WikiLeaks တည်ထောင်သူ ဂျူလီယန် အာဆန့်ဂ်ျကို ဗြိတိန် ဖမ်းဆီး

ဧပြီ ၁၁၊ ၂၀၁၉
M-Media

– အာဖဂန်နစ္စတန်နဲ့ အီရတ်ကျူးကျော်စစ်က အချက်အလက်တွေအပါအ၀င် အမေရိကန်အစိုးရရဲ့ လျှို့ဝှက်ချက် တော်တော်များများကို ဖော်ထုတ်ခဲ့တဲ့ WikiLeaks ကို တည်ထောင်သူ ဂျူလီယန် အာဆန့်ဂ်ျကို လန်ဒန်ရဲတပ်ဖွဲ့က ဒီကနေ့မှာ ဖမ်းဆီးလိုက်ပါတယ်။

အာဆန့်ဂ်ျဟာ ၂၀၁၂ ခုနှစ်ကတည်းကစလို့ လန်ဒန်မြို့က အီကွေဒေါသံရုံးမှာ ခိုလှုံခွင့်တောင်းကာ နေထိုင်နေတာဖြစ်ပြီး အီကွေဒေါအစိုးရက သူ့ရဲ့ ခိုလှုံခွင့်ကို ရပ်ဆိုင်းလိုက်ပြီးတဲ့နောက် ဒီလို ဖမ်းဆီးခံခဲ့ရတာ ဖြစ်ပါတယ်။ အီကွေဒေါသံရုံးက လန်ဒန်ရဲတပ်ဖွဲ့ကို ဒီကနေ့မှာ ၀င်ရောက်ခွင့် ပေးခဲ့ပြီး တပ်ဖွဲ့ဝင်တွေက အာဆန့်ဂ်ျကို ဆွဲထုတ်ကာ ရဲကားပေါ် တင်ဆောင်သွားပါတယ်။

အီကွေဒေါသမ္မတ လီနင် မိုရီနိုက အာဆန့်ဂ်ျရဲ့ ရိုင်းစိုင်း၊ ရန်လိုတဲ့လုပ်ရပ်တွေ၊ နိုင်ငံတကာ သဘောတူညီချက်တွေနဲ့ နေ့စဉ် စည်းမျဉ်းစည်းကမ်းတွေကို အကြိမ်ကြိမ် ချိုးဖောက်မှု စတာတွေကြောင့် ခိုလှုံခွင့်ကို ရုပ်သိမ်းလိုက်တာ ဖြစ်တယ်လို့ ပြောကြားခဲ့ပါတယ်။

သံတမန်ဆိုင်ရာ ခိုလှုံခွင့်ရပ်ဆိုင်းတာဟာ အီကွေဒေါရဲ့ လုပ်ပိုင်ခွင့်ဖြစ်ပြီး မိမိတို့အနေနဲ့ နိုင်ငံတကာ ဥပဒေ၊ စည်းမျဉ်းစည်းကမ်းတွေကို လိုက်နာဆောင်ရွက်ခဲ့တယ်လို့လည်း သူက ဆိုပါတယ်။

ဆွီဒင်က မုဒိမ်းမှုနဲ့ဖမ်းဆီးဖို့ ဆောင်ရွက်တဲ့အတွက် အာဆန့်ဂ်ျဟာ ၂၀၁၂ ခုနှစ်မှာ လန်ဒန်ကို ထွက်ပြေးလာကာ အီကွေဒေါသံရုံးမှာ ခိုလှုံခဲ့တာ ဖြစ်ပါတယ်။ ဒီအမှုကို ဆွီဒင်က ပိတ်လိုက်ပေမယ့် ဗြိတိန်အာဏာပိုင်တွေက အာဆန့်ဂ်ျရဲ့ ထွက်ပြေးမှုဟာ အာမခံနဲ့ပတ်သက်တဲ့ သတ်မှတ်ချက်တွေကို ချိုးဖောက်ရာရောက်တဲ့အတွက် ဖမ်းဆီးခဲ့တာဖြစ်တယ်လို့ ပြောကြားခဲ့ပါတယ်။

ဗြိတိန်ဟာ အာဆန့်ဂ်ျကို အမေရိကန်ထံ လွှဲပြောင်းပေးဖွယ် ရှိနေပါတယ်။

Ref: Aljazeera