နိုင်ငံအတွင်း ၀င်လာသူများအား အလိုအလျောက်စစ်ဆေးသည့်စနစ် စင်ကာပူ စတင်စမ်းသပ်

ဧပြီ ၁၅၊ ၂၀၁၉
M-Media

– နိုင်ငံအ၀င်အထွက်မှာ နိုင်ငံကူးလက်မှတ် ပြသစရာမလိုဘဲ မျက်နှာနဲ့ မျက်လုံးသူငယ်အိမ်ကို စကန်ဖတ်ကာ အလိုအလျောက် စစ်ဆေး ဖြတ်သန်းခွင့်ပြုတဲ့ စနစ်ကို စတင် စမ်းသပ်လိုက်တယ်လို့ စင်ကာပူ လူဝင်မှုကြီးကြပ်ရေးနဲ့ စစ်ဆေးရေးအာဏာပိုင်အဖွဲ့ ICA က ဒီကနေ့မှာ ကြေငြာလိုက်ပါတယ်။

မလေးရှားနိုင်ငံဘက်ကအ၀င် Tuas Checkpoint မှာ ဧပြီလ ၈ ရက်နေ့စတင်ခဲ့တဲ့ အဲဒီစမ်းသပ်မှုဟာ ၆ လတာ ကြာမြင့်မှာဖြစ်ပါတယ်။

ဒီစနစ်အတွက် သီးသန့်လိုင်းတစ်ခု သတ်မှတ်ပေးထားပြီး ခရီးသွားတွေဟာ ပုံမှန်လုပ်ငန်းစဉ်တွေဖြစ်တဲ့ နိုင်ငံကူးလက်မှတ် ပြသတာ၊ လက်ဗွေနှိပ်တာတွေ လုပ်ဆောင်စရာ မလိုဘဲ မျက်နှာနဲ့ မျက်လုံးတို့ကို စကန်ဖတ်ကာ နိုင်ငံကူးလက်မှတ် မှန်ကန်မှု ရှိ၊ မရှိ စစ်ဆေးမှာ ဖြစ်ပါတယ်။

လက်ရှိမှာတော့ စင်ကာပူနိုင်ငံသားတွေထဲက K နဲ့စတဲ့ နိုင်ငံကူးလက်မှတ်ကိုင်ဆောင်ထားသူ အသက် ၆ နှစ်နဲ့အထက်ရှိသူတွေ၊ ဇန်န၀ါရီ ၁ ရက်နေ့နောက်ပိုင်း ထုတ်ပေးတဲ့ နိုင်ငံကူးလက်မှတ် ကိုင်ဆောင်ထားသူတွေသာ ဒီစနစ်ကို အသုံးပြုနိုင်မှာ ဖြစ်ပါတယ်။

အသုံးပြုနိုင်သူတွေဟာ ကြိုတင်စာရင်းသွင်းစရာမလိုဘဲ Tuas Checkpoint ကိုရောက်တာနဲ့ သတ်မှတ်ထားတဲ့ လမ်းကြောင်းကနေ မြန်မြန်ဆန်ဆန် ၀င်နိုင်မှာပါ။ စနစ်ကိုအသုံးပြုသူတွေဟာ မျက်မှန်၊ ဦးထုပ်၊ ဦးခေါင်းမှာအသုံးပြုတဲ့ အခြားအသုံးအဆောင်တွေ ၀တ်ဆင်ထားလို့မရပါဘူး။

စနစ်တိုးတက်ရေး ဆောင်ရွက်နိုင်ဖို့အတွက် အသုံးပြုနိုင်သူတွေအားလုံး အသုံးပြုပေးကြဖို့ ICA က တိုက်တွန်းထားပါတယ်။

ICA က ထုတ်ပြန်တဲ့ကြေငြာချက်မှာ စမ်းသပ်မှုရလဒ်ကို လေ့လာဆန်းစစ်ကာ အခြား စစ်ဆေးရေးဂိတ်တွေမှာ တိုးချဲ့အသုံးပြုနိုင်ရေး ဆောင်ရွက်သွားမယ်လို့ ဖော်ပြထားပါတယ်။

Ref: CNA