ပါကစ္စတန်မှ ခရစ်ယာန်မိန်းကလေးငယ်များ တရုတ်မယားအဖြစ် လူကုန်ကူးခံနေ

မေ ၉၊ ၂၀၁၉
M-Media

-ပါကစ္စတန်က လူနည်းစု ခရစ်ယာန်လူ့အဖွဲ့အစည်းဟာ တရုတ်ပြည်က သတို့သမီးရှာဖွေရေး အေးဂျင့်တွေရဲ့ ပစ်မှတ်ထားမှုကို ခံလာနေရပြီး၊ တရုတ်ပြည်ရောက်သွားတဲ့ အမျိုးသမီးငယ်တွေဟာလည်း ညှင်းပမ်းနှိပ်စက်မှုတွေကို ခံနေရတယ်လို့ AP သတင်းဌာနက ဖော်ပြခဲ့ပါတယ်။

တရုတ်မယားလုပ်ဖုိ့ မိန်းကလေးငယ်တွေကို ငွေနဲ့ စည်းရုံးခေါ်ဆောင်တဲ့ လုပ်ငန်းဟာ ပါကစ္စတန်က ခရစ်ယာန်အသိုင်းအ၀ိုင်းမှာ ပြီးခဲ့တဲ့နှစ်နှောင်းပိုင်းကနေစတင်ပြီး မြင့်တက်လာတာ ဖြစ်ပါတယ်။ ပွဲစားတွေဟာ ခရစ်ယာန်ဘုရားကျောင်းတစ်ဝိုက်မှာ ပေါ်ပေါ်တင်တင် လူခေါ်နေကြပြီး ခရစ်ယာန်ဘုန်းကြီးတွေကလည်း လူသစ်ရရှိရေး ကူညီပေးနေကြတယ်လို့ တက်ကြွလှုပ်ရှားသူတွေက ပြောကြားခဲ့ကြပါတယ်။

ပွဲစားတွေနဲ့ ခရစ်ယာန်ဘုန်းကြီးတွေဟာ ဆင်းရဲတဲ့မိသားစုတွေကို ချဉ်းကပ်ကာ သမီးပေးမယ်ဆိုရင် ချမ်းသာစေရမယ်လို့ အာမခံတာတွေလည်း ရှိပါတယ်။ တရုတ်နိုင်ငံက သတို့သားလောင်းဟာ မကြာခင်ကမှ ခရစ်ယာန်ဘာသာထဲ ၀င်လာတာဖြစ်ပြီး ချမ်းသာတယ်လို့ သွေးဆောင်ကြပြီး ကန်ဒေါ်လာ ထောင်ချီပေးကာ အမျိုးသမီးတွေကို ခေါ်ဆောင်သွားကြတာ ဖြစ်ပါတယ်။

အဲဒီလို ခေါ်ဆောင်သွားခြင်းခံရတဲ့ အမျိုးသမီးအများစုဟာ သူတို့ဆန္ဒမပါဘဲ လိုက်သွားရတာဖြစ်ပြီး တရုတ်ပြည်ရောက်တဲ့အခါ ဝေးလံခေါင်ဖျားတဲ့ဒေသတွေမှာ နေထိုင်ရတာ၊ ညှင်းပမ်းခံရတာ၊ ဘာသာစကားအခက်အခဲရှိတာကြောင့် နေထိုင်ရအဆင်မပြေတာတွေ ဖြစ်ခဲ့တယ်လို့ ပြန်လည် ထွက်ပြေးလာသူတွေက ပြောပါတယ်။

“ဒါဟာ လူကုန်ကူးမှုပါ။ ဒီလိုလက်ထပ်ပေးမှုအတွက် အဓိကပြဿနာက လောဘကြီးကြတာပါ။ လက်ထပ်သွားတဲ့ မိန်းကလေးငယ်တစ်ချို့နဲ့ ကျွန်တော် တွေ့ပြီးပါပြီ။ သူတို့ တော်တော်လေးကို ဆင်းရဲကြပါတယ်” လို့ ပန်ဂျပ်ပြည်နယ်က လူနည်းစုရေးရာနဲ့ လူ့အခွင့်အရေးဆိုင်ရာဝန်ကြီး အီဂျက်ဇ် အေလမ် သြဂက်စတိုင်းက ပြောကြားခဲ့ပါတယ်။

ဒီကိစ္စတွေအတွက် ပါကစ္စတန်အစိုးရနဲ့ တရုတ်သံရုံးတို့ကို သြဂက်စတိုင်းက ဝေဖန်ခဲ့ပြီး ဗီဇာတွေ၊ စာရွက်စာတမ်းတွေကို လွယ်လွယ်ထုတ်ပေးနေတယ်လို့ ပြစ်တင်ပြောဆိုခဲ့ပါတယ်။ တရုတ်နိုင်ငံခြားရေးဝန်ကြီးဌာနက ဒီသတင်းကို ငြင်းဆိုခဲ့ပြီး တရုတ်နိုင်ငံဟာ လူကုန်ကူးမှုကို သည်းမခံဘူးလို့ ပြောကြားခဲ့ပါတယ်။

တရုတ်မယားအဖြစ် ရောင်းစားခံရတဲ့ ပါကစ္စတန်အမျိုးသမီးအရေအတွက်ဟာ ရာနဲ့ချီ ရှိလာနေပြီး လူ့အခွင့်အရေး စောင့်ကြည့်အဖွဲ့ Human Rights Watch က ‘ပါကစ္စတန် အမျိုးသမီးတွေနဲ့ မိန်းကလေးငယ်တွေဟာ တရုတ်နိုင်ငံမှာ လိင်ကျွန်ဖြစ်မယ့်အန္တရာယ် အလွန်မြင့်မားနေပြီဆိုတဲ့ အထောက်အထားတွေ တွေ့ရတယ်’ လို့ ဧပြီလ ၂၆ ရက်နေ့က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

ပြီးခဲ့တဲ့လ တရုတ်အစိုးရဲ့ ထုတ်ပြန်ချက်မှာ ဒီလို တရားမ၀င် သတို့သမီးရှာဖွေရေးလုပ်ငန်းတွေကို ပါကစ္စတန်နဲ့ ပူးပေါင်းပြီး နှိမ်နှင်းနေကြောင်း ထည့်သွင်းဖော်ပြခဲ့ပါတယ်။

အရင်က တရုတ်မယားဖြစ်ခဲ့သူ၊ တရုတ်မယားဖြစ်အံ့ဆဲဆဲမှာ ထွက်ပြေးလွတ်မြောက်လာသူ တစ်ဒါဇင်ကျော်လောက်နဲ့ AP သတင်းဌာနက မေးမြန်းမှုတွေ ပြုလုပ်ခဲ့ရာမှာ ဒီလို လက်ထပ်မှုအတွင်း ပွဲစားတွေ၊ ခရစ်ယာန်ဘုန်းကြီးတွေ ပါဝင်ပတ်သက်ခဲ့ကြောင်း၊ ပါကစ္စတန်က မြို့ကြီးတွေမှာ မင်္ဂလာဦးညကို ကျော်ဖြတ်ပြီး နောက်ပိုင်းမှာ တရုတ်နိုင်ငံကို ခေါ်ဆောင်သွားခဲ့ကြောင်း ဖြေကြားခဲ့ကြပါတယ်။

“အားလုံးက ကလိမ်ကကျစ်တွေပါပဲ။ သူတို့ပေးတဲ့ကတိအားလုံးက အလိမ်အညာတွေပါ” လို့ တရုတ်ပြည်ကနေ ကိုယ်ဝန့်အရင့်အမာနဲ့ ပြန်လာတဲ့ အမျိုးသမီးငယ် မုကက်ဒက်စ် အက်ရ်ှရက်ဖ်က ပြောကြားခဲ့ပါတယ်။

သူမဟာ ပြီးခဲ့တဲ့နှစ် အောက်တိုဘာလ တရုတ်အမျိုးသားနဲ့ လက်ထပ်စဉ်က အသက် ၁၆ နှစ်အရွယ်သာ ရှိသေးပြီး တရုတ်ပြည်မှာ နှိပ်စက်မှုတွေ ခံခဲ့ရသူပါ။

တရုတ်နိုင်ငံမှာ ဆယ်စုနှစ်ချီ ရှိခဲ့တဲ့ တစ်အိမ်ထောင် ကလေးတစ်ယောက် ပေါ်လစီကြောင့် အမျိုးသမီး ရှားပါးမှု ဖြစ်ပေါ်နေပြီး ပတ်ဝန်းကျင်က ဆင်းရဲတဲ့နိုင်ငံတွေထံကနေ အမျိုးသမီးတွေကို ငွေပေးခေါ်ယူတာတွေကို ပြီးခဲ့တဲ့နှစ်အတွင်း ပိုမို လုပ်ဆောင်လာကြပါတယ်။ ဒါပေမယ့် တရုတ်နိုင်ငံကို သတို့သမီးအဖြစ် ရောက်သွားသူတွေဟာ ညှင်းပမ်းနှိပ်စက်ခံရတာ၊ အဓမ္မပြုကျင့်ခံရတာ၊ ကလေးမွေးပြီးရင် ထပ်ဆင့်ရောင်းစားခံရတာတွေ ရှိတယ်ဆိုတဲ့ သတင်းတွေလည်း ထွက်လာခဲ့ပါတယ်။

တရုတ်နိုင်ငံက အမျိုးသမီးရှာဖွေရေးပွဲစားတွေဟာ အရင်က ဗီယက်နမ်၊ လာအိုနဲ့ မြောက်ကိုရီးယားနိုင်ငံတွေကိုသာ ပစ်မှတ်ထားခဲ့ပေမယ့် အခုနောက်ပိုင်းမှာတော့ မြန်မာနဲ့ ပါကစ္စတန်လို နိုင်ငံတွေက ဆင်းရဲသားလူတန်းစားတွေကို ပိုမို ပစ်မှတ်ထားလာပါတယ်။

ပါကစ္စတန်က ခရစ်ယာန်အရေး တက်ကြွလှုပ်ရှားသူ စလင်း အစ်က်ဘာလ်က ပြီးခဲ့တဲ့နှစ် အောက်တိုဘာလကစလို့ ဒီကိစ္စကို သတိပြုမိလာတာဖြစ်ပြီး အဲဒီအချိန်ကတည်းက တရုတ်မယားအဖြစ် ငွေပေးခေါ်ဆောင်ခံရသူ အရေအတွက်ဟာ ၇၅၀ ကနေ ၁၀၀၀ အထိရှိတယ်လို့ ပြောကြားခဲ့ပါတယ်။ ပန်ဂျပ်ပြည်နယ်မှာနေထိုင်တဲ့ ခရစ်ယာန်တွေဟာ အဓိက ပစ်မှတ်ထားခံနေရတယ်လို့လည်း သူက ဆိုပါတယ်။

ပါကစ္စတန် လူဦးရေ သန်း ၂၀၀ မှာ ခရစ်ယာန်ဘာသာဝင်တွေက ၂.၅ သန်းလောက်သာရှိပြီး နိုင်ငံရေးနဲ့ လူမှုရေးဆိုင်ရာ ကိစ္စတွေမှာ အစိုးရရဲ့ ကူညီပံ့ပိုးမှု ရရှိခံစားရခြင်း မရှိဘဲ အများစုဟာ ဆင်းရဲကြသူတွေ ဖြစ်ပါတယ်။

ပါကစ္စတန်က လူမျိုးစုတွေမှာ မိဘတွေက သားသမီးတွေရဲ့ အိမ်ထောင်ရေးကို ဆုံးဖြတ်ပေးတဲ့ အစဉ်အလာတွေ ရှိနေပြီး၊ သမီးမိန်းကလေးတွေမွေးတဲ့ မိဘတွေဟာ သားမက်ရှာတဲ့အခါ တင်တောင်းရတဲ့ လူမျိုးစုရိုးရာ ဓလေ့ထုံးတမ်းကြောင့် သမီးမိန်းကလေးတွေထက် သားယောက်ျားလေးတွေကိုသာ ပိုမိုရယူလိုကြပါတယ်။

ခရစ်ယာန်မိန်းကလေးငယ်တွေကို သတို့သမီးအဖြစ် ရယူကြတဲ့ တရုတ်အမျိုးသား အများစုဟာ တရုတ်ရဲ့ Belt and Road စီမံကိန်း တစ်စိတ်တစ်ပိုင်းအဖြစ် ပါကစ္စတန်က အခြေခံအဆောက်အဦး တည်ဆောက်ရေးလုပ်ငန်းတွေမှာ လုပ်ကိုင်နေကြတဲ့ အမျိုးသားတွေဖြစ်ပြီး၊ တရုတ်ပြည်မကြီးကနေ ပွဲစားတွေနဲ့ ရှာဖွေတာတွေလည်း ရှိနေပါတယ်။

သတို့သမီးတစ်ယောက်အတွက် ကန်ဒေါ်လာ ၃၅၀၀ ကနေ ၅၀၀၀ အထိ ဈေးပေါက်သလို လက်ထပ်စားရိတ်အားလုံးကိုလည်း တရုတ်အမျိုးသားတွေဖက်က ကျခံတာတွေရှိတယ်လို့ အစ်က်ဘာလ်က ပြောပါတယ်။ အစ်က်ဘာလ်ဟာ ဒီလို လူကုန်ကူးမှုဆန်ဆန် လက်ထပ်မှုတွေကို တားဆီးပေးဖို့အတွက် တရားရုံးတွေကို သွားရောက် တိုင်ကြားတာတွေ လုပ်ဆောင်နေပြီး၊ သတို့သမီးအဖြစ် ခေါ်ဆောင်ခံရပြီးတဲ့နောက် ညှင်းပမ်းခံရမှုကြောင့် ထွက်ပြေးလာတဲ့ အမျိုးသမီးငယ်တွေကို ကယ်ဆယ်ပေးနေသူလည်း ဖြစ်ပါတယ်။ သူ ကယ်ဆယ်ထားတဲ့ အမျိုးသမီးတွေထဲမှာ အသက် ၁၃ နှစ်လောက်အထိ ငယ်ရွယ်တဲ့ အမျိုးသမီးတွေ ပါဝင်ပါတယ်။

ပန်ဂျပ်ပြည်နယ်က လူနည်းစုရေးရာဝန်ကြီး သြဂက်စတိုင်းက တရုတ်ကပွဲစားတွေဟာ ခရစ်ယာန်ဘုန်းကြီးတွေကို ငွေပေးပြီး စည်းရုံးခိုင်းတယ်လို့ ပြောကြားခဲ့ပါတယ်။ လာဟိုးရ်မြို့မြောက်ဖက်က ဂွတ်ဂျရန်ဝါလာမြို့ဟာ ပွဲစားတွေ မျက်စိကျတဲ့နေရာဖြစ်ပြီး ပြီးခဲ့တဲ့လ အနည်းငယ်အတွင်း အမျိုးသမီး ၁၀၀ ကျော်လောက် တရုတ်မယားဘ၀ ရောက်သွားကြတယ်လို့လည်း သူက ဆိုပါတယ်။

တရုတ်ပြည်ကို လိုက်သွားကြတဲ့ ခရစ်ယာန်အမျိုးသမီးတွေဟာ အိမ်တွင်းမှာ ပိတ်လှောင်ခံရတာ၊ ညှင်းပမ်းနှိပ်စက်ခံရတာ၊ ခင်ပွန်းဖက်က မိသားစုတွေရဲ့ အနိုင်ကျင့်ခံရတာတွေ ရှိနေပြီး ပါကစ္စတန်က မိသားစုတွေရဲ့ ကြိုးပမ်းမှုတွေကြောင့် လွတ်မြောက်လာသူတွေ ရှိပေမယ့် အများစုကတော့ တရုတ်မယားအဖြစ် ဆက်လက်ရှိနေဆဲ ဖြစ်ပါတယ်။

Ref: AP