ထိုင်းနိုင်ငံမှ မြန်မာဒုက္ခသည်များ နေရပ်ပြန်

ဖေဖော်ဝါရီ ၂၁၊ ၂၀၁၉
M-Media

တာ့ခ်ခရိုင် မယ်လဒုက္ခသည်စခန်းမှ ကရင်ဒုက္ခသည်များ

– ထိုင်းနိုင်ငံမှာ နေထိုင်နေတဲ့ မြန်မာနိုင်ငံသား ဒုက္ခသည်တွေဟာ နေရပ်ပြနေကြပြီး သူတို့ရဲ့ မူရင်းနေရာတွေက လုံခြုံရေးအခြေအနေ တိုးတက်လာတာကြောင့် ဖြစ်တယ်လို့ UNHCR ရဲ့ မြန်မာနိုင်ငံရုံးက ပြောရေးဆိုခွင့်ရှိသူ အေအိုဖီ မက်ဒေါ်နယ်က ပြောပါတယ်။

“ပထမဆုံးပြန်တဲ့အသုတ်က မနေ့မှာ နယ်စပ်ဖြတ်ဝင်သွားတယ်။ နောက်လူတွေလည်း ရက်အနည်းငယ်အတွင်း ပြန်မယ်လို့ မျှော်လင့်ထားပါတယ်”

အခုလို နေရပ်ပြန်တဲ့ လုပ်ငန်းကို ထိုင်း-မြန်မာအစိုးရတွေက ဦးဆောင်ပြီး UNHCR က ကူညီပံ့ပိုးပေးတဲ့ မိမိသဘောဆန္ဒအလျောက် နေရပ်ပြန်ရေး တစ်စိတ်တစ်ပိုင်းဖြစ်တယ်လို့လည်း သူမက ဆိုပါတယ်။

UNHCR နဲ့ မိတ်ဖက်အဖွဲ့တွေဟာ နေရပ်ပြန်သူတွေကို အကြံဉာဏ်ပေးတာ၊ သတင်းအချက်အလက်ပေးတာတွေကိုလည်း လုပ်ဆောင်ပေးနေပါတယ်။

“သူတို့အတွက် ပို့ဆောင်ရေးနဲ့ ကနဦးထောက်ပံ့ကူညီရေးတွေ လုပ်ဆောင်ပေးပါတယ်။ လက်ရှိအခြေအနေဟာ မိမိသဘောဆန္ဒအလျောက် နေရပ်ပြန်နိုင်ဖို့ သင့်လျော်တဲ့အချိန်ဖြစ်တယ်ဆိုတာမျိုးကို UNHCR က သုံးသပ်တာ မဟုတ်ပေမယ့် အခြေအနေတွေ တိုးတက်လာအောင် မိတ်ဖက်အဖွဲ့အစည်းတွေနဲ့ ကျွန်မတို့ ပူးပေါင်းဆောင်ရွက်နေပါတယ်။ မြန်မာနိုင်ငံ အရှေ့တောင်ပိုင်းမှာ အသက်မွေးဝမ်းကြောင်းလုပ်ငန်းတွေ၊ လိုအပ်တဲ့ ၀န်ဆောင်မှုမျိုးတွေ ရရှိရေးအတွက်လည်း
လူ့အဖွဲ့အစည်းတွေကို ကူညီထောက်ပံ့ ပေးနေပါတယ်”

ထိုင်း-မြန်မာ နယ်စပ်က ဒုက္ခသည်စခန်း ၉ ခုမှာ ခိုလှုံနေရတဲ့ ဒုက္ခသည်အရေအတွက်ဟာ ၉၇၀၀၀ ကျော် ရှိနေပြီး အများစုဟာ ကရင်နဲ့ ကရင်နီတိုင်းရင်းသားတွေ ဖြစ်ပါတယ်။

မက်ဒေါ်နယ်ကတော့ နေရပ်ပြန်ရေးမှာ အခက်အခဲတွေ မရှိစေဖို့၊ မြန်မာအစိုးရရဲ့ တရားဝင်အသိအမှတ်ပြုမှု ရရှိစေဖို့၊ ပြန်လည်အခြေချရေးကိစ္စမှာ UNHCR နဲ့ မိတ်ဖက်အဖွဲ့အစည်းတွေ ဆက်လက်စောင့်ကြည့်သွားဖို့ ကိစ္စတွေကို လုပ်ဆောင်ပေးကာ ဒုက္ခသည်တွေ နေရပ်ပြန်ချင်လာအောင် ကူညီပေးနေတယ်လို့ ထည့်သွင်း ပြောဆိုခဲ့ပါတယ်။

နေရပ်ပြန်ဝင်လာသူတွေဟာ ကြိုဆိုရေးစခန်းတွေမှာ လူဝင်မှုကြီးကြပရေး စစ်ဆေးမှု၊ ကျန်းမာရေးစစ်ဆေးမှုတွေ ခံယူကာ နောက်ပိုင်းမှာ သူတို့ နေထိုင်တဲ့နေရာတွေကို သွားရောက်ကြမှာ ဖြစ်ပါတယ်။

Ref: mmtimes

(Myanmar Times အင်္ဂလိပ်ပိုင်းတွင် ဖော်ပြထားသည့်သတင်းကို ကောက်နှုတ်ဘာသာပြန်ဆိုခြင်း ဖြစ်ပါသည်)