BRI စီမံကိန်းခေါင်းစဉ်အောက်က တရုတ်ရဲ့အမြတ်ထုတ်မှုကို မလေးရှား ဘယ်လိုရှောင်ခဲ့သလဲ

ဧပြီ ၁၅၊ ၂၀၁၉
M-Media

– တရုတ်နဲ့ ပူးတွဲလုပ်ဆောင်မယ့် ရထားလမ်းစီမံကိန်းတစ်ခုမှာ မူလသဘောတူထားတဲ့ ကုန်ကျစားရိတ်ထက် ၃ ပုံ ၁ ပုံ လျော့သွားအောင် မလေးရှားအစိုးရသစ်က ပြန်လည်ညှိနှိုင်းနိုင်မှုဟာ BRI စီမံကိန်းကို နိုင်ငံအကျိုးစီးပွား မထိခိုက်အောင် ချဉ်းကပ်လို့ရတယ်ဆိုတာ ပြသနေတယ်လို့ သုံးသပ်မှုတွေ ရှိနေပါတယ်။

မြို့တော် ကွာလာလမ်မူကနေ မြောက်ပိုင်း ထိုင်းနယ်စပ်အထိ ဆက်သွယ်မယ့် အရှေ့ကမ်းရိုးတန်း ရထားလိုင်းစီမံကိန်း ECRL ကို နာဂျစ်ရာဇတ်ဦးဆောင်တဲ့ အစိုးရဟောင်းလက်ထက်က ရင်းဂစ် ၆၅.၅ ဘီလီယံနဲ့ စာချုပ်ချုပ်ဆိုခဲ့တာ ဖြစ်ပါတယ်။

ဒါပေမယ့် ပြီးခဲ့တဲ့နှစ်မှာ အာဏာရလာတဲ့ ၀န်ကြီးချုပ် မဟာသီက ဒီတန်ဖိုးဟာ ရှိသင့်တာထက် ပိုမိုမြင့်မားနေတယ်လို့ ဝေဖန်ကာ စီမံကိန်းအကောင်အထည်ဖော်နေမှုကို ရပ်ဆိုင်းခဲ့ပါတယ်။ အဲဒီနောက် တရုတ်နဲ့ ပြန်လည်ဆွေးနွေးမှုတွေ ပြုလုပ်ခဲ့ပြီး သောကြာနေ့မှာတော့ ရင်းဂစ် ၄၄ ဘီလီယံနဲ့ စီမံကိန်းကို ဆောင်ရွက်ဖို့ သဘောတူညီချက် ရခဲ့ပါတယ်။  ဒါဟာ မူလတန်ဖိုးထက် ၃ ပုံ ၁ ပုံကျော် (၂၃ ဘီလီယံ) လောက် လျှော့ချနိုင်ခဲ့တာဖြစ်ပြီး မလေးရှားရဲ့ နာမည်ကျော် Twin Tower ၂ ခုလောက် ဆောက်နိုင်တဲ့ ငွေကြေးပမာဏ ဖြစ်ပါတယ်။

နာဂျစ်အစိုးရလက်ထက်က တရုတ်နဲ့သဘောတူညီချက်မှာ ပါဝင်ခဲ့တဲ့ အတိုးနှုန်း ပမာဏကိုလည်း မဟာသီအစိုးရက လျှော့ချနိုင်ခဲ့ပြီး၊ စီမံကိန်း တိုးတက်မှုရှိမှ ကြွေးပြန်ဆပ်မယ်ဆိုတဲ့ သတ်မှတ်ချက်မျိုးရအောင်၊ စီမံကိန်းမှာ မလေးရှားကုမ္ပဏီတွေရဲ့ ရှယ်ယာ ပိုမိုပါဝင်နိုင်အောင် ညှိနှိုင်းနိုင်ခဲ့ပါတယ်။

ရပ်ဆိုင်းထားတဲ့ ECRL စီမံကိန်းကို မလေးရှားက မေလမှာ ပြန်လည် အကောင်အထည်ဖော်တော့မှာ ဖြစ်ပါတယ်။

တရုတ်၏ အမြတ်ထုတ်မှုအပေါ် စိုးရိမ်

မဟာသီအစိုးရဟာ အစိုးရဟောင်းလက်ထက်က တရုတ်နဲ့ စာချုပ်ချုပ်ထားတဲ့ အဓိက စီမံကိန်းတွေအားလုံးကို ပြန်လည် သုံးသပ်ဖို့ ကတိပြုထားပါတယ်။

“စိုးရိမ်မှုတော့ ရှိနေတာပေါ့။ အခုကိစ္စက စိုးရိမ်မှုတွေအတွက် အဖြေပါပဲ။ ကျွန်တော်တို့ အတိုက်အခံဘ၀ကတည်းက စီမံကိန်း စာချုပ်ချုပ်ဆိုတဲ့ ပုံစံတွေ၊ ငွေကြေးပမာဏတွေဟာ မှန်ကန်မှုမရှိဘူးလို့ မြင်ခဲ့ရတယ်” လို့ မဟာသီက ဒီကနေ့ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။

သမ္မတ ရှီကျင့်ဖျင့်ရဲ့Belt and Road စီမံကိန်းဟာ အာရှ၊ ဥရောပနဲ့ အာဖရိကကို ချိတ်ဆက်ကာ ကမ္ဘာတစ်ဝှမ်း ကုန်သွယ်ရေးနဲ့ စီးပွားရေး တိုးတက်အောင် ဆောင်ရွက်ဖို့ ဖြစ်တယ်လို့ တရုတ်က ပြောထားပါတယ်။ စီမံကိန်းဧရိယာအတွင်းမှာ ရှိနေတဲ့ နိုင်ငံတွေက အခြေခံအဆောက်အဦးတွေ ဖွံ့ဖြိုးတိုးတက်အောင် ကူညီမယ်လို့ တရုတ်က ကတိပြုထားပေမယ့် စာချုပ်ချုပ်တဲ့အခါမှာ တရုတ်ဆောက်လုပ်ရေးကုမ္ပဏီတွေ အသာစီးရအောင် တစ်ဖက်သတ် ချုပ်ထားတာမျိုး၊ မြင့်မားတဲ့
အတိုးနှုန်းနဲ့ ငွေချေးတာမျိုးတွေ ရှိနေတဲ့အတွက် နိုင်ငံငယ်တွေဟာ တရုတ်ရဲ့ အကြွေးထောင်ချောက်ထဲ သက်ဆင်းရမှာကို စိုးရိမ်နေကြပါတယ်။

သီရိလင်္ကာနိုင်ငံဟာ BRI စီမံကိန်းဖော်ဆောင်ဖို့ တရုတ်ထံကနေ ချေးယူထားတဲ့ငွေ ပြန်မဆပ်နိုင်တာကြောင့် ပြီးခဲ့တဲ့နှစ်မှာ Hambantota ဆိပ်ကမ်းကို တရုတ်လက်ထဲ ထိုးအပ်ခဲ့ရပါတယ်။ အင်ဒိုနီးရှားအပါအ၀င် BRI စီမံကိန်းမှာ ပါဝင်ဖို့ ရှိနေတဲ့ နိုင်ငံတွေကလည်း တရုတ်နိုင်ငံရဲ့ ခြေလှမ်းတွေကို ပိုပြီး သတိထားလာပါတယ်။

ECRL စီမံကိန်းမှာ မလေးရှားက တရုတ်နဲ့ ပြန်လည်ညှိနှိုင်းသွားတာကိုကြည့်ရင် တရုတ်အနေနဲ့ နိုင်ငံရေးအန္တရာယ်တွေကို ပိုမို ဦးစားပေးသုံးသပ်ဖို့ လိုအပ်တယ်ဆိုတာ ပြသနေကြောင်း စင်ကာပူအခြေစိုက် စီးပွားရေးပညာရှင် ဆွန်ဆန်ဝွန်က ပြောကြားခဲ့ပါတယ်။

တရုတ်ဟာ အခုလအတွင်း BIR စီမံကိန်းအတွက် ဒုတိယမြောက် ထိပ်သီးအစည်းအဝေးကို ဘေးဂျင်းမှာ ကျင်းပဖို့ ရှိနေပါတယ်။

ECRL စီမံကိန်းဟာ နိုင်ငံရဲ့ အဓိကဆိပ်ကမ်းဖြစ်တဲ့ ကလန်းဆိပ်ကမ်း၊ မလာကာရေလက်ကြားနဲ့ နိုင်ငံအရှေ့မြောက်ပိုင်း ထိုင်းနယ်စပ်က မြို့တွေကို ဆက်သွယ်ပေးမှာ ဖြစ်ပါတယ်။ ဒါဟာ ကလန်းနဲ့ ကွမ်တန်မြို့တို့မှာ ဆောက်လုပ်နေတဲ့ တရုတ်ဆိပ်ကမ်းအတွက် အရေးပါတဲ့ ကုန်းလမ်းကြောင်းထွက်ပေါက်ကို ရရှိမှာ ဖြစ်ပါတယ်။

အရင်သဘောတူညီချက်မှာ မလေးကျွန်းဆွယ်ကို အလယ်ကနေဖြတ်မယ့် တောင်ဖောက် ဥမင်လှိုင်ခေါင်းဆောက်လုပ်ဖို့ ပါဝင်ခဲ့ပေမယ့် စာချုပ်သစ်မှာတော့ တောင်ကိုရှောင်ကာ တောင်ဘက်ကို ဆက်သွားမယ့်လမ်းကိုသာ ဖောက်လုပ်ဖို့ သဘောတူခဲ့ပါတယ်။

“ယဉ်ကျေးမှု၊ သမိုင်းအမွေအနှစ်နဲ့ သဘာဝပတ်ဝန်းကျင်ဆိုင်ရာ အကြောင်းအရင်းတွေကို အဓိကထားပြီး စာချုပ်သစ်ကို သေသေချာချာ ချုပ်ဆိုခဲ့တာ ဖြစ်ပါတယ်” လို့ မဟာသီက ပြောကြားခဲ့ပါတယ်။

Ref: Aljazeera

(Aljazeera သတင်းဌာနတွင် ဖော်ပြထားသည့် China signals Belt and Road shift with Malaysia rail project ဆောင်းပါးကို လေးမောင်က ထုတ်နှုတ်ဘာသာပြန်ဆိုပါသည်)