တောင်တရုတ်ပင်လယ်ကိစ္စ ရှင်းရှင်းလင်းလင်းပြောရန် တရုတ်ကို မဟာသီ တောင်းဆို

မတ် ၇၊ ၂၀၁၉
M-Media

– တောင်တရုတ်ပင်လယ်ကို ပိုင်ဆိုင်တယ်ဆိုတဲ့ ပြောဆိုချက်ကို တရုတ်နိုင်ငံက တိတိကျကျ အဓိပ္ပါယ်ဖွင့်ဆိုသင့်တယ်လို့ မလေးရှားဝန်ကြီးချုပ် မဟာသီယာ မိုဟာမက်က ပြောကြားလိုက်ပြီး ဒါမှသာ ပိုင်ဆိုင်ကြောင်း ပြောနေတဲ့ အခြားနိုင်ငံတွေကလည်း အကျိုးအမြတ် ရရှိခံစားနိုင်မယ်လို့ ဆိုပါတယ်။

ဖိလစ်ပိုင်နိုင်ငံ မနီလာမြို့ကို ရောက်ရှိနေတဲ့ မဟာသီဟာ ABS-CBN သတင်းဌာနနဲ့ တွေ့ဆုံမေးမြန်းမှုအတွင်း အခုလို ပြောကြားလိုက်တာဖြစ်ပြီး လွတ်လပ်စွာ ရေကြောင်းသွားလာခွင့်ရရေးက ပိုမိုအရေးကြီးတယ်လို့ ဆိုပါတယ်။

“ရေကြောင်းသွားလာမှုကို ကန့်သတ်တာမျိုး မရှိဘူးဆိုရင် တရုတ်က ပင်လယ်တစ်ခုလုံးကို ပိုင်တယ်ဆိုလည်း ကျွန်တော်တို့အပေါ် ထိခိုက်မှု များများစားစား ရှိမှာ မဟုတ်ပါဘူး”

အရင်းအမြစ်ကြွယ်ဝတဲ့ တောင်တရုတ်ပင်လယ် ပိုင်ဆိုင်မှုအတွက် မလေးရှား၊ ဖိလစ်ပိုင်တို့ အပါအ၀င် အာဆီယံနိုင်ငံ တော်တော်များများက တရုတ်နဲ့ အငြင်းပွားနေကြတာပါ။ တရုတ်ကတော့ ပင်လယ်တစ်ခုလုံးဟာ သူတို့ ဘိုးဘွားတွေရဲ့ အမွေအနှစ်ဖြစ်တယ်လို့ ပြောကြားထားပါတယ်။

တရုတ်က ပိုင်ဆိုင်ကြောင်း ပြောကြားထားတဲ့ တောင်တရုတ်ပင်လယ်ကို အမေရိကန် စစ်သင်္ဘော ဖြတ်မောင်းတာတွေ ရှိတာကြောင့် တရုတ်နဲ့ အမေရိကန်အကြား တင်းမာမှုတွေလည်း ရှိနေပါတယ်။

မနီလာကို ရောက်ရှိနေတဲ့ မဟာသီဟာ သမ္မတ ရော်ဒရီဂို ဒူတာတေး၊ အခြား အစိုးရ တာဝန်ရှိသူတွေနဲ့ တွေ့ဆုံဆွေးနွေးဖို့ ရှိနေပါတယ်။ တောင်ပိုင်းက သူပုန်ကိစ္စမှာ မလေးရှားက ကြားဝင် စေ့စပ်ပေးခဲ့မှုအတွက်လည်း ဖိလစ်ပိုင်အစိုးရ မဟာသီကို ကျေးဇူးတင်ကြောင်း ပြောကြားမှာ ဖြစ်ပါတယ်။

Ref : Aljazeera