စားသောက်ဆိုင်များတွင် ဆေးလိပ်သောက်မှုကို မလေးရှား ပိတ်ပင်

ဇန်န၀ါရီ ၁၊ ၂၀၁၉
M-Media

– လဟာပြင်မှာ ဖွင့်ထားတဲ့ ဆိုင်တွေအပါအ၀င် မလေးရှားနိုင်ငံအတွင်းမှာရှိတဲ့ စားသောက်ဆိုင်တွေမှာ ဆေးလိပ်မသောက်ဖို့ တားမြစ်တဲ့အမိန့်ဟာ ၂၀၁၉ ခုနှစ် ဇန်န၀ါရီ ၁ ရက်နေ့ (ယနေ့) ကစပြီး အသက်ဝင်တော့မှာ ဖြစ်ပါတယ်။

ပြည်သူလူထုအနေနဲ့ ဆေးလိပ်ငွေတွေ့ ရှူရှိုက်ရတာမျိုး မဖြစ်စေဖို့အတွက် ၂၀၁၈ ခုနှစ်က ပြဌာန်းခဲ့တဲ့ ဆေးရွက်ကြီးထုတ်ကုန် ထိန်းချုပ်ရေးဥပဒေ ပြင်ဆင်ချက်အရ ဒီလို တားမြစ်လိုက်တာ ဖြစ်တယ်လို့ မလေးရှား ကျန်းမာရေးဝန်ကြီးဌာန ညွှန်ကြားရေးမှူးချုပ် နူရ်ဟီရှမ်က ပြောကြားခဲ့ပါတယ်။

“အဲယားကွန်း ရှိတာပဲဖြစ်ဖြစ်၊ မရှိတာပဲဖြစ်ဖြစ် စားသောက်ဆိုင်အားလုံးမှာ ဆေးလိပ်မသောက်ဖို့အတွက် ပြည်သူလူထုကို တိုက်တွန်းထားပါတယ်။ အစားအစာရောင်းချတဲ့ဆိုင်တန်းတွေ၊ စားဆောက်ဆိုင်တွေရဲ့ အတွင်းရော၊ အပြင်မှာပါ ဒီကန့်သတ်ချက်က အကျုံးဝင်မှာ ဖြစ်ပါတယ်။ အပြင်မှာ ထိုင်ခုံတွေချပြီး ရောင်းတဲ့ဆိုင်တွေ၊ ကားနဲ့လာပြီးဖွင့်တဲ့ စားသောက်ဆိုင်တွေ၊ သင်္ဘောနဲ့ ရထားတွေပေါ်က စားသောက်ဆိုင်တွေလည်း ဒီစည်းကမ်းကို လိုက်နာရမှာ ဖြစ်ပါတယ်”

စားသောက်ဆိုင်တွေမှာ ‘ဆေးလိပ်မသောက်ရ’ သတိပေးဆိုင်းဘုတ်တွေကို ထင်ထင်ရှားရှားကပ်ထားဖို့ ဆေးလိပ်ပြာခွက်တွေ မထားပေးဖို့လည်း ဆိုင်ရှင်တွေကို နူရ်ဟီရှမ်က သတိပေးခဲ့ပါတယ်။

ဆေးလိပ်မသောက်ရ တားမြစ်ချက်ကို ကျူးလွန်ဖောက်ဖျက်တဲ့ မည်သူ့ကိုမဆို ဒဏ်ငွေ ရင်းဂစ် တစ်သောင်းအထိ၊ ထောင်ဒဏ် ၂ နှစ်အထိ ချမှတ်ခံရမှာ ဖြစ်ပါတယ်။

ဆေးလိပ်မသောက်ရဆိုင်းဘုတ်ကို ထင်ထင်ရှားရှား မကပ်ထားတဲ့ ဆိုင်ရှင်တွေက ဒဏ်ငွေ ရင်းဂစ် သုံးထောင်အထိ၊ ထောင်ဒဏ် ၆ လအထိ ချမှတ်ခံရမှာ ဖြစ်ပါတယ်။ ဆေးလိပ်သောက်ဖို့အတွက် စီစဉ်ပေးရင်တော့ ဒဏ်ငွေ ရင်းဂစ် ၅ ထောင်အထိ၊ ထောင်ဒဏ် ၁ နှစ်အထိ ချမှတ်ခံရနိုင်ပါတယ်။

Ref : CNA