တူရကီအကူအညီပေးရေးအဖွဲ့က စစ်တွေတွင် ဆေးခန်းတစ်ခု ဖွင့်လှစ်

ဧပြီ ၂၂၊ ၂၀၁၉
M-Media

TİKA ၏ ၀ဘ်ဆိုက် စာမျက်နှာ

– တူရကီအစိုးရက ကျောထောက်နောက်ခံပြုထားတဲ့ အကူအညီပေးရေးအဖွဲ့ Turkish International Cooperation and Development Agency (TİKA) ဟာ ရခိုင်ပြည်နယ်မြို့တော် စစ်တွေမှာ ဆေးပေးခန်းတစ်ခု ဒီကနေ့မှာ ဖွင့်လှစ်လိုက်ပါတယ်။

ဆေးခန်းမှာ အသေးစားခွဲစိပ်မှု၊ မိခင်နှင့်ကလေး စောင့်ရှောက်ရေး၊ အထွေထွေရောဂါကုသမှုတွေကို ဆောင်ရွက်နိုင်မှာဖြစ်တယ်လို့ TİKA အဖွဲ့က ပြောကြားခဲ့ပါတယ်။ ဆေးခန်းမှာ လူမျိုးဘာသာမရွေး လာရောက်ကုသနိုင်တယ်လို့လည်း ဆိုပါတယ်။

Turkish International Cooperation and Development Agency (TİKA) အဖွဲ့ကို ၁၉၉၂ ခုနှစ်က ဖွဲ့စည်း တည်ထောင်ခဲ့တာဖြစ်ပြီး ဆိုဗီယက်ပြည်ထောင်စု ပြိုကွဲပြီးတဲ့နောက် ပေါ်ထွက်လာတဲ့ နိုင်ငံသစ်တွေကို နယ်ပယ်စုံမှာ ကူညီထောက်ပံ့ဖို့ ရည်ရွယ်တာ ဖြစ်ပါတယ်။

နောက်ပိုင်းမှာတော့ အာဖရိက၊ အရှေ့အလယ်ပိုင်းနဲ့ ဘောလ်ကန်ဒေသ၊ လက်တင်အမေရိကနဲ့ အာရှဒေသတွေမှာပါ အကူအညီပေးရေး လုပ်ငန်းတွေကို ချဲ့ထွင်လာနိုင်ပြီး ၂၀၁၅ ခုနှစ်မှာတော့ နိုင်ငံပေါင်း ၄၂ နိုင်မှာ အကူအညီပေးရေး စီမံကိန်းတွေ ဆောင်ရွက်လာနိုင်ခဲ့ပါတယ်။

TİKA ရဲ့ အကူအညီတွေကို အဓိကရရှိနေတဲ့ နိုင်ငံတွေက တူနီးရှား၊ ဆိုမာလီ၊ အာဖဂန်နစ္စတန်၊ မက်ဆီဒိုးနီးယားနဲ့ ကာဂျစ္စတန်နိုင်ငံတို့ ဖြစ်ပါတယ်။

Ref: AA