တရုတ်နှင့်ပတ်သက်သည့် ဆော်ဒီအိမ်ရှေ့မင်းသား၏ရပ်တည်ချက် ဝေဖန်ခံရ

ဖေဖော်ဝါရီ ၂၃၊ ၂၀၁၉
M-Media

– တရုတ်နိုင်ငံရဲ့ အကြမ်းဖက်ဝါဒတိုက်ဖျက်ရေး၊ အစွန်းရောက်မှု လျှော့ချရေးလုပ်ငန်းတွေကို ထောက်ခံတယ်လို့ ဆော်ဒီ အိမ်ရှေ့မင်းသား မိုဟာမက် ဘင် ဆလ်မန်က ပြောကြားကြောင်း တရုတ်နိုင်ငံပိုင်သတင်းဌာနက ဖော်ပြခဲ့ပြီး ဒါဟာ ၀ီဂါမွတ်စလင်အတွေအပေါ် တရုတ်ရဲ့ ဖိနှိပ်ညှင်းပမ်းမှုတွေကို ဆော်ဒီက အားပေးအားမြှောက်ပြုရာ ရောက်တယ်လို့ ဝေဖန်မှုတွေလည်း ပေါ်ထွက်လာပါတယ်။

အာရှခရီးစဉ်အဖြစ် တရုတ်နိုင်ငံကို ရောက်ရှိနေတဲ့ ဘင် ဆလ်မန်ဟာ သောကြာနေ့က ဘေဂျင်းမှာ တရုတ်သမ္မတ ရှီကျင့်ဖျင်နဲ့ တွေ့ဆုံခဲ့ပါတယ်။ အိမ်ရှေ့မင်းသားဟာ တရုတ်ကို မလာခင် ပါကစ္စတန်ကို သွားရောက်ခဲ့ပြီး နောက်ပိုင်းမှာ အိန္ဒိယကို သွားရောက်ဖို့လည်း ရှိပါတယ်။

ရှီနဲ့ တွေ့ဆုံမှုအတွင်း ဘင် ဆလ်မန်က တရုတ်နဲ့ ဆော်ဒီတို့အကြား ပြဿနာကင်းတဲ့ ဆက်ဆံရေးအတွက် ဂုဏ်ယူကြောင်း ပြောကြားခဲ့ပြီး တရုတ်သမ္မတကလည်း အစွန်းရောက်မှုနဲ့ အကြမ်းဖက်မှုတိုက်ဖျက်ရေး ပူးပေါင်းလုပ်ဆောင်ဖို့ တိုက်တွန်းခဲ့တယ်လို့ Xinhua သတင်းဌာနက ဖော်ပြပါတယ်။

တရုတ်နိုင်ငံမှာ ကိုယ်ပိုင်ကာကွယ်ပိုင်ခွင့်၊ အကြမ်းဖက်တိုက်ဖျက်ရေးနဲ့ အစွန်းရောက်မှုလျှော့ချရေး လုပ်ဆောင်ပိုင်ခွင့်တွေ ရှိတယ်ဆိုတာကို ဆော်ဒီက အလေးထားကြောင်း အိမ်ရှေ့မင်းသားက ရှီကျင့်ဖျင်ကို ပြောကြားခဲ့ပါတယ်။

ဝေဖန်ခံရ

နိုင်ငံအနောက်ပိုင်းက တူရကီစကားပြော ၀ီဂါမွတ်စလင်တွေကို တရုတ်က တရားလက်လွတ် ဖမ်းဆီးထိန်းသိမ်းထားတာ၊ ဖိနှိပ်ချုပ်ချယ်တာတွေ လုပ်ဆောင်နေတယ်လို့ ကုလနဲ့ လူ့အခွင့်အရေး တက်ကြွလှုပ်ရှားသူတွေရဲ့ ပြောကြားမှု၊ ကမ္ဘာ့မီဒီယာတွေက ဖော်ထုတ်တင်ပြမှုကြောင့် တရုတ်ဟာ ဖိအားတွေရဲ့ ရင်ဆိုင်နေရတာပါ။

ဝီဂါတစ်သန်းလောက်ဟာ အကျဉ်းစခန်းတွေထဲမှာ ထိန်းသိမ်းခံထာရပြီး ညှင်းပမ်းနှိပ်စက်ခံနေရတယ်လို့ ကုလရဲ့ ပြီးခဲ့တဲ့နှစ် စုံစမ်းဖော်ထုတ်မှုမှာ တွေ့ခဲ့ရပါတယ်။ တရုတ်အစိုးရက ဒီစွပ်စွဲချက်တွေကို ငြင်းဆိုပြီး သူတို့ဟာ အစွန်းရောက်တိုက်ဖျက်ရေး ဆောင်ရွက်တာဖြစ်တယ်လို့ ပြောကြားထားပါတယ်။

ဆော်ဒီအိမ်ရှေ့မင်းသား မိုဟာမက် ဘင် ဆလ်မန်ရဲ့ အခုရပ်တည်ချက်ကို တက်ကြွလှုပ်ရှားသူတွေက ဝေဖန်ခဲ့ပြီး ဗြိတိန်က မွတ်စလင်ကောင်စီရဲ့ ပြောရေးဆိုခွင့်ရှိသူ မစ်က်ဒက် ဗာစီက ဘင် ဆလ်မန်ရဲ့ ဒီပြောကြားမှုဟာ စက်ဆုပ်ဖွယ်ရာဖြစ်တယ်လို့ တုန့်ပြန်ခဲ့ပါတယ်။

ဂျာမနီအခြေစိုက် ကမ္ဘာ့ဝီဂါကွန်ဂရက်ကလည်း မင်းသားဟာ ၀ီဂါတွေ ဖမ်းဆီးထိန်းသိမ်းခံရမှုကို စိုးရိမ်ကြောင်း ပြောကြားရမယ့်အစား တရုတ်ရဲ့ လူ့အခွင့်အရေး ချိုးဖောက်မှုမှာ အလိုတူအလိုပါအဖြစ် ပါဝင်နေတယ်လို့ ထုတ်ပြန်ခဲ့ပါတယ်။

Ref: Aljazeera