ပါကစ္စတန်ရှိ နာမည်ကျော် ဆူဖီဂူဗိမာန်တစ်ခု တိုက်ခိုက်ခံရ

မေ ၈၊ ၂၀၁၉
M-Media

-ပါကစ္စတန်နိုင် ငံ လာဟိုးရ်မြို့က နာမည်ကျော် မွတ်စလင်သူတော်စဉ်တစ်ဦးရဲ့ ဂူဗိမာန်အပြင်ဘက်မှာ ဒီကနေ့မနက်ပိုင်းက ဗုံးပေါက်ကွဲမှု ဖြစ်ပွားခဲ့တာကြောင့် အနည်းဆုံး လူ ၈ ဦးသေဆုံးပြီး ၂၀ ကျော် ဒဏ်ရာရရှိခဲ့ပါတယ်။

Data Darbar ဂူဗိမာန်အရှေ့က ရဲကားကို ပစ်မှတ်ထား ဗုံးခွဲခဲ့တာဖြစ်ပြီး သေဆုံးသူ ၈ ဦးမှာ ၅ ဦးက ရဲတပ်ဖွဲ့ဝင်တွေဖြစ်ပါတယ်။ ဒဏ်ရာရသူတွေထဲမှာ ၅ ဦးက စိုးရ်ိမ်ရတဲ့ အနေအထား ရှိတယ်လို့ ကယ်ဆယ်ရေးအဖွဲ့က ထုတ်ပြန်ခဲ့ပါတယ်။

ပြည်နယ် ရဲတပ်ဖွဲ့အကြီးအကဲ အာရစ်ဖ် နာဝဇ်က လက်လုပ်ဗုံးနဲ့ တိုက်ခိုက်တာ၊ ဒါမှမဟုတ် အသေခံဗုံးခွဲတာ ဖြစ်နိုင်ပြီး စုံစမ်းစစ်ဆေးမှု လုပ်ဆောင်နေတယ်လို့ ပြောကြားခဲ့ပါတယ်။

Data Darbar ဂူဗိမာန်ဟာ အိန္ဒိယတိုက်ငယ်မှာ ကြည်ညိုလေးစားခြင်းခံရတဲ့ ဆူဖီသူတော်စင် အဘူ ဟာဆန် အလီ ဟဂ်ျဗီရီရဲ့ ရုပ်ကလပ်ကို မြှုပ်နှံထားရာနေရာဖြစ်ပြီး ပါကစ္စတန်နိုင်ငံရဲ့ နာမည်ကျော် ဂူဗိမာန်တွေထဲက တစ်ခုလည်း ဖြစ်ပါတယ်။ ဒီဗိမာန်ကို လာရောက်ကာ ဆူဖီသူတော်စဉ်ကို အမှီသဟဲပြု ဆုတောင်းသူတွေ နေ့စဉ်နဲ့အမျှ ရှိနေပြီး ရမ်ဇာန်ဥပုသ်လမှာ လာရောက်သူ အရေအတွက်ဟာ သိသိသာသာ မြင့်တက်လေ့ ရှိပါတယ်။

ပါကစ္စတန်ဟာ ၂၀၀၇ ခုနှစ်ကတည်းက စတင်ကာ ‘ပါကစ္စတန်တာလီဘန်အဖွဲ့’ (TTP) ရဲ့ တိုက်ခိုက်မှုဒဏ်ကို အလူးအလဲ ခံခဲ့ရပြီး ၂၀၁၄ ခုနှစ်အတွင်း စစ်ဆင်ရေးတွေ ဆက်တိုက် လုပ်ဆောင်အပြီးမှာတော့ TTP ရဲ့ တိုက်ခိုက်မှုတွေက သိသိသာသာ လျော့ကျခဲ့ပါတယ်။

ဒါပေမယ့် ပြီးခဲ့တဲ့ နှစ်အနည်းငယ်အတွင်းမှာ IS အကြမ်းဖက်အဖွဲ့ရဲ့ ခြိမ်းခြောက်မှုကို ပါကစ္စတန်က ထပ်မံ ခံစားလာခဲ့ရပါတယ်။ IS အဖွဲ့ဟာ အစ္စလာမ်ဘာသာဝင်တွေရဲ့ သမိုင်းဝင်နေရာတွေ၊ အထွဋ်အမြတ်ထားရာ နေရာတွေ၊ နိုင်ငံအတွင်းက ဘာသာရေး လူနည်းစုတွေကို မကြာခဏ ပစ်မှတ်ထား တိုက်ခိုက်ခဲ့ပါတယ်။

ဒီကနေ့မနက် Data Darbar ဂူဗိမာန်က တိုက်ခိုက်မှုဟာ ဘယ်အဖွဲ့ရဲ့ လက်ချက်လဲဆိုတာကို မသိရသေးပါဘူး။

၂၀၁၀ ခုနှစ်ကလည်း Data Darbar ဂူဗိမာန်မှာ အသေခံတိုက်ခိုက်မှုတွေ ဖြစ်ပွားခဲ့ပြီး အနည်းဆုံး ၄၂ ဦး သေဆုံးကာ၊ အများအပြား ဒဏ်ရာရရှိခဲ့ပါတယ်။ ဒါဟာ ပါကစ္စတန်သမိုင်းတစ်လျှောက် ဆူဖီသူတော်စဉ်တွေရဲ့ ဂူဗိမာန်ကို ပစ်မှတ်ထားတိုက်ခိုက်မှုမှာ အဆိုးရွားဆုံး ဖြစ်ပါတယ်။

Ref: Aljazeera