အကြမ်းဖက်တိုက်ခိုက်ရန် ကြိုးစားမှုကို တားဆီးနိုင်ခဲ့ဟု ဆော်ဒီထုတ်ပြန်

ဧပြီ ၂၁၊ ၂၀၁၉
M-Media

မြို့တော်ရီယာ့ဒ် မြင်ကွင်း

– နိုင်ငံအလယ်ပိုင်းက ရဲစခန်းတစ်ခုကို ပစ်မှတ်ထားတဲ့ အကြမ်းဖက်တိုက်ခိုက်မှုကို ဟန့်တားရှင်းလင်းနိုင်ခဲ့ပြီး လူ ၄ ဦး သေဆုံးခဲ့တယ်လို့ ဆော်ဒီအာရဗျက ဒီကနေ့မှာ သတင်းထုတ်ပြန်ပါတယ်။

မြို့တော်ရီယာ့ဒ်ကနေ ကီလိုမီတာ ၂၅၀ ဝေးတဲ့မြို့ငယ်လေး ဇူလ်ဖီက ရဲစခန်းကို လက်နက်ကိုင် ၄ ဦးက ၀င်ရောက်တိုက်ခိုက်ဖို့ ကြိုးစားခဲ့တာ ဖြစ်ပါတယ်။ Al-Aarbiya သတင်းဌာနက ဒီလူလေးဦးဟာ စက်သေနတ်တွေ၊ ဗုံးတွေနဲ့ ဓာတ်ဆီဗုံးတွေကို သယ်ဆောင်လာတယ်လို့ ဖော်ပြခဲ့ပါတယ်။ လုံခြုံရေးတပ်ဖွဲ့ဝင်တွေဟာ သေနတ်သမားတွေကို အသေပစ်ခတ် ဟန့်တားခဲ့ပါတယ်။

လွန်ခဲ့တဲ့ ၁၀ နှစ်ကျော်က သူပုန်ထခဲ့တဲ့ အလ်ကိုင်းဒါးအဖွဲ့ဝင်တွေကို ဆော်ဒီအာဏာပိုင်တွေက နှိမ်နှင်းပြီးနောက်ပိုင်း ရဲစခန်းတွေနဲ့ လုံခြုံရေးဂိတ်တွေကို လက်နက်ကိုင်တွေက ၀င်ရောက်တိုက်ခိုက်ဖို့ ကြိုးစားမှု ဆော်ဒီမှာ မကြာခဏ ဖြစ်ပွားခဲ့တာပါ။

ပြီးခဲ့တဲ့နှစ်ကလည်း ဆော်ဒီလုံခြုံရေးတပ်ဖွဲ့ဟာ ရီယာ့ဒ်နဲ့ သိပ်မဝေးတဲ့ ဘူရိုင်ဒါဒေသက လုံခြုံရေးဂိတ်တစ်ခုကို တိုက်ခိုက်ဖို့ကြိုးစားတဲ့ ဘင်္ဂလားဒေ့ရ်ှနိုင်ငံသားတစ်ဦးကို ပစ်သတ်ခဲ့ပါတယ်။ နိုင်ငံမြောက်ပိုင်း တာအစ်ဖ်မြို့မှာလည်း အလားတူတိုက်ခိုက်မှုတစ်ခု ဖြစ်ပွားခဲ့ပြီး ရဲတပ်ဖွဲ့ဝင်တစ်ဦး သေဆုံးခဲ့ပါတယ်။

ဒီကနေ့အဖြစ်အပျက်နဲ့ပတ်သက်လို့ ဆော်ဒီ ပြည်ထဲရေးဝန်ကြီးဌာနက အသေးစိတ် ထုတ်ပြန်ပြောဆိုတာမျိုး မရှိသေးပါဘူး။

Ref: Aljazeera