၃ နှစ်အတွင်း စီးပွားရေးတွင် အာရှကျား ပြန်ဖြစ်မည်ဟု မလေးရှား ဘဏ္ဍာရေးဝန်ကြီး ပြော

မတ် ၁၉၊ ၂၀၁၉
M-Media

မလေးရှား ဘဏ္ဍာရေးဝန်ကြီး လင်ဂွန်အန်

– အစိုးရသစ်လက်ထက်မှာ ပြည်ပက ရင်းနှီးမြှုပ်နှံမှုတွေ သိသိသာသာမြင့်တက်လာတာကြောင့် မလေးရှားဟာ သုံးနှစ်အတွင်း စီးပွားရေးမှာ အာရှရဲ့ကျားတစ်ကောင် ပြန်ဖြစ်လာမယ်လို့ မလေးရှားဘဏ္ဍာရေးဝန်ကြီး လင်ဂွန်အန်က ဒီကနေ့မှာ ပြောကြားလိုက်ပါတယ်။

၂၀၁၇ ခုနှစ်အတွင်း နိုင်ငံခြားက တိုက်ရိုက်ရင်းနှီးမြှုပ်နှံမှုဟာ ရင်းဂစ် ၅၄.၄ ဘီလီဖိုးသာ ရှိပေမယ့် ၂၀၁၈ ခုနှစ်မှာတော့ ၈၀.၅ ဘီလီယံအထိ ရှိလာခဲ့ပြီး ဒါဟာ နိုင်ငံရဲ့ စီးပွားရေးအပေါ် ရင်းနှီးမြှုပ်နှံသူတွေက ယုံကြည်နေတယ်ဆိုတာကို ပြသနေတယ်လို့လည်း လင်က ဆိုပါတယ်။

မလေးရှားဟာ ၀န်ကြီးချုပ်ဟောင်း နာဂျစ် ရာဇတ်လက်ထက်မှာ စီးပွားရေးကျဆင်းမှုနဲ့ ကြုံတွေ့ခဲ့ရပြီး နိုင်ငံပိုင်လုပ်ငန်း 1MDB ကနေလည်း ဒေါ်လာ ဘီလီယံချီ ပျောက်ဆုံးခဲ့ပါတယ်။ ဒီကိစ္စတွေကြောင့် ပြီးခဲ့တဲ့နှစ် ရွေးကောက်ပွဲမှာ နာဂျစ်တို့ပါတီဟာ မဟာသီဦးဆောင်တဲ့ နိုင်ငံရေးမဟာမိတ်အဖွဲ့ကို ရှုံးနိမ့်ခဲ့ပါတယ်။

ဒီကနေ့ ကွာလာလမ်ပူမှာ ကျင်းပတဲ့ Invest Malaysia 2019 ဆွေးနွေးပွဲမှာ ဘဏ္ဍာရေးဝန်ကြီး လင်ဂွန်အန်က နိုင်ငံအတွင်း တရုတ်နဲ့ ဂျပန်နိုင်ငံတို့က ရင်းနှီးမြှုပ်နှံမှုတွေဟာ သိသိသသာ မြင့်တက်လာခဲ့ပြီး ပြည်တွင်း လုပ်ငန်းရှင်တွေကလည်း ရင်းနှီးမြှုပ်မှုတွေကို ပိုမိုလုပ်ဆောင်ဖို့ မျှော်လင့်ကြောင်း ပြောကြားခဲ့ပါတယ်။

“တစ်ချို့ ခန့်မှန်းပြောဆိုမှုတွေရှိပေမယ့် ၂၀၁၈ ခုနှစ် အချက်အလက်တွေက အပြုသဘောဆောင်တယ်။ မလေးရှားစီးပွားရေးဟာ ဆက်လက် တိုးတက်နေတယ်လို့ ကျွန်တော်ထင်ပါတယ်။ စက်မှုထုတ်ကုန်အညွှန်းကိန်းက ဇန်န၀ါရီလမှာ ၃.၂ ရာခိုင်နှုန်း မြင့်တက်လာခဲ့ပြီး Bloomberg က ခန့်မှန်းထားတဲ့ ၂.၃ ရာခိုင်နှုန်းထက် သိသိသာကို ကျော်လွန်ခဲ့တာ ဖြစ်ပါတယ်”

စီးပွားရေးမှာ အာရှကျားတစ်ကောင်ဆိုတဲ့ အရင်ကဘွဲ့ကို မလေးရှားက လာမယ့် ၃ နှစ်အတွင်း ပြန်ရလိမ့်မယ်လို့လည်း လင်ဂွန်အန်က ထည့်သွင်းပြောဆိုခဲ့ပါတယ်။

Ref: CNA