Fortune မဂ္ဂဇင်း၏ ကမ္ဘာ့ခေါင်းဆောင် ၅၀ စာရင်းတွင် မဟာသီယာ မိုဟာမက် ပါဝင်

မေ ၅၊ ၂၀၁၉
M-Media

– Fortune မဂ္ဂဇင်းက ရွေးချယ်ထုတ်ပြန်တဲ့ ကမ္ဘာ့အကြီးအကျယ်ဆုံး ခေါင်းဆောင် ၅၀ စာရင်းထဲမှာ မလေးရှားဝန်ကြီးချုပ် မဟာသီယာ မိုဟာမက် ပါဝင်လာပါတယ်။

မဟာသီဟာ အဆင့် ၄၇ မှာရှိနေပြီး Fortune က အသက် ၉၃ နှစ်မှာ ‘ထူးထူးခြားခြား သမိုင်းမှတ်တိုင်သစ် ရေးထိုးနိုင်ခဲ့သူ’ လို့ ကင်ပွန်းတပ်ခဲ့ပါတယ်။

မဟာသီဟာ ၁၉၈၁ ခုနှစ်ကနေ ၂၀၀၃ ခုနှစ်အထိ မလေးရှားဝန်ကြီးချုပ်အဖြစ် တာဝန်ထမ်းဆောင်ခဲ့ပြီး မလေးရှားကို အရှေ့တောင်အာရှမှာ စီးပွားရေးကျားတစ်ကောင်ဖြစ်အောင် ဆောင်ရွက်နိုင်ခဲ့ပါတယ်။ နောက်ပိုင်းမှာ နိုင်ငံရေးလောကကနေ အနားယူသွားပေမယ့် ပြီးခဲ့တဲ့နှစ် ရွေးကောက်ပွဲမှာ အတိုက်အခံခေါင်းဆောင်အဖြစ် ၀န်ကြီးချုပ် နာဂျစ်ရာဇတ်အစိုးရကို ဖြုတ်ချနိုင်ခဲ့ပါတယ်။

Fortune က မဟာသီဟာ ခြစားမှုတိုက်ဖျက်ရေး ကြွေးကျော်သံနဲ့ ထူးထူးခြားခြား ရွေးကောက်ပွဲအောင်နိုင်မှုကို ရခဲ့ကြောင်း၊ တိုင်းပြည်ရဲ့ အသင်းအဖွဲ့တွေတိုင်းမှာ အမြစ်တွယ်နေတဲ့ ခြစားမှုကို တိုက်ဖျက်ဖို့ ကြိုးစားနေကြောင်း၊ ၀န်ကြီးချုပ်ဟောင်း နာဂျစ်ကို ခြစားမှုစွဲချက်တွေနဲ့ တရားစွဲဆိုထားကြောင်း၊ နိုင်ငံပိုင်လုပ်ငန်း 1MDB က ပျောက်ဆုံးသွားတဲ့ ဒေါ်လာ ဘီလီယံများစွာကို ပြန်ရအောင် ဆောင်ရွက်နိုင်ခဲ့ကြောင်း ဖော်ပြခဲ့ပါတယ်။

“မဟာသီနဲ့ သူ့ရဲ့ပါတီဟာ လက်ရှိမှာ တိုင်းပြည်ရဲ့ လွတ်လပ်တဲ့ တရားရေးစနစ်၊ စာနယ်ဇင်း လွတ်လပ်ခွင့်တို့ကို ကာကွယ်ဖို့ ဆောင်ရွက်နေပြီး ရိုးသားတဲ့ ဒီမိုကရေစီကို အသိအမှတ်ပြုကာ ထိန်းသိမ်းနေပါတယ်” လို့ Fortune က ရေးသားခဲ့ပါတယ်။

Fortune ရဲ့ ကမ္ဘာ့အကြီးကျယ်ဆုံး ခေါင်းဆောင် ၅၀ စာရင်းထဲမှာ နယူးဇီလန်ဝန်ကြီးချုပ် ဂျာစင်ဒါ အာရ်ဒန်၊ သန်းကြွယ်သူဌေး ဘီလ်ဂိတ်နဲ့ သူ့ဇနီး မီလင်ဒါ ဂိတ်၊ ဗြိတိန်တော်ဝင်မင်းသား ဟယ်ရီနဲ့ သူ့ရဲ့ဇနီး မဂ်ဟန် မာကဲလ်တို့အပါအ၀င် ကမ္ဘာ့ ထိပ်တန်း ခေါင်းဆောင်တွေ ထင်ပေါ်ကျော်ကြားသူတွေ ပါဝင်ပါတယ်။

Ref: The Star