ှက နာမည်ကြီး အင်္ဂလိပ်နေ့စဉ်သတင်းစာ Daily Star က တော့ သေဆုံးသူအရေအတွက် ၁၂ ဦးရှိတယ်လို့ ဆိုပါတယ်။

ရုန်းရင်းဆန်ခတ်မှုတွေ ရှိတယ်လို့ သတင်းထွက်ပေမယ့် ဘင်္ဂလားဒေ့ရှ် ဆက်သွယ်ရေးဝန်ကြီး အဘ်ဒူလ် မာလစ်က ရွေးကောက်ပွဲကို ငြိမ်းချမ်းစွာနဲ့ အောင်မြင်စွာ ကျင်းပနိုင်ခဲ့ပြီး ရွေးကောက်ပွဲကော်မရှင်နဲ့ ပူးပေါင်းက ရလဒ်ကို ထုတ်ပြန်ကြေငြာသွားမယ်လို့ ပြောကြားခဲ့ပါတယ်။

Ref: Aljazeera