ဆော်ဒီ၏ လူ့အခွင့်အရေးချိုးဖောက်မှုများကို နိုင်ငံပေါင်း ၃၆ နိုင်ငံက ရှုတ်ချ

မတ် ၈၊ ၂၀၁၉
M-Media

– ဆော်ဒီအာရေဗျနိုင်ငံရဲ့ လူ့အခွင့်အရေးချိုးဖောက်မှု မှတ်တမ်းတွေကို ရှုတ်ချတဲ့ ကြေငြာချက်တစ်ခုကို ကုလ လူ့အခွင့်အရေးကောင်စီ အစည်းအဝေးမှာ နိုင်ငံပေါင်း ၃၆ နိုင်ငံက လက်မှတ်ရေးထိုး ထုတ်ပြန်လိုက်ပါတယ်။

မနေ့က ဒီကြေငြာချက်ကို လက်မှတ်ရေးထိုးတဲ့ နိုင်ငံတွေထဲမှာ ဥရောပသမဂ္ဂအဖွဲ့ဝင် ၂၈ စလုံး ပါဝင်ပါတယ်။ ဒါဟာ လူ့အခွင့်အရေးကောင်စီ တည်ထောင်ခဲ့တဲ့ ၂၀၀၆ ခုနှစ်ကတည်းက ဆော်ဒီကို ပထမဆုံး ရှုတ်ချမှု ဖြစ်ပါတယ်။

ဆော်ဒီအနေနဲ့ ဖမ်းဆီးထားတဲ့ တက်ကြွလှုပ်ရှားသူတွေကို လွှတ်ပေးဖို့ ဝေဖန်ရေး ဂျာနယ်လစ် ဂျမားလ်ကာရှိုဂျီ အသတ်ခံရမှု ကိစ္စအတွက် ကုလဦးဆောင်တဲ့ အဖွဲ့ရဲ့ စုံစမ်းစစ်ဆေးမှုမှာ ပူးပေါင်းဆောင်ရွက်ဖို့ ကြေငြာချက်မှာ တိုက်တွန်းခဲ့ပါတယ်။

“မစ္စတာ ကာရှိုဂျီ အသတ်ခံရမှုက ဂျာနယ်လစ်တွေကို ကာကွယ်ဖို့နဲ့ ကမ္ဘာတစ်ဝှမ်း လွတ်လပ်စွာ ထုတ်ဖော်ပြောဆိုခွင့်ကို ထိန်းသိမ်းဖို့ လိုအပ်နေတယ်ဆိုတာကို ထပ်မံ မီးမောင်းထိုးပြလိုက်တာ ဖြစ်ပါတယ်။ ဒီသတ်ဖြတ်မှုအတွက် စုံစမ်းစစ်ဆေးမှုဟာ လွတ်လပ်ပြီး ပွင့်လင်းမြင်သာရှိဖို့ လိုအပ်ပါတယ်။ ကျူးလွန်သူတွေကို အပြစ်ပေးကို ပေးရပါမယ်” လို့ ကြေငြာချက်မှာ ရေးသားထားပါတယ်။

လူ့အခွင့်အရေး ကာကွယ်စောင့်ရှောက်သူတွေ၊ ဂျာနယ်လစ်တွေ အပါအ၀င် အများပြည်သူလူထုဟာ သူတို့ရဲ့ အတွေးအမြင်တွေကို လွတ်လပ်စွာ ဖော်ပြခွင့်၊ အသင်းအဖွဲ့ လွတ်လပ်စွာ ဖွဲ့စည်းခွင့်တွေကို စိုးရိမ်စရာမရှိဘဲ ဆောင်ရွက်နိုင်ရေးအတွက် အဓိပ္ပါယ်ရှိတဲ့ ဆောင်ရွက်ချက်တွေကို လုပ်ဆောင်ပေးဖို့လည်း ကြေငြာချက်မှာ တိုက်တွန်းထားပါတယ်။

ဗုဒ္ဓဟူးနေ့က ကုလ လူ့အခွင့်အရေးကောင်စီ အကြီးအကဲ မီချဲလ် ဘာချီလတ်ရဲ့ မိန့်ခွန်းမှာလည်း ဆော်ဒီအနေနဲ့ ဖမ်းဆီးထားတဲ့ အမျိုးသမီးအရေး တက်ကြွလှုပ်ရှားသူ ၁၀ ဦးကို လွှတ်ပေးဖို့ တိုက်တွန်းခဲ့ပါတယ်။ ဖမ်းဆီးထားသူတွေဟာ လျှပ်စစ်ရှော့တိုက်တာ၊ ကြာပွတ်နဲ့ရိုက်တာ၊ လိင်ပိုင်းဆိုင်ရာ စော်ကားမှုတွေနဲ့ အခြား ညှင်းပမ်းနှိပ်စက်မှုတွေကို ခံစားခဲ့ရတယ်လို့ သတင်းတွေ ထွက်ခဲ့ပါတယ်။ ဆော်ဒီကတော့ ဒီသတင်းတွေကို ငြင်းဆိုထားပါတယ်။

Ref: Aljazeera