လူတိုင်းဝယ်စီးနိုင်မည့် ပြည်တွင်းဖြစ်ကားပျံ နမူနာပုံစံကို မလေးရှားထုတ်ပြ

မတ် ၂၇၊ ၂၀၁၉
M-Media

– မလေးရှားဟာ ပြည်တွင်းထုတ် ကားပျံ နမူနာဒီဇိုင်းကို ဒီကနေ့မှာ ထုတ်ပြလိုက်ပြီး အခုနှစ်ဇွန်လအတွင်း အသုံးပြုနိုင်တော့မယ်လို့ ပြောကြားလိုက်ပါတယ်။

Vector လို့အမည်ပေးထားတဲ့ အဲဒီကားပျံကို လန်ကာဝီမှာလုပ်တဲ့ နိုင်ငံတကာ ရေကြောင်းနှင့် လေကြောင်းပြပွဲ International Maritime and Aerospace 2019 မှာ ထုတ်ပြလိုက်တာဖြစ်ပါတယ်။

ကားပျံကို ဒရုန်းနည်းပညာအခြေပြုကာ တည်ဆောက်ထားပြီး ခရီးသည်နဲ့ ပစ္စည်းတွေ ပို့ဆောင်ဖို့၊ ထောက်လှမ်း စောင့်ကြည့်ဖို့ စတဲ့ လုပ်ငန်းတွေအတွက် အသုံးပြုသွားမယ်လို့ ဒီဇိုင်းဆွဲဖန်းတီးတဲ့ ကုမ္ပဏီရဲ့ တာဝန်ရှိသူ အင်မ်ယဇ် မိုဟာမက်က ပြောကြားခဲ့ပါတယ်။

“Vector ကို မော်တာ ၄ လုံး၊ လစ်သီယံ-အိုင်းယွန်း ဘတ္ထရီနဲ့ တည်ဆောက်ထားပြီး ကောင်းကင်မှာ ပျံနိုင်မှာ ဖြစ်ပါတယ်။ ပစ္စည်းတွေကိုလည်း ၁၅၀ ကီလိုဂရမ်ကနေ ၂၀၀ ကီလိုဂရမ်အထိ သယ်နိုင်မှာပါ။ မြေပြင်အထက် မီတာ ၅၀လောက်မှာ တစ်နာရီကို ၆၀ ကီလိုမီတာနဲ့ နာရီဝက်ကနေ တစ်နာရီခွဲအထိ မောင်းနှင်နိုင်မှာ ဖြစ်ပါတယ်”

ပထမဆုံး နမူနာကားပျံကို အစောဆုံး ဇွန်လလောက်မှာ စတင်ပျံသန်းနိုင်မှာဖြစ်ပြီး၊ ဈေးနှုန်းကိုတော့ မသတ်မှတ်ရသေးကြောင်း အင်မ်ယဇ်က ပြောကြားခဲ့သလို မလေးရှားအစိုးရရဲ့ စွန့်ဦးတီထွင်မှု ဖွံ့ဖြိုးရေး ၀န်ကြီးဌာနကိုလည်း ကျေးဇူးတင်ကြောင်း ပြောကြားခဲ့ပါတယ်။ သူ့ကုမ္ပဏီသက်တမ်းဟာ ၄ နှစ်သာရှိသေးပေမယ့် ဒရုန်နည်းပညာနဲ့ပတ်သက်ပြီး အတွေ့အကြုံအများအပြား ရှိနေပါတယ်။

စွန့်ဦးတီထွင်မှု ဖွံ့ဖြိုးရေးဝန်ကြီးဌာန၀န်ကြီး မိုဟာမက် ရဒ်ဇူအန် မိုဟာမက် ယူစွဖ်က အန္တရာယ်ကင်းကင်းနဲ့ အနိမ့်ပျံသန်းနိုင်မယ့် မလေးရှားနိုင်ငံရဲ့
ပထမဆုံးကားပျံ နမူနာကို မကြာခင် ထုတ်ပြမယ်လို့ ပြောဆိုပြီး တစ်လအကြားမှာ Vector ပေါ်ထွက်လာတာ ဖြစ်ပါတယ်။

လန်ကာဝီမှာပြုလုပ်တဲ့ International Maritime and Aerospace 2019 ပြပွဲမှာ နိုင်ငံပေါင်း ၃၂ နိုင်ငံက ကုမ္ပဏီ ၂၀၀ လောက်ဟာ ကာကွယ်ရေးနဲ့ဆက်စပ်တဲ့ တီထွင်မှုပေါင်း ၄၀၆ ခုကို ၀င်ရောက်ပြသခဲ့ကြပါတယ်။

Ref: CNA