စင်ကာပူ၌ ယခုနှစ်အတွင်း မိုးပျံတက္ကဆီ စတင်စမ်းသပ် အသုံးပြုမည်

ဧပြီ ၁၀၊ ၂၀၁၉
M-Media

အသုံးပြုမည့်ယာဉ် (Photo Credit – CNA)

– ပထမဆုံး မိုးပျံတက္ကှဆီကို အခုနှစ်အတွင်း စမ်းသပ်ပြေးဆွဲသွားမယ်လို့ စင်ကာပူ အရပ်ဖက် လေကြောင်းအာဏာပိုင်အဖွဲ့ CAAS က မနေ့မှာ ထုတ်ပြန်ကြေငြာလိုက်ပါတယ်။ဂျာမနီကုမ္ပဏီ Volocopter နဲ့ ပူးပေါင်းဆောင်ရွက်မယ့် အဲဒီ စမ်းသပ်မှုကို နိုင်ငံတောင်ပိုင်းမှာ ပြုလုပ်မှာဖြစ်တယ်လို့ CAAS ဒုတိယညွှန်ကြားရေးမှူး တန်ချွန်ဝေက ပြောကြားခဲ့ပါတယ်။

“ပထမဆုံးအဆင့်အနေနဲ့ စမ်းသပ်မှုလောက်ပဲ ဖြစ်မှာပါ။ ရေပေါ်မှာလည်း ဖြတ်ပျံဖို့ရှိပြီး အဲဒီလို ပျံတဲ့နေရာမှာ အများပြည်သူအတွက် အန္တရာယ်မဖြစ်စေဖို့ ဘေးအန္တရာယ်ကင်းရှင်းရေး လုပ်ငန်းတွေကို Volocopter နဲ့ ပူးပေါင်းဆောင်ရွက်မှာ ဖြစ်ပါတယ်”

Volocopter စီအီးအို ဖလော်ရီရန် ရောက်တာက စမ်းသပ်မှုကို အခုနှစ် ဒုတိယနှစ်ဝက်အစမှာ ပြုလုပ်မယ်လို့ ပြောပါတယ်။ အသုံးပြုမယ့်ယာဉ်တွေ၊ စက်ပြင်အဖွဲ့ကိုတွေကို စင်ကာပူ ပို့ဆောင်တာ၊ ယာဉ်တွေထားဖို့နေရာ စီမံတာတွေဟာ အချိန်ယူရမှာ ဖြစ်တာကြောင့် အများပြည်သူ အမှန်တကယ်အသုံးပြုနိုင်ဖို့အတွက် နောက်ထပ် လအနည်းငယ်လောက် စောင့်ရဖို့ ရှိနေပါတယ်။

Volocopter မိုးပျံတက္ကဆီဟာ လာမယ့် ၅ နှစ်ကနေ ၁၀ နှစ်အတွင်း သာမန် ကားငှားစီးတဲ့ စားရိတ်လောက်အထိ သက်သာသွားမယ်လို့ မျှော်လင့်ကြောင်း ရောက်တာက ထည့်သွင်း ပြောဆိုခဲ့ပါတယ်။

အဲဒီယာဉ်ကို ဖိုက်ဘာအသားနဲ့ ပြုလုပ်ထားတာဖြစ်ပြီး အလေးချိန် ၄၅၀ ကီလိုဂရမ်ရှိပါတယ်။ ဒေါင်လိုက်ပျံတက်တာ၊ ဆင်းသက်တာ လုပ်နိုင်မှာဖြစ်သလို ခရီးသည် ၂ ယောက်တင်ဆောင်ကာ ကီလိုမီတာ ၃၀ အကွာအဝေးအထိ ပျံသန်းနိုင်မှာပါ။ Volocopter ဟာ ရဟတ်ယာဉ်နဲ့ ဆင်တူပေမယ့် ဒရုန်းနည်းပညာကို အခြေခံထားပါတယ်။ လေယာဉ်မှူးနဲ့ မောင်းနိုင်သလို အဝေးထိန်းစနစ်နဲ့လည်း မောင်းနှင်နိုင်ပါတယ်။

ရောက်တာက စင်ကာပူမှာ Volocopter ယာဉ်တွေကို ခရီးသည်ပို့ဆောင်ရေးအတွက်သာ မကဘဲ အခြားကိစ္စတွေအတွက် အသုံးပြုနိုင်အောင် ဆောင်ရွက်သွားမယ်လို့ ပြောကြားခဲ့ပါတယ်။

Ref: CNA