သီရိလင်္ကာတွင် ပေါက်ကွဲမှုတစ်ခု ထပ်ဖြစ်

ဧပြီ ၂၂၊ ၂၀၁၉
M-Media

– ကိုလံဘိုမြို့မှာ မနေ့က ဗုံးပေါက်ကွဲမှု ဖြစ်ပွားခဲ့တဲ့ စိန့်အန်ထော်နီ ကက်သလစ်ဘုရားကျောင်းအနီး ဒီကနေ့ ပေါက်ကွဲမှုတစ်ခု ထပ်ဖြစ်ခဲ့တယ်လို့ သိရပါတယ်။

ဖောက်ခွဲရေးပစ္စည်းတွေ တင်ဆောင်ထားတဲ့ ဗန်ကားတစ်စီးကို ရဲတပ်ဖွဲ့ဝင်တွေက ရှင်းလင်းစဉ် ပေါက်ကွဲခဲ့တာဖြစ်ပါတယ်။ ဒီအဖြစ်အပျက်အတွင်း သေဆုံးဒဏ်ရာရသူ ရှိလားဆိုတာ သီရိလင်္ကာအစိုးရက ထုတ်ပြန်ခြင်း မရှိသေးပါဘူး။ ကိုလံဘိုမြို့က ကားဂိတ်တစ်ခုမှာလည်း ဗုံးစနက်တံ ၈၇ ခု တွေ့ရှိခဲ့ရတာကြောင့် ရဲတပ်ဖွဲ့က ဒီကနေ့မနက်ပိုင်းမှာ ရှင်းလင်းခဲ့ပါတယ်။

သမ္မတ မိုင်သရီပါလာ ဆရီဆီနာဟာ တိုင်းပြည်ကို အရေးပေါ်အခြေအနေ ကြေငြာလိုက်ပြီး ဒီကနေ့ည သန်းခေါင်ယံအချိန်ကနေ စတင်ကာ အကြုံးဝင်မှာ ဖြစ်ပါတယ်။

သီရိလင်္ကာမှာ မနေ့က ခရစ်ယာန်ဘုရားကျောင်း ၃ ခုနဲ့ ဟိုတယ် ၃ ခုအပါအ၀င် နေရာ ၈ ခုမှာ ဗုံးပေါက်ကွဲမှု ဖြစ်ပွားခဲ့တာကြောင့် အနည်းဆုံး လူ ၂၉၀ သေဆုံးပြီး ၅၀၀ ကျော် ဒဏ်ရာရခဲ့ပါတယ်။ လက်ရှိ ရဲတပ်ဖွဲ့က သံသယရှိသူ ၂၀ ကျော်ဖမ်းဆီးထားပြီး ပြည်တွင်းအခြေစိုက် အစွန်းရောက်အဖွဲ့ National Thowheeth Jama က ဆောင်ရွက်တာဖြစ်တယ်လို့ သီရိလင်္ကာအစိုးရက ထုတ်ပြန် ပြောကြားထားပါတယ်။

Ref : Aljazeera