ပါလက်စတိုင်းဒေသများကို မွေးရပ်အဖြစ် နယ်သာလန်က ထည့်ခွင့်ပြု

ဖေဖော်ဝါရီ ၁၁၊ ၂၀၁၉
M-Media

– တုိုင်းပြည်အတွင်းက ပါလက်စတိုင်းနွယ်ဖွားတွေရဲ့ မွေးရပ်ကို ပါလက်စတိုင်းပိုင်နက်အမည်တွေ ထည့်ခွင့်ပေးမယ်လို့ နယ်သာလန်နိုင်ငံက ကြေငြာလိုက်ပါတယ်။

နယ်သာလန်နိုင်ငံဟာ ပါလက်စတိုင်းကို နိုင်ငံတစ်ခုအဖြစ် အသိအမှတ် မပြုသေးပါဘူး။ ဒါပေမယ့် အစ္စရေးနိုင်ငံ ဖြစ်ပေါ်လာတဲ့ ၁၉၄၈ ခုနှစ် မေလ ၁၅ ရက်နေ့နောက်ပိုင်း မွေးဖွားတဲ့ ပါလက်စတိုင်းနွယ်ဖွားတွေရဲ့ မွေးရပ်ကို အရှေ့ဂျေရုစလင်၊ အနောက်ဖက်ကမ်းနဲ့ ဂါဇာကမ်းမြှောင် စသဖြင့် ပါလက်စတိုင်းပိုင်နက်တွေ ထည့်ခွင့်ပြုမှာ ဖြစ်ပါတယ်။

အရင်က နယ်သာလန်နိုင်ငံမှာရှိတဲ့ ပါလက်စတိုင်းနွယ်ဖွားတွေရဲ့ မွေးရပ်ကို ‘အစ္စရေး’ ဒါမှမဟုတ် ‘အမည်မသိ’ လို့ ထည့်ကြတာ ဖြစ်ပါတယ်။

စနေနေ့ ဒက်ခ်ျ ပြည်ထဲရေးဝန်ကြီးဌာနက ထုတ်ပြန်တဲ့ ကြေငြာချက်မှာ နိုင်ငံရဲ့ အရက်ဖက် မှတ်ပုံတင်ဌာနမှာ ဂါဇာကမ်းမြှောင်နဲ့ အနောက်ဖက်ကမ်းကို ထည့်သွင်းလိုက်တယ်လို့ ဖော်ပြထားပါတယ်။

အစ္စရေးနဲ့ မသက်ဆိုင်

ကမ္ဘာတစ်ဝှမ်းကနေ ပါလက်စတိုင်းကို ၀င်ရောက်လာတဲ့ ဂျူးတွေဟာ ဌာနေတွေရဲ့ ပိုင်နက်တွေကို ကျူးကျော်သိမ်းပိုက်ခဲ့ပြီးတဲ့နောက် ၁၉၄၈ ခုနှစ်က အစ္စရေးနိုင်ငံအဖြစ် ထူထောင်ခဲ့တာကြောင့် သမိုင်းဝင်ပါလက်စတိုင်းရဲ့ ဒေသတော်တော်များများ ဆုံးရှုံးခဲ့ပြီး အနောက်ဖက်ကမ်းနဲ့ ဂါဇာကမ်းမြှောင်ဆိုတဲ့ ဒေသနှစ်ခုသာ ကျန်ရစ်ခဲ့ပါတယ်။

ဒါပေမယ့် အဲဒီဒေသတွေဟာလည်း အစ္စရေးရဲ့ ပိတ်ဆို့မှု၊ တစ်ဖြည်းဖြည်း ကျူးကျော်သိမ်းပိုက်မှုတွေကို ယနေ့အချိန်အထိ ဆက်လက်ခံစားနေရပါတယ်။

ဒက်ခ်ျနိုင်ငံခြားရေးဝန်ကြီး ရေမွန်နော့ပ်စ်က နယ်သာလန်အနေနဲ့ အနောက်ဖက်ကမ်းနဲ့ ဂါဇာကမ်းမြှောင်ကို ပါလက်စတိုင်းတွေရဲ့ မွေးရပ်မြေအဖြစ် သတ်မှတ်တာဟာ အစ္စရေးရဲ့ အချုပ်အခြာအာဏာ ဒီသေတွေအပေါ်မှာ မရှိဘူးဆိုတဲ့အချက်၊ ပါလက်စတိုင်းကို နိုင်ငံတစ်ခုအဖြစ် လက်မခံသေးတဲ့ နယ်သာလန်ရဲ့ ပေါ်လစီတွေနဲ့အညီ ဆောင်ရွက်ခဲ့တာဖြစ်တယ်လို့ ပြောကြားခဲ့ပါတယ်။

၁၉၉၀ ပြည့်နှစ်တွေက အစ္စရေးနဲ့ ပါလက်စတိုင်းတို့ ချုပ်ဆိုခဲ့တဲ့ အော်စလိုသဘောတူညီချက်၊ အဲဒီနောက်ပိုင်း ပေါ်ထွက်လာတဲ့ ကုလရဲ့ ဆုံးဖြတ်ချက်တွေကို လိုက်နာတာဖြစ်တယ်လို့လည်း ၀န်ကြီးက ပြောပါတယ်။

ပါလက်စတိုင်းနွယ်ဖွား နယ်သာလန်နိုင်ငံသားတစ်ဦးက သူ့ရဲ့ မွေးရပ်မြေနေရာမှာ အစ္စရေးလို့ ထည့်ထားတာကို မကျေနပ်တဲ့အတွက် ဥရောပ လူ့အခွင့်အရေးခုံရုံးကို တိုင်ကြားပြီးတဲ့နောက်ပိုင်း နယ်သာလန်က အခုလို ပေါ်လစီ ပြောင်းလဲပေးလိုက်တာ ဖြစ်ပါတယ်။

ကမ္ဘာတစ်ဝှမ်း နိုင်ငံပေါင်း ၁၃၆ နိုင်ငံနဲ့ ကုလအထွေထွေညီလာခံတို့က ပါလက်စတိုင်းကို နိုင်ငံတစ်နိုင်ငံအဖြစ် အသိအမှတ်ပြုထားပေမယ့် ဥရောပနိုင်ငံအများစုက အသိအမှတ်မပြုသေးဘဲ အစ္စရေးနဲ့ ပါလက်စတိုင်းတို့ ငြိမ်းချမ်းရေးသဘောတူညီချက် ရရှိအောင် စောင့်ဆိုင်းနေကြပါတယ်။

Ref: Aljazeera