မြန်မာနိုင်ငံမှဆန်များကို စားသုံးရန်မသင့်သောကြောင့် အိုက်ဗရီကို့စ်က ဖျက်ဆီးပစ်

ဧပြီ ၁၇၊ ၂၀၁၉
M-Media

– မြန်မာနိုင်ငံက လာတယ်ဆိုတဲ့ ဆန်တန်ချိန်ပေါင်းများစွာကို လူတွေ စားသုံးဖို့ မသင့်တာကြောင့် အိုက်ဗရီကို့စ်နိုင်ငံက ဖျက်ဆီးလိုက်တယ်လို့ သိရပါတယ်။

ဆန်တန်ချိန်ပေါင်း ၁၈၀၀၀ လောက်ကို အိုက်ဗရီကို့စ်က မြေမြှုပ်ပစ်လိုက်တာ ဖြစ်ပါတယ်။ အဲဒီဆန်တွေဟာ အနောက်အာဖရိက နိုင်ငံတွေဖြစ်တဲ့ ဂါနာ၊ ဂီနီနဲ့ တိုဂိုနိုင်ငံတို့က အရည်အသွေးမကောင်းတာကြောင့် လက်မခံဘဲ နောက်ဆုံးမှာ အိုက်ဗရီကို့စ်နိုင်ငံကို ရောက်ရှိခဲ့တာ ဖြစ်ပါတယ်။

အဲဒီနောက် အရည်အသွေးဆန်းစစ်ခဲ့ရာမှာ လူတွေစားသုံးဖို့ မသင့်ဘူးဆိုတာကို တွေ့ခဲ့ရပါတယ်။

ဆန်ဟာ အာဖရိကတိုက်က နိုင်ငံတော်တော်များများရဲ့ အခြေခံစားသောက်ကုန်ဖြစ်ပေမယ့် ဒေသတွင်း လယ်သမားတွေဟာ ၀ယ်လိုအားပြည့်မီအောင် မစိုက်နိုင်တဲ့အတွက် ပြည်ပကနေ အများအပြား တင်သွင်းနေရတာ ဖြစ်ပါတယ်။ ဒါပေမယ့် အစိုးရ၀န်ထမ်းတွေ လာဘ်စားတာ၊ ဆန်နဲ့အတူ မူးယစ်ဆေးဝါးတွေ တင်သွင်းတာတွေလို ပြဿနာတွေလည်း ရှိနေပါတယ်။

မြန်မာနိုင်ငံရဲ့ ဆန်တင်ပို့မှုဟာ ၂၀၁၇-၁၈ ဘဏ္ဍာရေးနှစ်မှာ နှစ် ၅၀ အတွင်း အမြင့်ဆုံးပမာဏကို ရောက်ခဲ့ပါတယ်။ ဒါဟာ အာဖရိကတိုက်က နိုင်ငံတွေက ၀ယ်လိုအား မြင့်တက်လာတာကြောင့်ဖြစ်ပြီး သိရိလင်္ကာနဲ့ ဘင်္ဂလားဒေ့ရ်ှနိုင်ငံတွေကိုလည်း အစိုးရအချင်းအချင်း သဘောတူညီချက်နဲ့ တင်ပို့နေပါတယ်။

Ref: Africa News