ခရစ်ယာန် ကက်သလစ်ဘုန်းကြီးများက သီလရှင်များအပေါ် လိင်ကျွန်ပြုမှုကိစ္စကို ပုပ်ရဟန်းမင်း ၀န်ခံ

ဖေဖော်ဝါရီ ၈၊ ၂၀၁၉
M-Media

– ခရစ်ယာန်ကက်သလစ်အသင်းတော်မှာ ဘုန်းကြီးတွေဟာ သီလရှင်တွေကို လိင်ပိုင်းဆိုင်ရာ စော်ကားမှုတွေရှိပြီး၊ လိင်ကျွန်ပြုတာတွေတောင် ရှိတယ်လို့ ပုပ်ရဟန်းမင်းကြီး ဖရန်စစ်က ၀န်ခံပြောကြားလိုက်ပါတယ်။

သီလရှင်တွေအပေါ် ဘုန်းကြီးတွေက လိင်ပိုင်းဆိုင်ရာ စော်ကားမှုကိစ္စကို ပုပ်ရဟန်းမင်းကြီး ဖရန်စစ်က ပထမဆုံး ၀န်ခံလိုက်တာလည်း ဖြစ်ပါတယ်။

လိင်ကျွန်ပြုမှုကိစ္စတစ်ခုအတွက် ယခင် ပုပ်ဘင်နီဒစ်ဟာ သီလရှင်ကျောင်းတစ်ခုလုံးကို ပိတ်ပစ်ခိုင်းရကြောင်း၊ ဒီပြဿနာကို ဖြေရှင်းဖို့ ကက်သလစ်အသင်းတော်က ကြိုးစားနေပေမယ့် အခုအချိန်အထိ ဆက်ရှိနေကြောင်း ဖရန်စစ်က ထည့်သွင်းပြောဆိုခဲ့ပါတယ်။

လိင်ပြဿနာကြောင့် ပုပ်ဘန်နီဒစ် ၂၀၀၅ ခုနှစ်က ပိတ်ခိုင်းခဲ့ရတဲ့ သီလရှင်ကျောင်းဟာ ပြင်သစ်က Community of St Jean ဖြစ်ပါတယ်။ ၂၀၁၃ ခုနှစ်မှာတော့ Community of St Jean သီလရှင်ကျောင်းက ဒီကိစ္စကို ၀န်ခံခဲ့ပါတယ်။

ကက်သလစ်အသင်းတော်ရဲ့ ကမ္ဘာလုံးဆိုင်ရာ သီလရှင်များအဖွဲ့က သူတို့ရဲ့ခံစားချက်တွေကို ထုတ်ဖော်ပြောဆိုဖို့ အတားအဆီးတွေ ရှိနေမှုကို ရှုတ်ချကြောင်း ပြီးခဲ့တဲ့နိုဝင်ဘာလမှာ ထုတ်ပြန်ပြောကြားခဲ့ပါတယ်။

ပြဿနာရှိနေ

ကမ္ဘာတစ်ဝှမ်းက ကက်သလစ်ဘုန်းကြီးတွေဟာ ကလေးငယ်တွေနဲ့ သီလရှင်တွေကို လိင်ပိုင်ဆိုင်ရာ စော်ကားမှုသတင်းတွေဟာ ပြီးခဲ့တဲ့နှစ်တွေအတွင်း ကျယ်ကျယ်ပြန့်ပြန့် ထွက်ပေါ်ခဲ့ပါတယ်။

အင်္ဂါနေ့က သတင်းထောက်တွေနဲ့တွေ့ဆုံမှုအတွင်း ပုပ်ရဟန်းမင်းကြီးက ကက်သလစ်အသင်တော်မှာ ပြဿနာရှိနေကြောင်း ၀န်ခံခဲ့ပြီး အကြောင်းအရင်းက လူ့အဖွဲ့အစည်းမှာ အမျိုးသမီးတွေကို ဒုတိယတန်းစားအဖြစ် မှတ်ယူထားတာကြောင့် ဖြစ်တယ်လို့ ပြောကြားခဲ့ပါတယ်။

ဘုန်းကြီးတွေ၊ ဂိုဏ်းအုပ်ဘုန်းကြီးတွေဟာ သီလရှင်တွေအပေါ် လိင်ပိုင်းဆိုင်ရာစော်ကားမှု ရှိနေတယ်ဆိုတာကို အသင်းတော်က သိရှိပြီး ဖြေရှင်းနေကာ၊ ကျူးလွန်တဲ့ဘုန်းကြီးတော်တော်များများကို သာသနာ့ဘောင်ကနေ ထုတ်ပယ်ခဲ့တယ်လို့ ဖရန်စစ်က ပြောပါတယ်။

ကက်သလစ်ဘုန်းကြီးတွေ သီလရှင်တွေကို လိင်ပိုင်းဆိုင်ရာ စော်ကားမှုဟာ အိန္ဒိယ၊ ချီလီ၊ အီတလီနဲ့ အာဖရိကတို့မှာလည်း ဖြစ်ပွားခဲ့ပါတယ်။

အိန္ဒိယနိုင်ငံက ကက်သလစ် ဂိုဏ်းအုပ်ဘုန်းကြီးတစ်ပါးဟာ ၂၀၁၄ ခုနှစ်ကနေ ၂၀၁၆ ခုနှစ်အတွင်း သီလရှင်တစ်ဦးကို ၁၃ ကြိမ် အဓမ္မကျင့်ခဲ့တဲ့အတွက် ပြီးခဲ့တဲ့နှစ်မှာ ဖမ်းဆီးခံခဲ့ရပါတယ်။ ချီလီနိုင်ငံမှာလည်း ဘုန်းကြီးတွေက သီလရှင်တွေကို လိင်စော်ကားမှု ကိစ္စအတွက် ဗာတီကန်က ပြီးခဲ့တဲ့နှစ်မှာ စုံစမ်းစစ်ဆေးမှု ပြုလုပ်ခဲ့ရပါတယ်။

ပုပ်ရဟန်းမင်းကြီး ဖရန်စစ်က သီလရှင်တွေ လိင်ပိုင်းဆိုင်ရာ စော်ကားမှုကိစ္စတွေဟာ ကက်သလစ်သာသနာက တစ်ချို့သာသနာ့နယ်မြေတွေ၊ အထူးသဖြင့် အသစ်ပေါ်ထွက်လာတဲ့ နေရာတွေမှာ ဆက်လက်ဖြစ်ပွားနေတယ်လို့ ထည့်သွင်းပြောဆိုခဲ့ပါတယ်။

Ref: BBC