ကမ္ဘာတစ်ဝှမ်းမှ စစ်ပွဲများအတွက် အမေရိကန်နှင့် ဥရောပတွင် တာဝန်ရှိသည်ဟု ပုပ်ရဟန်းမင်း ပြော

ဧပြီ ၇၊ ၂၀၁၉
M-Media

ပုပ်ရဟန်းမင်းကြီး ဖရန်စစ်

– ကမ္ဘာတစ်ဝှမ်း စစ်ပွဲတွေဖြစ်ပွားပြီး ကလေးငယ်တွေအပါအ၀င် လူတွေ ထောင်သောင်းချီ သေဆုံးနေတာတွေဟာ အမေရိကန်နဲ့ ဥရောပနိုင်ငံတွေက လက်နက်တွေ ရောင်းနေတာကြောင့်ဖြစ်တယ်လို့ ပုပ်ရဟန်းမင်းကြီး ဖရန်စစ်က ပြောကြားလိုက်ပါတယ်။

အီတလီနိုင်ငံ မီလန်မြို့ San Carlo တက္ကသိုလ်က ဆရာတွေနဲ့ ကျောင်းသားတွေကို ဟောကြားတဲ့ တရားမှာ ပုပ်ရဟန်းမင်းက ဒီလို ပြောဆိုခဲ့တာပါ။ အမေရိကန်နဲ့ ဥရောပတို့လို လက်နက်ရောင်းတဲ့နိုင်ငံတွေသာ မရှိဘူးဆိုရင် အာဖဂန်နစ္စတန်၊ ယီမင်နဲ့ ဆီးရီးယားမှာ စစ်ပွဲဖြစ်ရာ မရှိဘူးလို့လည်း ဆိုပါတယ်။

“သေဆုံးသွားတဲ့ ကလေးငယ်တစ်ယောက်ချင်းစီအတွက်၊ ပျက်ဆီးသွားတဲ့ မိသားစု တစ်ခုချင်းစီအတွက် အဲဒီ လက်နက်ရောင်းတဲ့ နိုင်ငံတွေမှာ အပြစ်ရှိပါတယ်”

ပြောင်းရွှေ့အခြေချသူတွေကို လက်ခံဖို့နဲ့ လူ့အဖွဲ့အစည်းမှာ ပေါင်းစည်းသွားအောင် လုပ်ဆောင်ဖို့လည်း ပုပ်ရဟန်းမင်းကြီးက တိုက်တွန်းခဲ့ပြီး ပြောင်းရွှေ့အခြေချသူတွေကြောင့် ရာဇ၀တ်မှုဖြစ်တာဆိုတဲ့ ပြောကြားမှုတွေကို ပယ်ချခဲ့ပါတယ်။ အီတလီမှာဆိုရင် ဖြစ်ခဲ့တဲ့ ရာဇ၀တ်မှုအများစုဟာ နိုင်ငံခြားသားတွေကြောင့် မဟုတ်ဘူးလို့လည်း ထောက်ပြခဲ့ပါတယ်။

“မားဖီးယားဂိုဏ်းဆိုတာ နိုက်ဂျီးရီးယားတွေ ဖွဲ့ခဲ့တာမဟုတ်ပါဘူး။ ကျွန်တော်တို့ထဲကပဲ ဖြစ်လာတာပါ။ ကျွန်တော်တို့အားလုံးဟာ ရာဇ၀တ်ကောင်တွေ ဖြစ်နိုင်တာပဲ။ ပြောင်းရွှေ့အခြေချသူတွေက ကြွယ်ဝမှုတွေ ယူဆောင်လာတာပါ။ ဥရောပဆိုတာ ပြောင်းရွှေ့ အခြေချသူတွေနဲ့ပဲ တည်ဆောက်ထားတာ မဟုတ်လား”

Ref: Fars News