နိုင်ငံခြားသို့ အိမ်အကူလုပ်သားစေလွှတ်မှု ပိတ်ထားခြင်းကို မြန်မာ ဖယ်ရှား

ဧပြီ ၂၈၊ ၂၀၁၉
M-Media

စင်ကာပူနိုင်ငံမှ လူနေအိမ်ယာတစ်ခု

– စင်ကာပူအပါအ၀င် နိုင်ငံခြားတိုင်းပြည် ၄ ခုကို အိမ်အကူစေလွှတ်မှု ပိတ်ပင်ထားခြင်းကို အလုပ်သမားဝန်ကြီးဌာနက ရုပ်သိမ်းလိုက်ပြီလို့ ‘မြန်မာ ပြည်ပအလုပ်အကိုင်ဝန်ဆောင်မှု လုပ်ငန်းရှင်များအဖွဲ့ချုပ်’ (MOEAF) က ကြာသာပတေးနေ့မှာ ပြောကြားလိုက်ပါတယ်။

MOEAF အဖွဲ့ ဥက္ကဌ ဦးပီတာညွန့်မောင်က စင်ကာပူ၊ ထိုင်း၊ ဟောင်ကောင်နဲ့ မကာအိုတို့ကို အိမ်အကူအလုပ်သမားတွေ ပြန်လည်စေလွှတ်နိုင်မှာဖြစ်ပြီး တင်းတင်းကြပ်ကြပ် ကိုင်တွယ်ဆောင်ရွက်သွားမယ်လို့ ပြောကြားခဲ့ပါတယ်။

“(အစိုးရရဲ့) ပိတ်ပင်ထားမှုအတွင်း အိမ်အကူလုပ်သားတွေဟာ နိုင်ငံရပ်ခြားကို တရားမ၀င် သွားရောက်ကြတာပါပဲ။ တရားဝင်လုပ်လိုက်တော့ ထိန်းချုပ်ဖို့ ပိုလွယ်သွားတယ်”

မြန်မာနိုင်ငံက သွားရောက်အလုပ်လုပ်ကိုင်တဲ့ အိမ်အကူလုပ်သားတွေကို ကာကွယ်ပေးရေးအတွက် စင်ကာပူက အလုပ်အကိုင်ရှာဖွေရေး ကုမ္ပဏီတွေနဲ့ တွေ့ဆုံကာ လက်မှတ်ရေးထိုးဖို့လည်း အလုပ်သမား ၀န်ကြီးဌာနနဲ့ MOEAF တို့က စီစဉ်နေပါတယ်။

MOEAF က အိမ်အကူလုပ်သားတွေကို သဘောတူညီချက်အသစ်နဲ့ စင်ကာပူကို ပထမဆုံး စေလွှတ်သွားမှာဖြစ်ပြီး နောက်ပိုင်းမှာ အခြားတိုင်းပြည်တွေကို စေလွှတ်မယ်လို့ ထည့်သွင်းပြောဆိုခဲ့ပါတယ်။

နိုင်ငံရပ်ခြားမှာ အိမ်အကူလုပ်သား ခန့်အပ်တဲ့ လုပ်ထုံးလုပ်နည်းတွေ – အထူးသဖြင့် စာချုပ်၊ စည်းမျဉ်းစည်းကမ်းတွေနဲ့ ပတ်သက်ပြီး မြန်မာနဲ့ စင်ကာပူတို့က အလုပ်အကိုင်ရှာဖွေရေး အေဂျင်စီတွေအတွက် အသေးစိတ်အစီအစဉ်ထားမှုကို အကြောင်းကြားဖို့ အလုပ်သမားဝန်ကြီးဌာနက MOEAF ကို ညွှန်ကြားထားပါတယ်။

“အရင်က ကျွန်တော်တို့ အိမ်အကူလုပ်သားတွေ ခံစားခဲ့ရတဲ့ အခြေအနေမျိုးတွေ ထပ်မဖြစ်အောင် ကျွန်တော်တို့ ဆောင်ရွက်သွားမှာပါ” လို့ ဦးပီတာညွန့်မောင်က ပြောကြားခဲ့ပါတယ်။

ရွှေပြောင်းလုပ်သားတွေကို ကူညီပေးနေတဲ့ စင်ကာပူအခြေစိုက်အဖွဲ့ Humanitarian Organisation for Migration Economics မှာ စေတနာ့ဝန်ထမ်း လုပ်အားပေးနေသူ မကစ်တီအေးမာမာက အိမ်အကူလုပ်သားစေလွှတ်မှု ပိတ်ပင်ထားတာကို အခုလို ဖယ်ရှားပေးလိုက်တာကြောင့် အလုပ်အကိုင်အေဂျင်စီတွေက မရိုးမသားလုပ်တာမျိုးလို အမြတ်ထုတ်ခံရမှုတွေကို လျှော့ချနိုင်ပြီး လုပ်သားတွေကို ပိုမိုကာကွယ်ပေးနိုင်မယ်လို့ မျှော်လင့်ကြောင်း ပြောကြားခဲ့ပါတယ်။

ဒါပေမယ့် အိမ်အကူလုပ်သား ခန့်အပ်မှုနဲ့ပတ်သက်ပြီး မြန်မာ-စင်ကာပူ နှစ်နိုင်ငံ အစိုးရတွေ သဘောတူစာချုပ် ချုပ်ဆိုထားတာမျိုးက ပိုမိုကောင်းမွန်တယ်လို့ သူမက ဆိုပါတယ်။

စင်ကာပူအပါအ၀င် နိုင်ငံရပ်ခြားမှာ မြန်မာအိမ်အကူလုပ်သားတွေ ညှင်းပမ်းခံရတာ၊ လူ့အခွင့်အရေး ချိုးဖောက်ခံရတာတွေ ရှိတယ်ဆိုတဲ့ သတင်းတွေ ထွက်ပေါ်လာပြီးနောက်ပိုင်း ၂၀၁၄ ခုနှစ်မှာ မြန်မာအစိုးရက နိုင်ငံရပ်ခြားကို အိမ်အကူလုပ်သား စေလွှတ်မှုကို ပိတ်ပင်ခဲ့တာ ဖြစ်ပါတယ်။

ဒီလိုပိတ်ပင်ထားပေမယ့် နှစ်နိုင်ငံစလုံးမှာရှိတဲ့ အလုပ်အကိုင်ရှာဖွေရေး အေဂျင်စီတွေကနေတစ်ဆင့် စင်ကာပူမှာ အိမ်အကူလုပ်နေတဲ့ မြန်မာလုပ်သား ၅ သောင်းလောက် ရှိမယ်လို့ ခန့်မှန်းရပါတယ်။ အေဂျင်စီတွေဟာ ၀န်ဆောင်ခအဖြစ် အလုပ်သမားတွေရဲ့လစာ ၈ လစာလောက်အထိ ခေါင်းပုံဖြတ်မှုလည်း ရှိနေပါတယ်။

Ref: mmtimes

(Myanmar Times အင်္ဂလိပ်ပိုင်းတွင် ဖော်ပြထားသည့် သတင်းကို ကောက်နှုတ်ဘာသာပြန်ဆိုပါသည်။)