ဆူဒန်အာဏာရှင် အိုမာရ် အလ်ဘရှီးရ် ရာထူးမှ ဖြုတ်ချခံရသည်ဟု သတင်းထွက်

ဧပြီ ၁၁၊ ၂၀၁၉
M-Media

ဆူဒန်အာဏာရှင် အိုမာရ် အလ်ဘရှီးရ်

– ဆူဒန်နိုင်ငံကို နှစ်ပေါင်း ၃၀ လောက် အုပ်စိုးခဲ့တဲ့ အာဏာရှင် အိုမာရ်-အလ်ဘရှီးရ်ကို စစ်တပ်က ရာထူးကနေ ဖြုတ်ချလိုက်ပြီဆိုတဲ့သတင်းတွေ ကျယ်ကျယ်ပြန့်ပြန့် ထွက်ပေါ်နေပြီး ဆူဒန်ပြည်သူတွေကတော့ လမ်းပေါ်ကိုထွက်ကာ အောင်ပွဲခံမှုတွေ ပြုလုပ်နေပါတယ်။

ပြီးခဲ့တဲ့နှစ် ဒီဇင်ဘာမှာ အခြေခံစားသောက်ကုန်ဖြစ်တဲ့ ပေါင်မုန့်တွေ ဈေးတက်တာကို မကျေနပ်တာကနေစပြီး ဆူဒန်ပြည်သူတွေဟာ အာဏာရှင်ဘရှီးရ် ပြုတ်ကျရေးအတွက် အကြီးအကျယ် ဆန္ဒပြခဲ့ကြပါတယ်။ ဘရှီးရ်နေထိုင်ရာ သမ္မတနန်းတော်အရှေ့မှာ ထိုင်သပိတ်ပြုလုပ်မှုနဲ့အတူ ပြီးခဲ့တဲ့ ၅ ရက်မှာတော့ ဆန္ဒပြမှု အရှိန်ပိုမြင့်လာခဲ့ပြီး စစ်တပ်ကကြားဝင်တဲ့အထိ ဖြစ်ခဲ့တာပါ။

ဒီကိစ္စနဲ့ပတ်သက်လို့ ဆူဒန်စစ်တပ်က ကြေငြာချက်တစ်စောင်ကို ထုတ်ပြန်ဖို့ ရှိနေပြီး တင့်ကားတစ်ချို့လည်း မြို့တာ် ခါသွန်ကို သွားရောက်မှုတွေ ရှိနေကြောင်း၊ မြို့တော်ရဲ့ လမ်းတွေပေါ်မှာ လုံခြုံရေး ထူထပ်စွာ ချထားကြောင်း သတင်းမီဒီယာတွေက ဖော်ပြကြပါတယ်။

ဘရှီးရ်ကို ဖြုတ်ချလိုက်ပြီလို့ သတင်းထွက်လာပြီးနောက်ပိုင်း ဆူဒန်ပြည်သူတွေဟာ လမ်းပေါ်ထွက် အောင်ပွဲခံမှုတွေ ပြုလုပ်ခဲ့ပါတယ်။ ဒါပေမယ့် လက်ရှိအစိုးရကို ဆက်ခံမယ့်သူဟာ စစ်အစိုးရမဖြစ်ရဘူးလို့ ဆန္ဒပြမှုကို ဦးဆောင်သူတွေက ပြောကြားမှုတွေ ရှိနေပါတယ်။

ဆူဒန်ထောက်လှမ်းရေးက သူတို့ဟာ နိုင်ငံရေးအကျဉ်းသားတွေ အားလုံးကို ပြန်လွှတ်လိုက်ပြီလို့ ဒီကနေ့မနက်ပိုင်းက ထုတ်ပြန်ကြေငြာခဲ့ပါတယ်။

အာဏာရှင် အိုမာရ် အလ်ဘရှီးရ် ပြုတ်ကျရေး ဆန္ဒပြမှုအတွင်း လုံခြုံရေးတပ်ဖွဲ့ဝင်တွေအပါအ၀င် စုစုပေါင်း ၄၉ ဦးသေဆုံးခဲ့တယ်လို့ ဆူဒန်အစိုးရ တာဝန်ရှိသူတွေက ထုတ်ပြန်ထားပါတယ်။

Ref: Aljazeera