ဧရာမ ခရစ်ယာန်ဘုရားကျောင်းသစ်တစ်ခု အီဂျစ်တွင် ဖွင့်လှစ်

ဇန်န၀ါရီ ၇၊ ၂၀၁၈
M-Media

အသစ်ဖွင့်လှစ်လိုက်သည့် Cathedral of the Nativity ဘုရားကျောင်း

– အာရပ်ကမ္ဘာနဲ့ အရှေ့အလယ်ပိုင်းဒေသမှာ အကြီးဆုံးဖြစ်လာမယ့် ခရစ်ယာန်ဘုရားကျောင်းကို အီဂျစ်သမ္မတ အဘ်ဒဲလ် ဖာတာဟ် အလ်-စီစီက မနေ့မှာ ဖွင့်လှစ်ပေးခဲ့ပြီး နိုင်ငံရဲ့ သမိုင်းတွင်မယ့်နေ့ရက်လို့လည်း ပြောကြားလိုက်ပါတယ်။

Cathedral of the Nativity လို့ အမည်ပေးထားတဲ့ အဲဒီ ကော့ပတစ် ခရစ်ယာန်ရားကျောင်းဟာ အီဂျစ်နိုင်ငံရဲ့ အုပ်ချုပ်ရေးမြို့တော်သစ်မှာ တည်ဆောက်ထားတာဖြစ်ပြီး အီဂျစ်နိုင်ငံက အစ္စလာမ်ဘာသာဝင်တွေနဲ့ ကော့ပတစ်ခရစ်ယာန် ဘာသာဝင်ရဲ့ ထည့်ဝင်ငွေလည်း ပါဝင်ပါတယ်။

မနေ့က ကျရောက်တဲ့ ကော့ပတစ်ခရစ်ယာန်တွေရဲ့ ခရစ်စ္စမတ်နေ့ ၀တ်ပြုဆုတောင်းမှုကို အဲဒီဘုရားကျောင်းမှာ ပထမဆုံး ကျင်းပခဲ့ပြီး သမ္မတ အလ်-စီစီ တက်ရောက်ကာ ဘုရားကျောင်းကို ဖွင့်လှစ်ပေးခဲ့ပါတယ်။

“ဒီအခမ်းအနားဟာ ကျွန်တော်တို့တိုင်းပြည်ရဲ့သမိုင်းမှာ အရေးပါတဲ့ကာလတစ်ခု ဖြစ်ပါတယ်။ ကျွန်တော်တို့ဟာ တစ်သွေးတစ်သားတည်းဖြစ်ပြီး အမြဲတမ်းလည်း ဒီအတိုင်းဖြစ်နေမှာပါ” လို့ အလ်-စီစီက နိုင်ငံအတွင်းမှာရှိနေတဲ့ မွတ်စလင်တွေနဲ့ ခရစ်ယာန်တွေကို ရည်ညွှန်းပြီး မိန့်ခွန်းမှာ ထည့်သွင်းပြောဆိုခဲ့ပါတယ်။

အီဂျစ်နိုင်ငံရဲ့ သန်း ၁၀၀ နီးပါးသော လူဦးရေမှာ ခရစ်ယာန်ဘာသာဝင်ဦးရေဟာ ၁၀ ရာခိုင်နှုန်းလောက်ရှိပြီး ကော့ပတစ် ခရစ်ယာန်အသင်းတော်က အကြီးဆုံး ဖြစ်ပါတယ်။

ကော့ပတစ်အသင်းတော်ရဲ့ ပုပ်ရဟန်းမင်းကြီး တာဝါဒရော့စ် ၂ က ကျေးဇူးတင်ကြောင်း ပြောကြားခဲ့ပါတယ်။

“ဒီကနေ့မှာ ဘုရားသခင်ရဲ့ ကတိတော် ပြည့်မြောက်တာကို ကျွန်တော်တို့ တွေ့မြင်ရပါပြီ။ ဒီလို ကြီးကျယ်တဲ့ အခမ်းအနားကို ကျွန်တော်တို့က သက်သေခံနေပါတယ်”

ဘုရားကျောင်းတည်ရှိရာ ခြံဝန်းဟာ ၆၃၀၀၀ စကွဲယားမီတာရှိပြီး ပန်းခြံ၊ ဂိုဏ်းအုပ်ဘုန်းတော်ကြီး သီတင်းသုံးရာ အဆောက်အဦး၊ ဧည့်ဆောင်၊ အစည်းအဝေးခန်းနဲ့ ရုံးခန်းတွေလည်း ပါဝင်မှာဖြစ်ကာ တစ်ကြိမ်ကို လူပေါင်း ၉၀၀၀ လောက် တစ်ပြိုင်တည်း ၀တ်ပြုဆုတောင်းနိုင်မှာ ဖြစ်ပါတယ်။

ဘုရားကျောင်းပရ၀ုဏ်အတွင်း ကော့ပတစ် ဗိသုကာလက်ရာနဲ့ တည်ဆောက်ထားတဲ့ မီးပြတိုက်နှစ်ခုလည်း ပါဝင်ပြီး မီးပြတိုက်တွေရဲ့ ထိပ်ဆုံးမှာ ခေါင်းလောင်းတွေကိုလည်း တပ်ဆင်ထားပါတယ်။

ဘုရားကျောင်းဖွင့်ပွဲအခမ်းအနားကို အရှေ့အလယ်ပိုင်းနိုင်ငံတွေက နိုင်ငံတွေနဲ့ မွတ်စလင်အဖွဲ့အစည်း၊ အာရပ်အဖွဲ့အစည်းတွေရဲ့ ခေါင်းဆောင်တွေ တက်ရောက်ခဲ့ကြပါတယ်။

သမ္မတ အလ်-စီစီဟာ မြို့တော်သစ်က al-Fattah al-Aleem ဗလီဝတ်ကျောင်းတော်ကိုလည်း တက်ရောက်ဖွင့်လှစ်ပေးခဲ့ပါတယ်။

အီဂျစ်က ထိပ်တန်း အစ္စလာမ့် ဓမ္မတက္ကသိုလ်ဖြစ်တဲ့ အလ်-အဇ်ဟာရ်က ရှေ့ဆောင်အီမာမ်ကြီးက ခရစ်ယာန်၊ ဂျူးတွေ အပါအ၀င် ဘယ်သူတွေရဲ့ ၀တ်ပြုရာနေရာကိုမဆို စောင့်ရှောက် ကာကွယ်ပေးဖို့ အစ္စလာမ်သာသနာက ဘာသာဝင်တွေကို တာဝန်ပေးထားတယ်လို့ ပြောကြားခဲ့ပါတယ်။

Cathedral of the Nativity ဘုရားကျောင်းနဲ့ al-Fattah al-Aleem ဗလီဝတ်ကျောင်းတော်တို့တည်ရှိတဲ့ အုပ်ချုပ်ရေးမြို့တော်သစ် ဆောက်လုပ်မယ့် စီမံကိန်းကို ၂၀၁၅ ခုနှစ်မှာ အီဂျစ်က စတင်ခဲ့တာ ဖြစ်ပါတယ်။

Ref: Reuters