ပြည်တွင်းဖြစ် ဒုံးကျည်သစ်တစ်ခုကို စမ်းသပ်အောင်မြင်ခဲ့ကြောင်း ပါကစ္စတန်လေတပ် ကြေငြာ

မတ် ၁၃၊ ၂၀၁၉
M-Media

– ပြည်တွင်းဖြစ် extended-range ဒုံးကျည်သစ်တစ်ခုကို အောင်မြင်စွာ စမ်းသပ်နိုင်ခဲ့တယ်လို့ ပါကစ္စတန်လေတပ်က ထုတ်ပြန်ကြေငြာလိုက်ပြီး နိုင်ငံခြားကျူးကျော်မှု မှန်သမျှကို အင်အားအပြည့်နဲ့ တုန့်ပြန်သွားဖို့ သန္ဓိဌာန်ချထားကြောင်း ပြောကြားခဲ့ပါတယ်။

‘စမတ်လက်နက်’ လို့ အမည်ပေးထားတဲ့ အဲဒီဒုံးကျည်သစ်ဟာ ဝေဟင်က မြေပြင်ပစ် ဒုံးကျည်အမျိုးအစားမျိုး ဖြစ်ပြီး တရုတ်-ပါကစ္စတန် ဖက်ဆက်ထုတ်လုပ်ထားတဲ့ ဘက်စုံသုံး တိုက်လေယာဉ် JF-17 Thunder မှာ တပ်ဆင်ထားတာ ဖြစ်ပါတယ်။

အသေးစိတ်အချက်အလက်တွေကို ဖော်ပြခြင်း မရှိပေမယ့် ဒုံးကျည်စမ်းသပ်မှု ဗီဒီယိုအတိုတစ်ခုကိုတော့ ပါကစ္စတန်စစ်တပ်က ထုတ်ပြန်ခဲ့ပါတယ်။

အခုလို လက်နက်သစ်တစ်ခု ထုတ်လုပ်နိုင်မှုအတွက် ဂုဏ်ယူတယ်လို့ ပါကစ္စတန်လေတပ် စစ်ဦးစီးအရာရှိချုပ် မူဂျာဟစ် အန်ဝါရ် ခန်းက ပြောကြားခဲ့ပြီး ထုတ်လုပ်မှုမှာ ပါဝင်ခဲ့တဲ့ အင်ဂျင်နီယာတွေနဲ့ သိပ္ပံပညာရှင်တွေကို ချီးကျူးခဲ့ပါတယ်။

“ပါကစ္စတန်ဟာ ငြိမ်းချမ်းရေးကို မြတ်နိုးတဲ့ နိုင်ငံတစ်ခုပါ။ ဒါပေမယ့် ရန်သူက ကျူးကျော်လာရင်တော့ အင်အားအပြည့်နဲ့ တုန့်ပြန်သွားမှာ ဖြစ်ပါတယ်”

အိန္ဒိယက ထိန်းချုပ်ထားတဲ့ ကက်ရ်ှမီးယားဒေသမှာ ဖေဖော်ဝါရီလအစောပိုင်းက အသေခံ ကားဗုံးခွဲမှုတစ်ခု ဖြစ်ပွားခဲ့ပြီးတဲ့နောက်ပိုင်း ပါကစ္စတန်နဲ့ အိန္ဒိယတို့အကြား တင်းမာမှုတွေ မြင့်တက်ခဲ့ပြီး အပြန်အလှန် ပစ်ခတ်မှုတွေ ဖြစ်ပွားခဲ့ပါတယ်။

ပါကစ္စတန်အခြေစိုက် သူပုန်အဖွဲ့က ဗုံးခွဲမှုဟာ သူတို့လက်ချက်ဖြစ်တယ်လို့ ပြောကြားခဲ့ပြီး အိန္ဒိယကတော့ ဒီကိစ္စမှာ ပါကစ္စတန် ပါဝင်ပတ်သက်နေတယ်လို့ စွပ်စွခဲ့ပါတယ်။

Ref: RT