ဆူဒန်အာဏာရှင်ဟောင်း ဘရှီးရ်၏အိမ်တွင် ငွေသား သန်းချီ တွေ့ရှိ

ဧပြီ ၂၁၊ ၂၀၁၉
M-Media

ဆူဒန်အာဏာရှင်ဟောင်း အိုမာရ် အလ်-ဘရှီးရ်

– ပြီးခဲ့တဲ့တစ်ပတ်မှာ စစ်တပ်ရဲ့ ဖြုတ်ချမှုကို ခံခဲ့ရတဲ့ ဆူဒန်အာဏာရှင်ဟောင်း အိုမာရ် အလ်-ဘရှီးရ်ရဲ့ နေအိမ်မှာ ငွေသားမျိုးစုံ ကန်ဒေါ်လာ ၇ သန်းဖိုးလောက် တွေ့ရှိခဲ့ရပြီး ငွေကြေးခ၀ါချမှုနဲ့ တရားစွဲဆို ခံထားရပါတယ်။

မြို့တော်ခါတွန်က ဘရှီးရ်ရဲ့နေအိမ်ကို စစ်ထောက်လှမ်းရေး တာဝန်ရှိသူတွေ ၀င်ရောက်ရှာဖွေရာမှာ ငွေသား ယူရို ၆ သန်း၊ ကန်ဒေါ်လာ ၃၅၁၀၀၀ နဲ့ ဆူဒန်ပေါင် ၅ သန်း ကို တွေ့ခဲ့ရပြီး စုစုပေါင်းတန်ဖိုးဟာ ကန်ဒေါ်လာ ၇ သန်းဖိုး ရှိပါတယ်။

တရားရေးဌာန ရင်းမြစ်တစ်ခုက ဘရှီးရ်ကို ငွေကြေးခ၀ါချမှု၊ နိုင်ငံခြားငွေ တရားမ၀င်ကိုင်ဆောင်မှုတွေနဲ့ တရားစွဲဆိုထားပြီး ရှေ့နေချုပ်ကလည်း ဒီကိစ္စကို အလျင်အမြန် စစ်ဆေးဖို့ အမိန့်ပေးထားတယ်လို့ ပြောကြားခဲ့ပါတယ်။

ဆူဒန်ကို နှစ်ပေါင်း ၃၀ ကျော်ကြာ အုပ်စိုးလာခဲ့တဲ့ အာဏာရှင်ဘရှီးရ် ဆင်းပေးဖို့ လူထုက လနဲ့ချီ ဆန္ဒပြမှုတွေ ပြုလုပ်ခဲ့ပြီးနောက် ဧပြီလ ၁၁ ရက်နေ့မှာ ဆူဒန်စစ်တပ်က အာဏာသိမ်းပြီး ဖြုတ်ချခဲ့ပါတယ်။ ဒါပေမယ့် အသစ်တက်လာတဲ့ စစ်ကောင်စီကို ပြည်သူက မနှစ်မြို့တဲ့အတွက် စစ်ကောင်စီခေါင်းဆောင်က လူထုနဲ့ ဆွေးနွေးမှုတွေ လုပ်ဆောင်နေပါတယ်။

ဧပြီ ၁ ရက်နေ့နောက်ပိုင်းမှာ တိုင်းပြည်အတွင်း ပြုလုပ်ခဲ့တဲ့ ငွေကြေးလွှဲပြောင်းမှုတွေကို စစ်ဆေးကာ သံသယရှိတဲ့ ငွေကြေးတွေကို သိမ်းဆည်းထားဖို့ စစ်ကောင်စီက ပြီးခဲ့တဲ့တစ်ပတ်မှာ ဗဟိုဘဏ်ကို အမိန့်ပေးခဲ့ပါတယ်။

Ref: Arab News