ဝီဂါများ၏ ဘာသာရေးလွတ်လပ်ခွင့်ကို ကာကွယ်ပေးရန် တရုတ်ကို တူရကီ တောင်းဆို

ဖေဖော်ဝါရီ ၂၆၊ ၂၀၁၉
M-Media

– တရုတ်နိုင်ငံအနောက်ပိုင်း ရှင်ကျန်းပြည်နယ်က ၀ီဂါမွတ်စလင်တွေအပေါ် တရုတ်အစိုးရက ညှင်းပမ်းနှိပ်စက်မှုတွေ ရှိတယ်ဆိုတဲ့ သတင်းတွေအတွက် စိုးရိမ်မိကြောင်း တူရကီက ပြောကြာလိုက်ပြီး ဘာသာရေးလွတ်လပ်လပ်ခွင့်ကို ကာကွယ်ပေးဖို့လည်း တောင်းဆိုလိုက်ပါတယ်။

၎ ပတ်တာကြာမြင့် ကုလ လူ့အခွင့်အရေးကောင်စီရဲ့ နှစ်ပတ်လည်အစည်းအဝေး ပထမနေ့ဖြစ်တဲ့ ဒီကနေ့မှာ တူရကီနိုင်ငံခြားရေးဝန်ကြီး Mevlut Cavusoglu က ဒီလို ပြောကြားလိုက်တာ ဖြစ်ပါတယ်။

ရှင်ကျန်းပြည်နယ်မှာ တူရကီစကားပြောတဲ့ ၀ီဂါတွေနဲ့ အခြား မွတ်စလင် တစ်သန်းလောက်ကို တရုတ်အစိုးရက အကျဉ်းစခန်းတွေထဲ ပိတ်လှောင်ထားတယ်လို့ ကုလ ကျွမ်းကျင်သူတွေနဲ့ တက်ကြွလှုပ်ရှားသူတွေက ပြောကြားထားပါတယ်။ တရုတ်ကတော့ ဒီစွပ်စွဲချက်တွေကို ငြင်းဆိုပြီး အစွန်းရောက်ဝါဒကို တိုက်ဖျက်ဖို့အတွက် ပညာပေးမှု လုပ်ဆောင်တာဖြစ်တယ်လို့ တုန့်ပြန်ထားပါတယ်။

Mevlut Cavusoglu ရဲ့ ဒီကနေ့ မိန့်ခွန်းမှာ တရုတ်မှာရှိနေတဲ့ အကျဉ်းစခန်းတွေအကြောင်း တိုက်ရိုက် ထည့်သွင်းပြောကြားခြင်း မရှိပေမယ့် ရှင်ကျန်းမှာ ၀ီဂါတွေနဲ့ အခြားမွတ်စလင်တွေ လူ့အခွင့်အရေး ချိုးဖောက်ခံနေရတယ်ဆိုတဲ့ သတင်းတွေဟာ စိုးရိမ်ဖွယ်ရာဖြစ်တယ်လို့ ဆိုပါတယ်။

အကြမ်းဖက်သမားတွေနဲ့ အပြစ်မဲ့သူတွေကို ခွဲခြားဆောင်ရွက်ဖို့ Cavusoglu က တရုတ်ကို တိုက်တွန်းခဲ့သလို၊ တရုတ် တစ်နိုင်ငံတည်း ပေါ်လစီကို ထောက်ခံတယ်လို့လည်း ထည့်သွင်းပြောဆိုခဲ့ပါတယ်။

“ဘာသာရေးလွတ်လပ်ခွင့်အပါအ၀င် ကမ္ဘာလုံးဆိုင်ရာ လူ့အခွင့်အရေးတွေကို လေးစားဖို့၊ ၀ီဂါနဲ့ အခြားမွတ်စလင်တွေရဲ့ ယဉ်ကျေးမှု အမှတ်သညာတွေကို အပြည့်အ၀ ကာကွယ်ပေးဖို့ တရုတ်အာဏာပိုင်တွေကို ကျွန်တော်တို့ တိုက်တွန်းပါတယ်”

လူ့အခွင့်အရေးကောင်စီအဖွဲ့ဝင် ၄၇ နိုင်ငံထဲမှာပါဝင်တဲ့ တရုတ်ဟာ တူရကီနိုင်ငံခြားရေးဝန်ကြီးရဲ့ ဒီမှတ်ချက်အတွက် ချက်ခြင်းတုန့်ပြန်မှု မလုပ်သေးပေမယ့် အစည်းအဝေးက ၄ ပတ် ကြာမြင့်မှာဖြစ်တာကြောင့် နောက်ပိုင်းမှာ တုန့်ပြန်လာနိုင်ပါတယ်။

တရုတ်နိုင်ငံ လူဦးရေး သန်း ၁၄၀၀ မှာ ၀ီဂါလူမျိုးတွေက ၁၀ သန်းလောက်သာရှိပြီး ဗဟိုအစိုးရကို ခြိမ်းခြောက်နိုင်စွမ်း မရှိပေမယ့် တရုတ်အစိုးရက ၀ီဂါတွေ ခွဲထွက်ရေး လှုပ်ရှားတယ်လို့ စွပ်စွဲကာ ဖိနှိပ်မှုတွေ လုပ်ဆောင်နေတယ်လို့ ဝေဖန်ခံနေရပါတယ်။

Ref: Aljazeera